جاقىندا چيليلىك ماريا ارگەنتينا ەسىمدى بيولوگيا ءپانىنىڭ مۇعالىمى اقان سەرىنىڭ «بالقاديشا» ءانىن ۇيرەنىپ, جۇرت اراسىندا ورىنداپ جۇرگەنىن ەستىدىك. ونىڭ ايتۋىنشا, ول قازاق ءانىن العاش رەت ءبىر دوسى ارقىلى ەستىپتى. «ول ماعان ديماش قۇدايبەرگەن تۋرالى ايتىپ بەردى. ونىڭ تاڭعاجايىپ داۋسىن تىڭداعانىمدا, ءوز قۇلاعىما ءوزىم سەنبەدىم. سول كۇننەن باستاپ ديماشتىڭ جانكۇيەرىنە اينالدىم دا, دومبىرا ۇيرەنۋدى باستادىم. وسىلايشا, قازاق مۋزىكاسىن تەرەڭىرەك زەرتتەدىم. سول كەزدە «Made in KZ» سياقتى تاماشا مۋزىكالىق توپتاردى, سونداي-اق روزا رىمباەۆا, باتىرحان شۇكەنوۆ سياقتى كوپتەگەن دارىندى ءانشىنى ءبىلدىم», دەيدى ول تەبىرەنىپ.
ۇلتىمىزدىڭ مۋزىكا ونەرىنە جان-تانىمەن عاشىق بولعان ول «وتان انا», «اتامەكەن», «مەنىڭ قازاقستانىم» سياقتى اسەم اندەردى ەستىپ, ءان ماتىندەرىنىڭ ماعىناسىن تۇسىنۋگە قۇلشىنىپتى.
«بۇل اندەر مەنىڭ جۇرەگىمدى بىردەن باۋراپ الدى. كوپ ۇزاماي ولاردى ءوزىم دە ايتقىم كەلەتىنىن ءتۇسىندىم. ءان ايتۋدى جانىم قالايدى. اسىرەسە باسقا تىلدەردە ورىنداعاندى ۇناتامىن. ال قازاق ءتىلى – ەرەكشە اۋەزدى ءتىل. سوندىقتان كۇن سايىن قازاق اندەرىن تىڭداپ, ماتىندەرىن جازىپ الىپ ءجۇرمىن. العاش ورىنداعان اندەرىم «سامالتاۋ» مەن «قاراتورعاي» بولدى. مەن فين, جاپون, يتاليا, پورتۋگال تىلدەرىندە دە ءان ايتا الامىن. دەگەنمەن قازاق اندەرى مۇلدە بولەك اسەر قالدىرادى. ويتكەنى ءاربىر ءاننىڭ شىنايى, تەرەڭ, وتە مۇڭلى تاريحى بارىن ءتۇسىندىم. كوپ جاعدايدا بۇل ءبىر حالىقتىڭ باسىنان وتكەن اۋىر تاعدىر تۋرالى سىر بولىپ ەسەپتەلەدى. سول سەبەپتى قازاق حالقىنىڭ تاريحىن, مادەنيەتىن, ءدىنىن دە زەرتتەي باستادىم. وسىلايشا, ولاردى مۇمكىندىگىنشە جاقسى تۇسىنگىم كەلدى».
ماريا ارگەنتينا قازاق اندەرىنە دەگەن قىزىعۋشىلىعى ديماشتان باستالعانىن ەرەكشە ماقتانىشپەن ايتادى. ونىڭ ەندىگى ماقساتى قازاق ءتىلىن ەركىن سويلەپ ۇيرەنۋ ەكەن.
