«حيرۋرگيانىڭ وزەكتى ماسەلەلەرى» تاقىرىبىندا وتكەن پلەنۋمعا دەنساۋلىق ساقتاۋ ۆيتسە-ءمينيسترى تيمۋر مۇراتوۆ, اباي وبلىسىنىڭ اكىمى بەرىك ءۋالي, سونداي-اق وتاندىق جەتەكشى حيرۋرگتار مەن قازىرگى زامانعى مەديتسينا سالاسىنىڭ ساراپشىلارى قاتىستى.
«ەلىمىزدە جىل سايىن 250–300 مىڭنان استام حيرۋرگيالىق وپەراتسيا جاسالادى, ونىڭ ىشىندە جەكەمەنشىك كلينيكالارداعى وپەراتسيالار دا بار. بۇل رەتتە جوعارى تەحنولوگيالىق مەديتسينالىق كومەكتىڭ ۇلەسى ايتارلىقتاي ارتىپ كەلەدى. زاماناۋي از ءينۆازيۆتى تەحنولوگيالار, لاپاروسكوپيالىق جانە ەندوسكوپيالىق ەمدەۋ ادىستەرى ءساتتى ەنگىزىلۋدە, سونداي-اق كارديوحيرۋرگيا, نەيروحيرۋرگيا جانە ترانسپلانتولوگيا سالالارى بەلسەندى دامىپ كەلەدى», – دەدى مۇراتوۆ.
حيرۋرگيالىق بەيىندەگى كادرمەن قامتاماسىز ەتۋ 1666 ماماندى قۇرايدى. كادرلىق الەۋەتتى دامىتۋعا ەرەكشە كوڭىل بولىنۋدە. 2026 جىلى 400-دەن استام جاس دارىگەردى شىعارۋ جوسپارلانۋدا.
وسى باعىتتا قازاقستاننىڭ مەديتسينا ۋنيۆەرسيتەتتەرى مەن عىلىمي ورتالىقتارى ماماندار دايارلاۋدا حالىقارالىق ستاندارتتاردى بەلسەندى ەنگىزىپ, شەتەلدىك كلينيكالار جانە عىلىمي ۇيىمدارمەن ىنتىماقتاستىقتى كەڭەيتۋدە.
پلەنۋمنىڭ شەڭبەرىندە جالپى, ابدومينالدىق, تامىرلىق, توراكالدىق جانە شۇعىل حيرۋرگيانىڭ وزەكتى ماسەلەلەرى, زاماناۋي تەحنولوگيالاردى ەنگىزۋ, مەديتسينالىق كومەكتىڭ ساپاسىن ارتتىرۋ جانە وڭىرارالىق كاسىبي ىنتىماقتاستىقتى دامىتۋ ماسەلەلەرى كەڭىنەن تالقىلاندى.
دەنساۋلىق ساقتاۋ مينيسترلىگىنىڭ ماڭىزدى باعىتتارىنىڭ ءبىرى – وڭىرلەر مەن اۋىلدىق جەرلەردە مامانداندىرىلعان حيرۋرگيالىق كومەكتىڭ قولجەتىمدىلىگىن ارتتىرۋ بولىپ قالا بەرەدى.
