تۋعان ساتىندە سالماعى نەبارى 450 جانە 530 گرامم عانا بولعان كىشكەنتاي جىرتقىشتار بۇگىندە كوزگە كورىنەردەي جەتىلىپ, 3 كيلوعا جۋىقتاعان. جولبارىس تۇقىمىنىڭ تابيعاتىنان جالعىز جۇرەتىن قاسيەتىن ەسكەرسەك, ولاردى جۇپتاستىرۋ, انالىق جولبارىستىڭ كۇيزەلىسىن ازايتىپ, ساۋ ۇرپاق الۋ – ۇزاق دايىندىق پەن مۇقيات كۇتىمدى تالاپ ەتەتىن ۇلكەن ەڭبەك.
اسىرەسە العاشقى ايلار ەڭ جاۋاپتى كەزەڭ سانالادى. جاڭا تۋعان شونجىكتەردىڭ يممۋنيتەتى ءالسىز, سىرتقى دىبىس پەن ارتىق قوزعالىسقا تىم سەزىمتال كەلەتىندىكتەن, تۋسىمەن ولار ارنايى وقشاۋلانعان, تىنىش ايماقتا قارالدى. مۇنداي جايلىلىق انالىق جولبارىس ميانىڭ مازاسىزدانباۋىنا جانە مارعاۋلاردىڭ قالىپتى جەتىلۋىنە مۇمكىندىك بەرگەن.
«شونجىكتەردىڭ حال-جاعدايى ۇدايى قاداعالانىپ وتىر. ءبىزدىڭ زووباقتا ميا اتتى جولبارىس ەكىنشى رەت كۇشىكتەدى. قان تازالىعى مەن تۇقىم ساپاسىن ساقتاۋ ماقساتىندا الداعى ۋاقىتتا باسقا حايۋاناتتار باقتارىمەن جولبارىس الماسىپ, پوپۋلياتسيانى كوبەيتۋ جوسپاردا بار», دەيدى حايۋاناتتار باعىنىڭ جىرتقىش اڭدار ءبولىمىنىڭ باسشىسى مىندەتىن اتقارۋشى ايتبەك باكىباي ۇلى.
امۋر جولبارىسى – الەمدەگى ەڭ ءىرى ءارى سيرەك كەزدەسەتىن جىرتقىشتاردىڭ ءبىرى. تابيعاتتا ونىڭ سانى تىم شەكتەۋلى بولعاندىقتان, ءاربىر جاڭا تۋعان شونجىك – ماڭىزدى جاڭالىق.
بۇل وقيعانىڭ ەلىمىز ءۇشىن ماڭىزى تىپتەن بولەك. قازىرگى ۋاقىتتا كەزىندە جويىلىپ كەتكەن تۇران جولبارىسىنىڭ تاريحي مەكەنىن قالپىنا كەلتىرۋ ماقساتىندا ىلە – بالقاش وڭىرىندە امۋر جولبارىسىن جەرسىندىرۋ جوباسى جۇزەگە اسىپ جاتىر. عالىمدار بۇل ەكى جولبارىس پوپۋلياتسياسىنىڭ تابيعي-گەنەتيكالىق تۇرعىدان ءبىر-بىرىنە وتە جاقىن ەكەنىن ءجيى العا تارتادى. سوندىقتان ءبىر جاعىنان ىلە – بالقاش ايماعىندا تاريحي مەكەندى قايتا جاڭعىرتۋ جۇمىستارى جۇرسە, ەكىنشى جاعىنان, قاراعاندىدا امۋر جولبارىسىنىڭ جاڭا ۇرپاعىنىڭ ءوسىپ جەتىلۋى – ەلدەگى بيوالۋانتۇرلىلىكتى ساقتاۋ جولىنداعى ىزگى قادامداردىڭ ۇندەستىگى ىسپەتتى.
قاراعاندى وبلىسى
