مارتەبەلى مەيماندى قارسى العان ءماجىلىس سپيكەرى ەۋرازيا ەكونوميكالىق وداعىنىڭ ءىس-شارالارىنا بەلسەنە قاتىسقانى ءۇشىن كۋبا ۆيتسە-پرەزيدەنتىنە العىسىن ءبىلدىردى. ەرلان قوشانوۆ قازاقستان مەن كۋبانىڭ ديپلوماتيالىق قارىم-قاتىناسىنا بيىل 34 جىل تولاتىنىن اتاپ ءوتتى. كۋبا – ەلىمىزدە ءوز ەلشىلىگىن اشقان جانە ديپلوماتيالىق وكىلدىگىن استاناعا كوشىرگەن العاشقى مەملەكەتتىڭ ءبىرى.
ءبىز ەكى ەل اراسىنداعى ءوزارا سەنىمگە نەگىزدەلگەن قارىم-قاتىناس پەن قولداۋدى جوعارى باعالايمىز. مەملەكەتتەرىمىزدىڭ باسشىلارى ءتۇرلى الاڭداردا بىرنەشە رەت كەزدەستى. ءبىزدىڭ پرەزيدەنتىمىز 1995 جىلى قازاقستاننىڭ سىرتقى ىستەر ءمينيسترى رەتىندە گاۆاناعا بارعانىنىڭ ۇلكەن سيمۆولدىق ءمانى بار. ال 2021 جىلى مەملەكەت باسشىسى رەتىندە كۋبادا قازاقستان ەلشىلىگىن اشۋ تۋرالى جارلىققا قول قويدى. بۇگىندە پرەزيدەنتتەر قاسىم-جومارت توقاەۆ پەن ميگەل دياس-كانەل سەنىمدى ديالوگتى جالعاستىرۋدا, دەدى ەرلان قوشانوۆ.
ءماجىلىس توراعاسىنىڭ ايتۋىنشا, ەكىجاقتى بايلانىستى نىعايتۋدا پارلامەنتارالىق ىنتىماقتاستىقتى دامىتۋدىڭ ماڭىزى زور. بۇل رەتتە قازاقستان-كۋبا دەپۋتاتتىق دوستىق توپتارى قۇرىلىپ, زاڭ شىعارۋ سالاسىندا تاجىريبە الماسۋدى كەڭەيتۋدىڭ, سونداي-اق پارلامەنتارالىق ۇيىمدار اياسىندا ىقپالداستىقتى كۇشەيتۋدىڭ جوسپارى ناقتىلانعان. كەزدەسۋدە ءماجىلىس سپيكەرى كۋبانىڭ ۇلتتىق حالىق بيلىگى اسسامبلەياسىنىڭ توراعاسىن قازاقستانعا رەسمي ساپارمەن كەلۋگە شاقىردى.
مەملەكەت باسشىسى كۋبا رەسپۋبليكاسىنىڭ ۆيتسە-پرەزيدەنتى سالۆادور ۆالدەس مەسامەن كەزدەستى
ەرلان قوشانوۆ كۋبا تاراپىنا ەلىمىزدە جۇرگىزىلىپ جاتقان ساياسي وزگەرىستەر تۋرالى مالىمەت بەردى. رەفەرەندۋمدا جاڭا حالىق كونستيتۋتسياسىنىڭ قابىلدانۋىنا ەرەكشە نازار اۋدارىلدى. ازاماتتاردىڭ جاڭا سۇرانىستارىن ەسكەرە وتىرىپ, ادىلەتتى جانە پروگرەسسيۆتى قازاقستان قۇرۋعا باعدارلانعان اتا زاڭ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسى بويىنشا بيلىكتىڭ بارلىق تارماعىن قايتا جاڭعىرتادى. سونىمەن قاتار كونستيتۋتسيالىق رەفورما ءبىر پالاتالى پارلامەنتكە – قۇرىلتايعا كوشۋدى, سونداي-اق ۆيتسە-پرەزيدەنت پەن قازاقستان حالىق كەڭەسى ينستيتۋتتارىن قۇرۋدى بەكىتتى.
ءوز كەزەگىندە سالۆادور ۆالدەس مەسا قوناقجايلىق تانىتقانى ءۇشىن ءماجىلىس توراعاسىنا العىس ءبىلدىردى. كۋبا ۆيتسە-پرەزيدەنتى ەۋرازيا ەكونوميكالىق فورۋمى جوعارى دەڭگەيدە ۇيىمداستىرىلعانىن جانە كەڭ اۋقىمدى وزەكتى ماسەلەلەردى تالقىلاۋعا مۇمكىندىك بەرگەن اتاپ ءوتتى. ول سونداي-اق بۇگىندە قازاقستاننىڭ دامۋ قارقىنى جوعارى, زاماناۋي ءارى سەرپىندى ىلگەرىلەپ كەلە جاتقان مەملەكەت رەتىندە ءوز ورنىن سەنىمدى تۇردە نىعايتىپ وتىرعانىن ايتتى. كۋبا ۆيتسە-پرەزيدەنتىنىڭ پىكىرىنشە, ەكى ەل اراسىندا سەرىكتەستىكتى ودان ءارى كەڭەيتۋدىڭ الەۋەتى زور.
كەزدەسۋ بارىسىندا تاراپتار ساۋدا, ينۆەستيتسيا, ءبىلىم بەرۋ, تۋريزم جانە سپورت سالالارىنداعى ىنتىماقتاستىق جايىن تالقىلادى. ەكى ەل حالىقتارىنىڭ مۇددەسى ءۇشىن شارتتىق-قۇقىقتىق بازانى دايەكتى تۇردە كەڭەيتۋ قاجەتتىگىنە ەرەكشە نازار اۋدارىلدى.
