«سيونيستىك رەجيمنىڭ ەڭ ءىرى مۇناي وڭدەۋ كەشەندەرى سانالاتىن حايفا مەن اشدودتاعى مۇناي وڭدەۋ زاۋىتتارىنا زىمىراندارمەن سوققى جاسالدى», دەلىنگەن يراننىڭ مەملەكەتتىك تەلەراديو كومپانياسى تاراتقان كسير مالىمدەمەسىندە.
وسىلايشا, كسير اقش پەن يزرايلگە قارسى «شىنايى ۋادە 4» وپەراتسياسى اياسىنداعى 65-ءشى سوققى تولقىنى تۋرالى حابارلاپ, يزرايلدەگى ونداعان اسكەري نىسانعا دا شابۋىل جاسالعانىن اتاپ ءوتتى.
ء«يزرايلدىڭ وڭتۇستىگى مەن ورتالىق بولىگىندەگى, سونىڭ ىشىندە ريشون-لە-تسيون قالاسى ماڭىنداعى, سونداي-اق تەل-ءاۆيۆتىڭ شىعىسى مەن وڭتۇستىگىندەگى 80 ءتۇرلى اسكەري نىسان زىمىران جۇيەلەرى مەن ۇشقىشسىز اپپاراتتار ارقىلى ءدال سوققىعا ۇشىرادى», دەپ كەلتىرەدى كورپۋستىڭ مالىمدەمەسىن IRNA اگەنتتىگى.
سونداي-اق كسير ءيزرايلدىڭ «ستراتەگيالىق نىساندارىنا», ونىڭ ىشىندە تەل-اۆيۆتەگى بەن-گۋريون اۋەجايىنا, ءيزرايلدىڭ ۇلتتىق قاۋىپسىزدىك مينيسترلىگىنە, تەل-اۆيۆتەگى 13-ارنانىڭ كەڭسەسىنە, سونداي-اق ءيزرايلدىڭ قۇرلىق اسكەرىنە قاتىستى نىساندارعا سوققى جاسالعانىن مالىمدەدى.
شابۋىلدار ۇشقىشسىز ۇشۋ اپپاراتتارى مەن زىمىراندار ارقىلى جاسالعانى اتاپ ءوتىلدى.
يران اقش پەن يزرايل تاراپىنان جاسالعان شابۋىلعا جاۋاپ رەتىندە تاياۋ شىعىستاعى اقش-تىڭ اسكەري نىساندارىنا جانە يزرايل اۋماعىنا سوققى بەرىپ جاتىر. قاقتىعىستىڭ العاشقى كۇنى, 28 اقپاندا, يراننىڭ وڭتۇستىگىندەگى قىزدار مەكتەبى سوققىعا ۇشىراپ, جوعارعى كوشباسشى اياتوللا ءالي حامەنەي قازا تاپقان. بۇۇ جانىنداعى يراننىڭ تۇراقتى وكىلى ءامىر سايد ءيراۆانيدىڭ مالىمەتىنشە, شابۋىل قۇرباندارىنىڭ جالپى سانى 1,3 مىڭنان استام بەيبىت تۇرعىندى قۇراپ, 17 مىڭنان استام ادام جارالانعان.
