ەل قارجىسىنىڭ قايدا, قالاي جۇمسالعانىن باقىلاۋ – پارلامەنتتىڭ باستى مىندەتتەرىنىڭ ءبىرى. وسى ورايدا ءماجىلىس وتىرىسىندا قازاقستان ۇكىمەتىنىڭ جانە جوعارى اۋديتورلىق پالاتانىڭ 2024 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرى قارالدى.
دەپۋتاتتاردىڭ سىن-ەسكەرتپەلەرى مەن ۇسىنىستارى ايتىلعان بۇل قۇجاتتار پارلامەنتتىڭ جوعارعى پالاتاسىنا – سەناتقا جولداندى. سونىمەن قاتار قارجى جانە بيۋدجەت كوميتەتىنە ەسەپتەرگە قاتىستى قوسىمشا بايانداما ازىرلەۋ تاپسىرىلدى. بۇل قۇجاتتا ءماجىلىستىڭ تۇراقتى كوميتەتتەرىنىڭ قورىتىندىلارى مەن جالپى وتىرىس بارىسىندا كوتەرىلگەن پىكىرلەر ەسكەرىلەتىن بولادى.
ال پارلامەنت پالاتالارىنىڭ بىرلەسكەن وتىرىسىندا نەگىزگى باياندامامەن قاتار قوسىمشا مازمۇندى ءتۇسىندىرۋدى ءماجىلىس دەپۋتاتى ۇلاسبەك سادىبەكوۆ جۇرگىزەدى دەپ بەلگىلەندى.
ايتا كەتۋ كەرەك, رەسپۋبليكالىق بيۋدجەتتىڭ ورىندالۋىنا قاتىستى جىل سايىنعى ەسەپتەر – ەل قازىناسىنىڭ قانشالىقتى ءتيىمدى جانە ماقساتتى جۇمسالعانىن كورسەتەتىن ماڭىزدى قۇجاتتار. بۇل رەتتە دەپۋتاتتىق كورپۋستىڭ باقىلاۋ قىزمەتى مەن جاريالى تالقىلاۋ – مەملەكەتتىك قارجىنىڭ اشىقتىعى مەن ادىلەتتىلىگىن قامتاماسىز ەتۋدىڭ بىردەن-ءبىر جولى.
