بۇگىندە ينۆەستيتسيا نەگىزىنەن اۋىل شارۋاشىلىعى, قايتا وڭدەۋ ونەركاسىبى, رەنوۆاتسيا, ينفراقۇرىلىم سالالارىنا باعىتتالعان. يندۋستريالىق جانە شاعىن وندىرىستىك ايماقتار ارقىلى ينۆەستورلارعا دايىن ينفراقۇرىلىم ۇسىنىلىپ, قولايلى جاعداي جاسالىپ وتىر.
2025 جىلدىڭ قورىتىندىسى بويىنشا وبلىستىڭ نەگىزگى كاپيتالىنا تارتىلعان ينۆەستيتسيا كولەمى 260 ملرد تەڭگەنى قۇرادى, ناقتى كولەم يندەكسى 3,4%-عا ءوستى. بيىلعى جىلدىڭ قاڭتار-ناۋرىز ايلارىندا ينۆەستيتسيا 40,6 ملرد تەڭگەنى قۇراپ, وتكەن جىلدىڭ سايكەس كەزەڭىمەن سالىستىرعاندا 1,7 ەسەگە ارتتى.
قازىر مەملەكەت باسشىسىنىڭ ينۆەستيتسيا تارتۋ جونىندەگى تاپسىرمالارىن ورىنداۋ شەڭبەرىندە ناقتى جوبالاردى ىسكە اسىرۋ ماقساتىندا بىرقاتار شەتەلدىك كومپانيامەن كەلىسسوز جۇرگىزىلىپ جاتىر. ناتيجەسىندە, وبلىسقا تىكەلەي شەتەلدىك ينۆەستيتسيالاردى تارتۋ, جاڭا وندىرىستەر اشۋ, ەكونوميكانى ءارتاراپتاندىرۋدى قامتاماسىز ەتۋ باعىتىنداعى جۇمىس جاندانىپ كەلەدى. ۇلىتاۋ وبلىسىنداعى ينۆەستيتسيالىق جوبالار مەن رەنوۆاتسيا باعدارلاماسىنىڭ جۇزەگە اسۋىن ارقاۋ ەتكەن ءباسپاسوز كونفەرەنتسياسىندا وبلىس اكىمىنىڭ ورىنباسارى نۇرتاس كارىپباەۆ اتقارىلىپ جاتقان جۇمىس بارىسى تۋرالى باياندادى.
«2026 جىلى جالپى قۇنى 11,8 ملرد تەڭگە بولاتىن 200-گە جۋىق جۇمىس ورنىن قۇرۋدى كوزدەيتىن ءتورت ءىرى جوبانى پايدالانۋعا بەرۋ جوسپارعا ەندى. العاشقىسى تاۋ-كەن بايىتۋ فابريكاسىن سالۋ جانە كومىردى بايىتۋ, قۇنى – 7 ملرد تەڭگە. اسفالتبەتون زاۋىتىنىڭ قۇرىلىسى – 2 ملرد تەڭگە. ساقتاۋ قۋاتى ءبىر مەزگىلدە 10 مىڭ تونناعا دەيىنگى كوكونىس قويماسىن سالۋ 2 ملرد تەڭگەنى قۇرايدى. سونىمەن قاتار قاتتى تۇرمىستىق قالدىقتاردى كادەگە جاراتۋ جانە كومۋ پوليگونى بازاسىندا قاعاز, پلاستيك جانە رەزەڭكە تەحنيكالىق بۇيىمداردىڭ قالدىعىن قايتا وڭدەۋ – 840 ملن تەڭگە. وسى جوبانىڭ بارلىعى جىل سوڭىنا دەيىن پايدالانۋعا بەرىلمەك. قازىر ۇلىتاۋ وبلىسى «PetroKazakhstan» كومپانياسىمەن بىرلەسىپ, قۇنى 49 ملرد تەڭگە بولاتىن ەنەرگيا ساقتاۋ جۇيەسى بار, قۋاتى 100 مۆت جەل ەلەكتر ستانساسىن سالۋدى جوسپارلاپ وتىر», دەيدى وبلىس اكىمىنىڭ ورىنباسارى.
