سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
قازۇۋ رەكتورى – باسقارما توراعاسى جانسەيىت تۇيمەباەۆ مەملەكەت باسشىسىنا يننوۆاتسيالىق ونىمدەر ورتالىعىنىڭ جانە Farabi Hub-تىڭ جوعارى تەحنولوگيالىق جوبالارىن كورسەتتى.
حاب ەكونوميكانىڭ ناقتى سەكتورىنا يننوۆاتسيالىق ازىرلەمەلەر ەنگىزۋدى كوزدەيتىن زاماناۋي پلاتفورما رەتىندە قۇرىلعان. ونىڭ بازاسىندا كرەاتيۆتى يندۋستريا, جاساندى ينتەللەكت پەن ستارتاپ جوبالارى ىسكە اسىرىلادى. وسى ارقىلى 300 جاڭا جۇمىس ورنى اشىلىپ, 20,55 ملن دوللار ينۆەستيتسيا تارتىلدى.
ورتالىقتا ZTE, BASF, Binlin تەحنولوگيالىق كورپوراتسيالارىنىڭ, سونداي-اق باسقا دا شەتەلدىك جەتەكشى عىلىمي ۇيىمداردىڭ زەرتتەۋ الاڭدارى ورنالاسقان. بۇعان قوسا, مۇندا قازۇۋ-دىڭ عىلىمي-زەرتتەۋ ينستيتۋتتارى جۇمىس ىستەيدى.
پرەزيدەنتكە ۋنيۆەرسيتەت جالپى قۇنى 1 ملرد 250 ملن تەڭگەنى قۇرايتىن ءتورت ءىرى جوبانى جۇزەگە اسىرىپ جاتقانى جونىندە مالىمەت بەرىلدى.
مەملەكەت باسشىسىنا قىتايدىڭ سولتۇستىك-باتىس پوليتەحنيكالىق ۋنيۆەرسيتەتىمەن بىرلەسە ازىرلەنگەن ميكروسپۋتنيك ماكەتى كورسەتىلدى. جوعارى وقۋ ورىندارىنىڭ عالىمدارى NKSAT سپۋتنيگىن جاساپ جاتىر. ول جەردىڭ تارتىلىس اۋماعى مەن رادياتسيا دەڭگەيىن ولشەۋگە, گەولوگيالىق بارلاۋ جۇمىسىن جۇرگىزۋگە ارنالعان.
قاسىم-جومارت توقاەۆقا «قاشىقتان زوندتاۋ جانە ونى قولدانۋ تەحنولوگياسى» زەرتحاناسىنىڭ قىزمەتى تانىستىرىلدى. بۇل كەشەن قحر عىلىم اكادەمياسىمەن بىرلەسە اشىلدى. زەرتحانادا جاساندى جەر سەرىكتەرىنىڭ دەرەكتەرى نەگىزىندە ورتالىق ازياداعى كليمات جانە ەكولوگيا وزگەرىستەرى زەردەلەنەدى.
مەملەكەت باسشىسى «تسيفرلىق تەحنولوگيالار مەن روبوتتى تەحنيكا» حالىقارالىق ينستيتۋتىن جانە روبوتتى تەحنيكا ورتالىعىن, سونداي-اق قازاقستان-سينگاپۋر كۆانتتىق تەحنولوگيالار ورتالىعىن ارالاپ كوردى.
قاسىم-جومارت توقاەۆقا ۋنيۆەرسيتەت بازاسىندا ورنالاسقان سۋپەركومپيۋتەر كلاستەرى كورسەتىلدى. ونى قۇرۋعا 23 ملن دوللار ينۆەستيتسيا تارتىلعان. كلاستەر كۇردەلى ەسەپتەۋلەردى ورىنداۋ مەرزىمىن ايتارلىقتاي قىسقارتىپ, عىلىمي زەرتتەۋلەردىڭ تيىمدىلىگىن ارتتىرادى. سونداي-اق ءىت جانە جاساندى ينتەللەكت سالاسىندا مامان دايارلاۋعا كەڭىنەن جول اشادى.
