پوليتسيا دەپارتامەنتىنىڭ مالىمەتىنشە, كۇدىكتىنى ۇستاۋ ارنايى وپەراتسيا بارىسىندا جۇزەگە اسقان. ءىس-شاراعا قىلمىستىق پوليتسيا قىزمەتكەرلەرى, اۋداندىق ۇقك بولىمشەسى, پروكۋراتۋرا, ارنايى جاساق جانە 5510 اسكەري ءبولىمىنىڭ كينولوگى قاتىسقان.
كۇدىكتى قۇرىلىس الاڭىندا جۇمىس ورنىندا قولعا تۇسكەن. ول تىيىم سالىنعان زات سالىنعان ورامانى ساتىپ الۋشىعا تاپسىرعان ساتتە ۇستالدى. ساراپتاما ناتيجەسى ورام ىشىندەگى زاتتىڭ كەپتىرىلگەن ماريحۋانا ەكەنىن راستادى.
تۇرعىلىقتى مەكەنجاي بويىنشا جۇرگىزىلگەن ءتىنتۋ كەزىندە شارۋاشىلىق قۇرىلىس ىشىنەن بىرنەشە وراما تابىلىپ, تاركىلەنگەن. تاركىلەنگەن ماريحۋانانىڭ جالپى سالماعى 258,1 گراممدى قۇرايدى. بارلىق زاتتار ساراپتاماعا جىبەرىلىپ, ولاردىڭ ەسىرتكىلىك قاسيەتى راستالدى.
كۇدىكتى ءوز كىناسىن تولىق مويىندادى. وعان قاتىستى قىلمىستىق كودەكستىڭ 297-بابى 2-بولىگى بويىنشا (ەسىرتكى قۇرالدارىن ساتۋ ماقساتىندا زاڭسىز ساقتاۋ, تاسىمالداۋ نەمەسە وتكىزۋ) قىلمىستىق ءىس قوزعالدى. قازىرگى تاڭدا ول ۋاقىتشا ۇستاۋ يزولياتورىنا قامالدى.