بىلتىر ساتباەۆ قالاسىندا رەسپۋبليكالىق ماڭىزى بار يندۋستريالىق ايماق قۇرىلدى. اتالعان جوبا – وبلىس ەكونوميكاسىن ارتاراپتاندىرۋعا, جاڭا ءوندىرىس ورىندارىن اشۋعا, تۇرعىنداردى تۇراقتى جۇمىسپەن قامتۋعا باعىتتالعان ماڭىزدى باستامانىڭ ءبىرى. يندۋستريالىق ايماقتىڭ جالپى اۋماعى 12 گەكتاردى قۇرايدى (25 جىل مەرزىمگە), ونى 50 گەكتارعا دەيىن كەڭەيتۋ مۇمكىندىگى بار.
قازىر يندۋستريالىق ايماققا ەلەكتر, سۋ, جىلۋ جانە كارىز جەلىلەرىن تارتۋ بويىنشا قۇرىلىس جۇمىسى ءجۇرىپ جاتىر. بۇل جۇمىس جاقىندا اياقتالادى. جوبانىڭ جالپى قۇنى 822,4 ملن تەڭگەنى قۇرايدى.
بىلتىر يندۋستريالىق ايماققا جەرگىلىكتى بيۋدجەتتەن ينجەنەرلىك-كوممۋنيكاتسيالىق ينفراقۇرىلىم تارتۋ ماقساتىندا 125,9 ملن تەڭگە ءبولىندى. بولىنگەن قاراجات ەسەبىندە سۋ قۇبىرى جەلىسىن جۇرگىزۋ جۇمىسى ورىندالدى. سونىڭ ىشىندە: قۇرىلىس-مونتاج جۇمىسى – 122,7 ملن تەڭگە, تەحنيكالىق قاداعالاۋ – 2,7 ملن تەڭگە, اۆتورلىق قاداعالاۋ – 0,5 ملن تەڭگە.
يندۋستريالىق ايماقتى قۇرۋ تۇجىرىمداماسىنا سايكەس ينفراقۇرىلىم (يكي) قۋاتتىلىعىنا توقتالساق, ەلەكترمەن جابدىقتاۋ – 2,8 مۆت, جىلۋمەن جابدىقتاۋ – 2,8 گكال/ساع, سۋمەن جابدىقتاۋ – 57,8 م³/تاۋلىك, كارىز جۇيەسى – 96,0 م³/تاۋلىك, اۆتوجولدار – 0,296 كم (يندۋستريالىق ايماقتى جالپى پايدالانىمداعى جولدارمەن قوسۋ), تەمىرجول – 0,923 كم (قولدانىستاعى تەمىرجول ستانساسىن قوسقاندا), گازبەن جابدىقتاۋ – 8 000 م³/تاۋلىك (2027 جىلعا جوسپارلانعان).
وسى يندۋستريالىق ايماق اۋماعىندا جوبالاردى ىسكە اسىرۋعا بىرنەشە الەۋەتتى ينۆەستور قىزىعۋشىلىق تانىتقان. اتاپ ايتقاندا, رەزەڭكە جابىندىلار, قۇرىلىس ماتەريالدارى, مويىنتىرەكتەر, شىنىپاكەتتەر ءوندىرۋ جانە قويمالىق ينفراقۇرىلىم جوبالارى بار.
يندۋستريالىق ايماقتىڭ تولىق ىسكە قوسىلۋى وبلىسقا ينۆەستيتسيا تارتۋعا, جاڭا وندىرىستەر اشۋعا, تۇرعىنداردىڭ ءال-اۋقاتىن ارتتىرۋعا ۇلكەن سەرپىن بەرەدى.
2026 جىلعى 27 ناۋرىزدا قىتاي حالىق رەسپۋبليكاسىنداعى سيان قالاسىندا ەلىمىزدىڭ باس كونسۋلدىعىنىڭ قولداۋىمەن ۇلىتاۋ وبلىسى مەن شەنسي پروۆينتسياسى اراسىنداعى ساۋدا-ەكونوميكالىق ىنتىماقتاستىق فورۋمى ءوتتى. ىسكەرلىك كەزدەسۋگە وبلىس اكىمى, مەملەكەتتىك ورگاندار وكىلدەرىنەن قۇرالعان دەلەگاتسيا, سونداي-اق قىتاي جانە قازاقستان كومپانيالارىنىڭ شامامەن 100 وكىلى قاتىستى.
فورۋم اياسىندا ۇلىتاۋ وبلىسىنىڭ ينۆەستيتسيالىق الەۋەتى مەن ءوڭىردىڭ نەگىزگى ىنتىماقتاستىق باعىتتارى, ۇزاقمەرزىمدى ينۆەستيتسيالىق جوبالارى تانىستىرىلدى. ونەركاسىپتى دامىتۋعا, تۇرعىن ءۇي-كوممۋنالدىق ينفراقۇرىلىمعا جانە اگروونەركاسىپتىك كەشەنگە ەرەكشە نازار اۋدارىلدى. سونىمەن قاتار G2B جانە B2B فورماتتارىندا كەزدەسۋلەر وتكىزىلدى.
