ارداقتى اعايىن!
سىزدەردى كۇللى مۇسىلمان بالاسىنىڭ ۇلىق مەرەكەسى ورازا ايتپەن شىن جۇرەكتەن قۇتتىقتايمىن! ايت قابىل بولسىن! بارشاڭىزعا مىقتى دەنساۋلىق, وتباسىلارىڭىزعا اماندىق, جۇمىستارىڭىزعا بەرەكە تىلەيمىن. اللا تاعالا ءبارىمىزدىڭ مەرەيىمىزدى ۇستەم ەتسىن!
ورازا ايت – سىي مەن سياپاتقا, قۇرمەت پەن نىعمەتكە, شەكسىز ساۋاپقا بولەنەتىن ءسات. بۇل تۋرالى ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «ورازا ايت كۇنى پەرىشتەلەر جەر بەتىنە تۇسەدى دە, ءار جولدىڭ باسىندا تۇرىپ: «ۋا, مۇسىلمان قاۋىمى, راببىلارىڭا اسىعىڭدار! سەندەر ءتۇندى نامازبەن, كۇندىزدى ورازامەن وتكىزۋگە بۇيىرىلعاندا امال ەتىپ, راببىلارىڭا بويسۇنعاندارىڭ ءۇشىن اللا سەندەردى ۇلكەن ساۋاپ پەن تولاسسىز نىعمەتكە بولەيدى. سول ءۇشىن وزدەرىڭە تارتۋ ەتىلگەن سىيلىقتارىڭدى الىڭدار», دەپ داۋىستايدى. ال ورازا ايت نامازىن وقىپ بولعاننان كەيىن ءبىر پەرىشتە ادامدارعا بىلاي دەيدى: ء«شۇباسىز جاراتقان راببىلارىڭ كۇنالارىڭدى كەشتى. ۇيلەرىڭە اللانىڭ جولىنان اداسپاعان كۇيدە ورالىڭدار! راسىندا, بۇل كۇن جەر مەن اسپان الەمىندە سىي-سياپاتقا كەنەلۋ كۇنى دەپ اتالادى», دەگەن.
«ايت» ءسوزى «مەرەكەلەۋ», «حال سۇراسۋ», ء«بىر-ءبىرىن قۋانتۋ», «قۋانىشقا توپتالۋ» دەگەن ماعىنانى بىلدىرەدى. يسلامداعى ۇلىق مەيرامدار مۇسىلمان قاۋىمىنىڭ, بارشا ادامزاتتىڭ جۇرەگىنە قۋانىش سىيلاۋعا ۇندەيدى. ايت كۇنى وتباسىن, اعايىن-تۋىستى, كومەككە مۇقتاج ادامداردى, قارتتار مەن قاراۋسىز قالعان بالالاردى, مۇمكىندىگى شەكتەۋلى جانداردى قۋانتۋدىڭ ساۋابى مول. پايعامبارىمىز (وعان اللانىڭ سالاۋاتى مەن سالەمى بولسىن) ايتقانداي, پارىز امالىنان كەيىنگى ەڭ ابزال امال – مۇسىلماننىڭ جۇرەگىنە قۋانىش ۇيالاتۋ. ادام بالاسى وزگەنى قۋانتۋ ارقىلى ءوزى دە قۋانىشقا بولەنەدى.
اللا تاعالا: «مەن پارىز ەتكەن ورازانى پەندەلەرiم وتەپ, اقىسىن الۋعا (ايت نامازىن وتەۋگە) مەشiتكە بەت الدى. ولار مەن ءۇشiن ورازا ۇستادى, مەنiڭ پارمەنiممەن اۋىز اشتى, ەندi قۋانىشقا كەنەلسiن...», دەيدى. جاراتۋشى جاببار يەمىز بارشامىزدى ەكى دۇنيە قۋانىشى مەن نىعمەتىنە بولەگەي.
قۇرمەتتى باۋىرلار!
ورازا ايت – ادامدار اراسىنداعى باۋىرمالدىقتى ارتتىرىپ, تاتۋلىق پەن سىيلاستىقتى نىعايتاتىن ۇلىق مەرەكە. وسى ايت كۇندەرى ءبىر-بىرىمىزگە ىزگى تىلەكتەر ايتىپ, اعايىن-تۋىس, كورشى-قولاڭمەن ارالاسىپ, ۇلكەنگە قۇرمەت, كىشىگە ىزەت كورسەتىپ, قوعامىمىزداعى بىرلىك پەن بەرەكەنى ارتتىرا ءتۇسۋىمىز كەرەك.
ورازا ايت مەرەكەسى قۇتتى بولسىن! ءار شاڭىراققا باق پەن بەرەكە, بىرلىك پەن تاتۋلىق تىلەيمىن. اللا تاعالا ءسىز بەن ءبىزدى كەلەسى رامازانعا دەيىن امان-ەسەن جەتكىزىپ, مول ساۋاپقا كەنەلۋدى ءناسىپ ەتكەي. ەلىمىز امان, جۇرتىمىز تىنىش, تاۋەلسىزدىگىمىز باياندى بولعاي! ءاۋمين!
ناۋرىزباي قاجى تاعان ۇلى,
قمدب توراعاسى, باس ءمۇفتي
