فوتو: baq.kz
ءتۇسۋ ەمتيحانىنا قاتىسۋعا تىركەلۋ ۇلتتىق تەستىلەۋ ورتالىعىنىڭ http://app.testcenter.kz/ سايتىندا جۇرگىزىلەدى. دوكتورانتۋراعا ءتۇسۋ ءۇشىن ءبىر جوعارى وقۋ ورنى مەن ءبىلىم باعدارلامالارىنىڭ ءبىر توبىن عانا تاڭداۋعا بولاتىنىن ەسكەرگەن ءجون.
ەگەر تالاپكەر بەرىلگەن وتىنىشكە (تەستىلەۋدى تاپسىرۋ قالاسى, ءبىلىم باعدارلامالارىنىڭ توبى, تەستىلەۋدى تاپسىرۋ ءتىلى) وزگەرىستەر ەنگىزۋ قاجەت بولعان جاعدايدا, وعان وتىنىشتەردى قابىلداۋ جۇيەسى جابىلعانعا دەيىن (3 تامىزعا دەيىن) ءوتىنىشتى وڭدەۋ نەمەسە جويۋ مۇمكىندىگى بەرىلەدى. تەستىلەۋدى وتكىزۋ ورنى مەن ۋاقىتى تۋرالى اقپارات ۇمىتكەردىڭ جەكە كابينەتىندە 9 تامىزدا قولجەتىمدى بولادى.
ءتۇسۋ ەمتيحانىنا اڭگىمەلەسۋ, ەسسە جازۋ جانە ءبىلىم باعدارلاماسى توبىنىڭ بەيىنى بويىنشا ەمتيحان كىرەدى. جالپى ءتۇسۋ ەمتيحانىنىڭ ەڭ جوعارى كورسەتكىشى – 100 بالل, ونىڭ ىشىندە اڭگىمەلەسۋ – 30 بالل, ەسسە – 20 بالل, بەيىنى بويىنشا ەمتيحان سۇراقتارى 50 بالدى قۇرايدى. ال مەملەكەتتىك ءبىلىم تاپسىرىسى بويىنشا كونكۋرسقا قاتىسۋ ءۇشىن جانە اقىلى نەگىزدە دوكتورانتۋراعا ءتۇسۋ ءۇشىن شەكتى بالل 75-ءتى قۇرايدى.
دوكتورانتۋراعا ءتۇسۋ ءۇشىن قازتەست جۇيەسى بويىنشا مەملەكەتتىك ءتىلدى جانە شەت ءتىلىن مەڭگەرگەنىن راستايتىن سەرتيفيكات ۇسىنۋ قاجەت. TOEFL ITP سەرتيفيكاتى بار تۇلعالار دوكتورانتۋراعا ءتۇسۋ ەمتيحانى باستالعانعا دەيىن اعىلشىن ءتىلىن بىلۋگە ارنالعان قوسىمشا تەستىلەۋدى تاپسىرادى.
اتاپ وتسەك, 2024 جىلى شەت ءتىلىن مەڭگەرگەنىن راستايتىن سەرتيفيكاتتاردىڭ شەكتى دەڭگەيلەرى B1-گە دەيىن تومەندەتىلدى جانە تىزىمگە TOEIC جانە Duolingo English Test سەرتيفيكاتتارى ەنگىزىلدى.
2024 جىلدان باستاپ ۇمىتكەرلەردىڭ بەيىنىمەن دوكتورلار باعدارلاماسى بويىنشا دوكتورانتۋراعا تۇسۋگە مۇمكىندىكتەرى بار. بۇل باعدارلاما ءۇشىن شەت ءتىلىن مەڭگەرگەنىن راستايتىن سەرتيفيكاتتىڭ بەلگىلى ءبىر دەڭگەيى تالاپ ەتىلمەيدى. سونداي-اق دوكتورلار باعدارلاماسى بويىنشا تالاپكەرلەر ەمتيحان بارىسىندا ەسسە جازبايدى.
ەڭ جوعارى كورسەتكىش – 80 بالل, ونىڭ ىشىندە اڭگىمەلەسۋگە – 25 بالل, كاسىپورىندار مەن ۇيىمداردىڭ ۇسىنىس حاتىنا (بولعان جاعدايدا) – 5 بالل جانە بەيىنى بويىنشا ەمتيحان سۇراقتارى 50 بالدى قۇرايدى. شەكتى بالل – كەمىندە 50 بالل.
