100 مىڭ تۇرعىندى تىرشىلىك نارىمەن قامتاماسىز ەتۋدى كوزدەيتىن نىسان قۇرىلىسى پارتيانىڭ 2023–2027 جىلدارعا ارنالعان سايلاۋالدى باعدارلاماسى اياسىندا جۇزەگە اسىرىلىپ جاتىر. جوبا ناۋرىزباي اۋدانى مەن الماتى وبلىسىنا قاراستى قاراساي اۋدانىنىڭ بىرقاتار ەلدى مەكەنىن ساپالى اۋىزسۋمەن قامتاماسىز ەتۋگە باعىتتالعان. جاۋاپتىلار قۇرىلىس جۇمىستارى بيىل قاراشا ايىندا اياقتالادى دەپ وتىر.
– ناۋرىزباي اۋدانى – الماتىعا جاڭادان قوسىلعان, قازىر بەلسەندى دامىپ جاتقان ءوڭىر. سونىمەن قاتار وعان ىرگەلەس جاتقان قاراساي اۋدانىنىڭ تۇرعىندارى دا وسى اۋماققا قاراي بەت بۇرىپ جاتىر. ينجەنەرلەردىڭ ايتۋىنشا, قۇرىلىس جۇمىستارىنىڭ 85%-ى اياقتالعان. نەگىزگى عيماراتتار تۇرعىزىلدى. ەگەر جوسپارلانعان مەرزىمدە اياقتالسا, جەلتوقسان ايىندا تۇرعىندار تازا سۋ تۇتىنۋعا مۇمكىندىك الادى, – دەدى دەپۋتات ا.سارىم.
سۋ ستانساسى ىسكە قوسىلعاننان كەيىن 70-80 تۇراقتى جۇمىس ورنى اشىلادى. ونىڭ ىشىندە سۋدىڭ ساپاسىن باقىلايتىن زەرتحانا دا بولادى. ءوز كەزەگىندە سەرگەي پونومارەۆ جوبانىڭ ساپاسىنا, بيۋدجەت قارجىسىنىڭ ءتيىمدى يگەرىلۋىنە جانە مەردىگەر جۇمىسىنا جەكە باقىلاۋ جۇرگىزىپ وتىرعانىن جەتكىزدى.
– سۋ تارتۋ ستانساسى تابيعاتى كوركەم اقساي شاتقالىندا ورنالاسقان. اقساي وزەنى – الماتىنىڭ ەڭ تازا سۋ كوزدەرىنىڭ ءبىرى. ءبىز تابيعي رەسۋرستاردى ساقتاۋ مەن ءتيىمدى پايدالانۋعا ۇلكەن ءمان بەرۋىمىز كەرەك. قازىر وزەن لايلانىپ تۇر. كوپ تۇرعىندار تومەنگى ايماقتاردا سۋمەن قامتىلماي وتىر. سەبەبى قولدانىستاعى جۇيەلەر جۇكتەمەگە توتەپ بەرە الماي تۇر. بىراق جاڭا سۋ تارتۋ ستانساسى ىسكە قوسىلعان سوڭ, بۇل تۇيتكىل تۇبەگەيلى شەشىلەدى, – دەدى ول.
ال ءماجىلىس دەپۋتاتى, «Amanat» پارتياسى فراكتسياسىنىڭ مۇشەسى باقتىقوجا ىزمۇحامبەتوۆ باتىس قازاقستان وبلىسىنداعى جاڭادان بوي كوتەرىپ جاتقان «اقجايىق» شاعىن اۋدانىنا بارىپ قايتتى. 50 مىڭ ادامعا ارنالعان ستراتەگيالىق ايماقتىڭ قۇرىلىسى – قارقىندى. بۇگىندە 8 كوپقاباتتى ءۇي قولدانىسقا بەرىلىپ, باسپانا كەزەگىندەگى ازاماتتار قونىستانعان. جالپى اۋماقتا 76 كوپپاتەرلى تۇرعىن ءۇي قۇرىلىسى جوسپارلانعان. قازىر مۇندا 150 ورىندىق وڭالتۋ مەديتسينالىق ورتالىعى, سۋ ايداۋ ستانسالارى سالىنىپ, ماگيسترالدى ينجەنەرلىك جەلىلەر, جىلۋ تراسسالارى مەن ىشكى جولدار تارتىلعان.