قورىتىندىسىندا جالپى قۇنى 12,5 ملرد تەڭگەنى قۇرايتىن التى مەموراندۋمعا قول قويىلدى. اتالعان جوبالار تۇرعىن ءۇي-كوممۋنالدىق ينفراقۇرىلىمدى جاڭعىرتۋ, مەتاللۋرگيالىق شلاكتاردى قايتا وڭدەۋ, اگروونەركاسىپتىك كەشەندى دامىتۋ باعىتتارىن قامتيدى.
سونىمەن قاتار شەتەلدىك ينۆەستيتسيالاردى تارتۋدى جانداندىرۋ, قىتاي حالىق رەسپۋبليكاسىمەن ساۋدا-ەكونوميكالىق ىنتىماقتاستىقتى كەڭەيتۋ ماقساتىندا سيان قالاسىندا ۇلىتاۋ وبلىسىنىڭ وكىلدىگى اشىلدى. ىسكەرلىك كەزدەسۋدە تالقىلانعان جوبالاردىڭ ءبىرى – تۇرعىن ءۇي-كوممۋنالدىق ينفراقۇرىلىمدى جاڭعىرتۋ. بۇل جوبا – تۇرعىن ۇيلەردى جاڭارتۋ عانا ەمەس, سونىمەن قاتار قالالاردىڭ كەلبەتىن جاڭعىرتۋعا, زاماناۋي جانە قاۋىپسىز ءومىر ءسۇرۋ ورتاسىن قالىپتاستىرۋعا باعىتتالعان ستراتەگيالىق باستاما. وسى جوبا اياسىندا ۇلىتاۋ وبلىسىندا تۇرعىن ءۇي قورىن رەنوۆاتسيالاۋدىڭ جاڭا بىرىڭعاي باعدارلاماسى ازىرلەندى. ازىرلەنگەن باعدارلامانى الداعى ۋاقىتتا زاڭدى جانە ءتيىمدى ىسكە اسىرۋدى قامتاماسىز ەتۋ ماقساتىندا وبلىستىق ءماسليحاتتىڭ قاراۋىنا جانە بەكىتۋىنە ۇسىنىلادى.
وبلىس كولەمىندە كوپپاتەرلى تۇرعىن ءۇي قورىنىڭ اعىمداعى جاعدايىن تالداۋ ناتيجەسىندە كوپپاتەرلى تۇرعىن ۇيلەردىڭ جالپى سانى 1 545 ەكەنى انىقتالدى. ونىڭ ىشىندە 457-ءسى توزىعى جەتكەن, 63-ءى – اپاتتى جاعدايداعى تۇرعىن ۇيلەر. تاراتىپ ايتساق, جەزقازعان قالاسىندا – 23 اپاتتى ءۇي, ساتباەۆ قالاسىندا – 31 اپاتتى ءۇي, قاراجال قالاسىندا – 7 اپاتتى ءۇي, ۇلىتاۋ اۋدانىندا – 2 اپاتتى ءۇي تىركەلگەن.
ۇلىتاۋ وبلىسىندا اپاتتى ۇيلەردى ءسۇرۋ باستالدى. وبلىس ورتالىعى جەزقازعان قالاسىندا رەنوۆاتسيا باعدارلاماسىن ىسكە اسىرۋ شەڭبەرىندە اباي كوشەسى №53, 55, 57, 59 مەكەنجايلارىندا ورنالاسقان اپاتتى تۇرعىن ۇيلەردى ءسۇرۋ جۇمىسى قولعا الىندى. جۇمىس كەزەڭ-كەزەڭىمەن جۇزەگە اسىرىلادى. العاشقى كەزەڭدە اباي كوشەسىندەگى №57 تۇرعىن ءۇي سۇرىلەدى. كەلەسى كەزەڭدە قاجەتتى دايىندىق جانە ۇيىمداستىرۋ جۇمىسى اياقتالعاننان كەيىن №59 تۇرعىن ءۇيدى بۇزۋ جوسپاردا تۇر.
شىعارىلعان قۇرىلىس قالدىعى مەن قوقىس ارنايى تەحنيكا ارقىلى قاتتى تۇرمىستىق قالدىق پوليگونىنا جەتكىزىلەدى.
