ءىرى ونەر ورتالىقتارىنان الىستا, شالعاي ءوڭىردىڭ اۋدان-اۋىلدارىندا ەلەۋسىز ءومىر ءسۇرىپ جۇرگەن جاستار قابىلەتى بولا تۇرا, وزدىگىنەن اۋقىمدى الاڭدارعا جولداما تاۋىپ, كاسىبي قولداۋدى سەزىنە بەرمەيدى. «جۇلدىزدى جول» جوباسى قالتارىستا جۇرگەن سول جاستاردى تاۋىپ, كوپكە تانىستىرىپ قانا قويماي, ساحنا تالاپ ەتەتىن ءبىلىم مەن قارىمدى سىڭىرە وتىرىپ, مۋزىكالىق الەۋەتىن دامىتۋدى كوزدەيدى. جاڭا ۇرپاقتىڭ ەڭ جارقىن وكىلدەرىن ءبىر الاڭعا بىرىكتىرۋدى ماقسات ەتكەن تەلەۆيزيالىق تالانت-شوۋ باعدارلاماسى ەڭ دارىندى جاستى ىرىكتەپ شىعارماق.
«جۇلدىزدى جولدىڭ» بۇعان دەيىنگى وسى تەكتەس مۋزىكالىق جوبالاردان باستى ەرەكشەلىگى – ونىڭ ءۇش ساناتتان تۇراتىنى. تەلەۆيزيالىق سايىس ۆوكال, كلاسسيكالىق اسپاپتار جانە حالىق اسپاپتارى بويىنشا سارالانادى. بۇكىل ەلىمىز بويىنشا digital-كاستينگ وتكىزىلىپ, ءۇش اپتا ىشىندە ۇيىمداستىرۋشىلار ەلدىڭ تۇكپىر-تۇكپىرىنەن 354 ءوتىنىم قابىلدادى. قاتىسۋشىلار ىشىندە مەكتەپ وقۋشىلارى, ستۋدەنتتەر, دارىندى جاس مۋزىكانتتار بار. جوباعا ۆوكال ساناتى بويىنشا 204 ءوتىنىم كەلىپ تۇسكەن. كلاسسيكالىق اسپاپتار بويىنشا – 81, ال حالىق اسپاپتارى باعىتىندا 69 ءوتىنىم تىركەلدى. ىرىكتەۋ كەزەڭىنىڭ ءوزى بىرنەشە ساتى بويىنشا جۇرگىزىلىپ, مامىر ايىندا قاتىسۋشىلار ونلاين تىڭداۋعا قاتىسىپ, ولاردىڭ ونەرىن سالانىڭ كاسىبي ماماندارى تىڭداپ, باعالادى. سىننان سۇرىنبەي, ءساتتى وتكەن قاتىسۋشىلار كەلەسى كەزەڭگە جىبەرىلدى. وسى قاتىسۋشىلاردىڭ اراسىنان ىرىكتەلىپ شىققان 48 ادام قازىر الماتىعا كەلىپ, شىعارماشىلىق لاگەردە دايىندىقتى باستاپ كەتتى», دەيدى جوبانىڭ كرەاتيۆتى پروديۋسەرى گۋلاحچا اكريەۆا.
ۇزدىكتەردى انىقتايتىن مۋزىكالىق بايقاۋدىڭ ءبىرىنشى كەزەڭىنە قاتىساتىن 48 ورىنداۋشىنىڭ ونەرىن قازىلار القاسى مۇقيات سارالاپ, ماڭىزدى شەشىمىن ايتادى. اۋىر دا بولسا, ءار كاتەگوريادان ءبىر قاتىسۋشىدان شىعارىلىپ, جەڭىس جولىنداعى جولىن جالعاستىرۋ ءۇشىن ءۇش قاتىسۋشى كەلەسى كەزەڭگە وتەدى.