– اقجايىق – حالىق سانىنىڭ ارتۋى, قالالىق ينفراقۇرىلىمدى دامىتۋ جانە ءومىر ساپاسىن جاقسارتۋ ماقساتىندا بوي كوتەرىپ جاتقان اۋماق. مۇندا تەك ۇيلەر سالىپ قويماي, جاس وتباسىلار, ماماندار, كەزەكتە تۇرعان ازاماتتار ءۇشىن تولىققاندى ءومىر ءسۇرۋ ورتاسىن قالىپتاستىرۋىمىز قاجەت. ول ءۇشىن قۇرىلىس جۇمىستارى جوسپارلانعان قاعيداتقا ساي – ساياباقتار, مەكتەپتەر, ەمحانالار جانە قولجەتىمدى كولىكپەن قامتاماسىز ەتىلۋگە ءتيىس, – دەدى ب.ىزمۇحامبەتوۆ.
كەزدەسۋ بارىسىندا ول قازىرگى ۋاقىتتا ماجىلىستە جاڭا ساۋلەت-قۇرىلىس كودەكسى قارالىپ جاتقانىن اتاپ ءوتتى. جاڭا قۇجات قۇرىلىس ساپاسىن باقىلاۋدى كۇشەيتۋدى, انىقتالعان كەمشىلىكتەرگە جەدەل ارەكەت ەتۋدى جانە قۇرىلىس ماتەريالدارىنا قويىلاتىن تالاپتاردى ارتتىرۋدى كوزدەيدى.
قىزىلوردا قالاسىنىڭ سول جاعالاۋىندا ايماق تاريحىنداعى ەڭ اۋقىمدى سپورتتىق نىسانداردىڭ ءبىرى سالىنىپ جاتىر. جالپى قۇنى 20,9 ملرد تەڭگەنى قۇرايتىن نىساننىڭ قۇرىلىس جۇمىستارىمەن ءماجىلىس دەپۋتاتتارى, «Amanat» پارتياسى فراكتسياسىنىڭ مۇشەلەرى مۇرات ابەنوۆ, مارحابات جايىمبەتوۆ پەن مۇرات ەرگەشباەۆ تانىستى. حالىق قالاۋلىلارى جەرگىلىكتى فۋتبولشىلارمەن كەزدەسىپ, ۇسىنىس-پىكىرلەرىنە قۇلاق ءتۇردى.
«UEFA» تالاپتارىنا ساي سالىنىپ جاتقان جاڭا ستاديون جەرگىلىكتى بيۋدجەت ەسەبىنەن قارجىلاندىرىلىپ جاتىر. قازىرگى تاڭدا فۋتبول الاڭىن جابدىقتاۋ, ىشكى ارلەۋ جانە اۋماقتى اباتتاندىرۋ جۇمىستارى ءجۇرىپ جاتىر. جالپى سىيىمدىلىعى 11 مىڭ ورىنعا شاقتالعان.
– پرەزيدەنت بۋرابايدا وتكەن «ۇلتتىق قۇرىلتايدا» فۋتبولعا قاتىستى بىرقاتار تاپسىرما بەردى. قىزىلوردا وبلىسى سول تاپسىرمالاردىڭ نەگىزىندە العاش بولىپ «UEFA» كلاسسيفيكاتسياسى بويىنشا ءىىى ساناتتى, سونداي-اق حالىقارالىق ستاندارتتارعا تولىق سايكەس كەلەتىن جاڭا ستاديون قۇرىلىسىن باستاپ, قىركۇيەك ايىندا وتەتىن ۇلكەن ويىنعا دايىندىق ۇستىندە. وبلىستىق اكىمشىلىكتىڭ ۇستانىمىمەن «قايسار» فۋتبول كومانداسى العاش رەت لەگيونەرلەرسىز ويناپ, ءوزىمىزدىڭ سپورتشىلارعا قولداۋ كورسەتىپ وتىر. كوپشىلىك ويىن بولعاندىقتان فۋتبولدى ناسيحاتتاۋىمىز قاجەت. سوندا جاستاردىڭ ويىنعا دەگەن قىزىعۋشىلىعى ارتادى, – دەدى دەپۋتات م.ابەنوۆ.