اتالعان جوبا قالانىڭ تۇرعىن ءۇي قورىن جاڭعىرتۋعا, تۇرعىنداردىڭ قاۋىپسىزدىگىن ارتتىرۋعا, زاماناۋي تۇرعىن ءۇي ينفراقۇرىلىمىن دامىتۋعا باعىتتالعان. سۇرىلگەن ءۇيدىڭ ورنىنا ەكى بلوكتان تۇراتىن جاڭا كوپقاباتتى تۇرعىن ءۇي سالۋ جوسپارلانىپ وتىر.
ساتباەۆ قالاسىنىڭ اكىمى مۇرات بورىباەۆتىڭ ايتۋىنشا, قالادا ەسكى جانە اپاتتى تۇرعىن ۇيلەردى جاڭارتۋ باعىتىندا كەزەڭ-كەزەڭىمەن جۇمىس جۇرگىزىلەدى.
«وسى ماقساتتا قىتاي حالىق رەسپۋبليكاسىنىڭ «China-Kazakhstan Silk Road Yuntu (Xi’an) Technology Development Co., Ltd» كومپانياسىمەن بىرقاتار كەزدەسۋ وتكىزىلدى. كەزدەسۋ بارىسىندا وبلىس اۋماعىنداعى توزىعى جەتكەن تۇرعىن ۇيلەردىڭ ناقتى جاعدايى تانىستىرىلىپ, جوبالاردى ىسكە اسىرۋدىڭ تەتىكتەرى, كەزەڭدەرى مەن ىقتيمال شەشىمدەرى جان-جاقتى قاراستىرىلدى. «باقىتتى قالا» جوباسى اياسىندا وبلىسىمىزدا تۇرعىن ءۇي قورىن جاڭعىرتۋ بويىنشا « ۇلىتاۋ» اكك» اق مەن ينۆەستور اراسىندا ءوزارا ءىس-قيمىل جانە ۇزاقمەرزىمدى ارىپتەستىك تۋرالى مەموراندۋمعا قول قويىلدى. بۇل – ءوڭىردىڭ تۇرعىن ءۇي ينفراقۇرىلىمىن جاڭارتۋعا باعىتتالعان ماڭىزدى قادامداردىڭ ءبىرى», دەيدى قالا اكىمى.
جوبانى ىسكە اسىرماس بۇرىن باسىم اۋماقتار ايقىندالىپ, العاشقى كەزەڭدە ساتباەۆ قالاسىنداعى گۋربى كوشەسى 4-ءۇي جانە 6-ءۇي, سونداي-اق ساتباەۆ كوشەسى, 74–76 مەكەنجايىنداعى بوس تۇرعان تۇرعىن ۇيلەر قاراستىرىلدى. تۇرعىندارمەن سويلەسىپ, جوبانى كەزەڭ-كەزەڭىمەن جۇزەگە اسىرۋ تەتىكتەرى ناقتىلانىپ, ازاماتتاردىڭ مۇددەسى باستى نازارعا الىندى.
سونىمەن قاتار جەزقازعان قالاسىندا بۇرىنعى توقىما فابريكاسى عيماراتىن رەكونسترۋكتسيالاۋ جوباسىن ىسكە اسىرۋ قولعا الىندى. ۇلىتاۋ وبلىسى اكىمىنىڭ ورىنباسارى نۇرتاس عالىم ۇلى ۇزاق جىل بوس تۇرعان توقىما فابريكاسى عيماراتىن قايتا جاڭعىرتۋ ماقساتىندا 2025 جىلى 21 شىلدەدە جەلىلەردە رەسمي حابارلاندىرۋ جاريالانىپ, جەرگىلىكتى كاسىپكەرلەرمەن كەلىسسوز جۇرگىزىلگەنىن ايتتى. الايدا العاشقى ەكى اپتا ىشىندە جوباعا قىزىعۋشىلىق تانىتقان ينۆەستور بولماعان. تەك 2025 جىلعى 8 تامىزدا «SRT Construction» جشس تاراپىنان جوباعا قاتىسۋ نيەتى تۋرالى رەسمي حات كەلىپ تۇسكەننەن كەيىن ناقتى ۇيىمداستىرۋ جانە دايىندىق جۇمىسى باستالادى.