«مىقتىلاردىڭ دۋەلى» اتالاتىن جوبانىڭ ەكىنشى كەزەڭىندە 36 ونەرپاز عانا قالادى. ءبىرى قۋانىپ, ءبىرى جابىرقاپ, ءتۇرلى كوڭىل كۇيدى باستان كەشە ءجۇرىپ, وسى كەزەڭگە جەتكەن قاتىسۋشىعا جۇكتەلەر جاۋاپكەرشىلىك پەن تالاپ تا قيىنداي تۇسەدى. ەندى ءار ساناتتاعى ءار ەپيزود سايىن ساحناعا 6 قاتىسۋشى شىعىپ, جۇپتاسىپ ونەر كورسەتەدى. ەكى ونەرپاز ورتاق شىعارمانى ورىنداۋ ارقىلى دەربەس دارىنىن كورسەتىپ قانا قويماي, ساحناداعى سەرىكتەسىمەن ۇيلەسىمدى ونەر كورسەتە الاتىنىن دالەلدەۋى كەرەك. ساحنادا ءوزىن سەنىمدى ۇستاۋ, شەبەرلىك, قازىلار القاسى مەن كورەرمەن جۇرەگىن جاۋلاي الۋ سەكىلدى تولىپ جاتقان تالاپتى ورىنداي العاندارى ەڭ باستى كەزەڭ – «كورەرمەن كوزايىمىنا» اينالۋ باقىتىنا باستايتىن اينالىمعا وتەدى. بۇل كەزەڭدە جوبادا ەڭ مىقتى, ەستە قالاتىن 18 ونەرپاز عانا قالادى. سوڭعى سايىستاعى شەشۋشى ءسات كورەرمەن داۋىسى ارقىلى باعالانادى. ال اقتىق مارەگە جەتكەن التى قاتىسۋشىنىڭ باعى الەۋمەتتىك جەلىدە داۋىس بەرەتىن كورەرمەن تالعامىنا تاۋەلدى بولماق. اقتىق سىن – گالا كونتسەرت تەلەارنانىڭ تىكەلەي ەفيرىندە ءوتىپ, شارىقتاۋ شەگىنە جەتكەن ونەر شايقاسىندا كورەرمەننىڭ سۇيىسپەنشىلىگىنە بولەنىپ, جەڭىسكە جەتكەن قاتىسۋشىنىڭ اتى-ءجونى جاريالانادى. وسىلايشا, كورەرمەندەر قاتىسۋشىنىڭ ونەردەگى العاشقى قادامىنان باستاپ ۇلكەن ساحناعا دەيىنگى جولىنا تىكەلەي كۋا بولادى.
جاڭا ماۋسىمنىڭ تەلەۆيزيالىق تۇساۋكەسەرى بيىل قازان ايىندا, كۇزگى تەلەماۋسىمعا جوسپارلانعان. جاس ارتىستەرمەن قانات وماروۆ, ابىلاي تىلەپبەرگەن جانە نۇرگۇل نۇعىمانوۆا سەكىلدى تانىمال ماماندار جۇمىس ىستەيدى. ولار ۇزدىكتەردى تاڭداۋعا كومەكتەسىپ, تالىمگەرلىك ەتەدى. ال جوبانىڭ جۇرگىزۋشىسى – بەلگىلى ەسترادا ءانشىسى ءالي وقاپوۆ. «جۇلدىزدى جول – 2025» – جاي عانا تەلەۆيزيالىق بايقاۋ ەمەس, بۇل – ۇرپاقتاردى ساباقتاستىراتىن, وڭىرلەردى بىرىكتىرەتىن مادەني قوزعالىس. ساحنادا جاڭا ەسىمدەردىڭ تانىلىپ, زاماناۋي اۋەن مەن قازاق مۋزىكاسىنىڭ جاڭا بۋىنىن قالىپتاستىرۋعا سەرپىن بەرەتىن كاسىبي مۇمكىندىك.
الماتى