ناتيجەسىندە, « ۇلىتاۋ» اكك» اق مەن «SRT Construction» جشس اراسىندا بىرلەسكەن قىزمەت
تۋرالى شارت جاسالدى. قازىر توقىما فابريكاسى عيماراتىن رەكونسترۋكتسيالاۋ جونىندەگى ينۆەستيتسيالىق جوبا اياسىندا ينۆەستور بەكىتىلگەن جوبالىق-سمەتالىق قۇجاتتاماعا سايكەس قۇرىلىس-مونتاج جۇمىسى باستالدى. جوبا بويىنشا عيمارات مەملەكەتتىك ساراپتامانىڭ وڭ قورىتىندىسىن العان. جالپى سمەتالىق قۇنى 4,2 ملرد تەڭگەنى قۇرايدى. قارجىلاندىرۋ جاعىنا توقتالساق, 3,5 ملرد تەڭگە (85%) – « ۇلىتاۋ» اكك تاراپىنان, 700 ملن تەڭگە (15%) – ينۆەستور «SRT Construction» جشس (شىمكەنت قالاسى) تاراپىنان قامتاماسىز ەتىلەدى. سونىمەن قاتار ينۆەستورعا 1 ميلليارد تەڭگە كولەمىندە ينۆەستيتسيا تارتۋ مىندەتى جۇكتەلگەن.
بۇل قاراجات «SRT Construction» كومپانياسىنىڭ تىكەلەي ينۆەستيتسياسى ەمەس جانە سىرتقى قارجىلاندىرۋ كوزدەرىن تارتۋدى كوزدەيدى. شارت تالاپتارىنا ساي ينۆەستور مەن « ۇلىتاۋ» اكك» اق نىساندى 2030 جىلعا دەيىن بىرلەسىپ باسقارىپ, قىزمەت كورسەتەدى. ينۆەستور بەس جىل مەرزىمگە اتالعان نىسانعا قىزمەت كورسەتۋ مىندەتتەمەسىن ءوز موينىنا الادى. بىراق نىسانعا مەنشىك قۇقىعى ينۆەستورعا بەرىلمەيدى. جوبا ىسكە اسىرىلۋ كەزەڭىندە عيمارات « ۇلىتاۋ» اكك يەلىگىندە قالادى. بەسجىلدىق مەرزىم اياقتالعان سوڭ, ينۆەستور جوبا اياسىنداعى قىزمەتىن توقتاتادى. توقىما فابريكاسىنىڭ عيماراتى مەملەكەت مەنشىگىندە قالادى.
بۇگىندە عيماراتتان 2 000 توننا قۇرىلىس قالدىعىن شىعارۋ جۇمىسى اياقتالدى. سونىمەن قاتار تەرەزەسى ورناتىلدى.
نىسان فۋنكتسيونالدىق تۇرعىدان ءۇش بلوكقا – ا, ۆ جانە س بلوكتارىنا بولىنگەن. «ا» بلوگى دامۋ ينستيتۋتتارىن ورنالاستىرۋعا ارنالعان, ونىڭ ىشىندە «دامۋ», «اتامەكەن», «اگرارلىق نەسيە كورپوراتسياسى», « ۇلىتاۋ» الەۋمەتتىك-كاسىپكەرلىك كورپوراتسياسى جانە اۋماقتىق ۇيىمدار قاراستىرىلعان. «ۆ» بلوگىنىڭ ءبىرىنشى قاباتىندا مەيرامحانا, ەكىنشى, ءۇشىنشى قاباتىندا قوناقۇي, ال ءتورتىنشى قاباتىندا اۋماقتىق ۇيىمداردىڭ كەڭسەسى ورنالاستىرىلادى. «س» بلوگى شاعىن جانە ورتا بيزنەس سۋبەكتىلەرىنە ارنالعان. ءبىرىنشى قاباتتا گيپەرماركەت, ال جوعارعى قاباتتاردا شاعىن جانە ورتا بيزنەسكە ارنالعان كەڭسە مەن كوممەرتسيالىق ءۇي-جايلار ورنالاستىرىلادى.
جالپى العاندا, ۇلىتاۋ وبلىسى ينۆەستيتسيالىق الەۋەتى جوعارى ءوڭىر سانالادى. ينۆەستيتسيالىق جوبالاردى ءتيىمدى ىسكە اسىرۋ - جاڭا جۇمىس ورىندارىن قۇرۋعا, ءوندىرىس كولەمىن ارتتىرۋعا, ينفراقۇرىلىمدى جاڭعىرتۋعا جانە حالىقتىڭ ءومىر ءسۇرۋ ساپاسىن جاقسارتۋعا مۇمكىندىك بەرەدى.
ۇلىتاۋ وبلىسى
