تاراپتار كەيىنگى جىلدارى قازاقستان – ومان قاتىناستارىنىڭ بەلسەندى تۇردە دامىپ كەلە جاتقانىن اتاپ ءوتتى. سەرىك جۇمانعارين قازاقستان ومان سۇلتاندىعىن تاياۋ شىعىستاعى ماڭىزدى جانە سەنىمدى ارىپتەس رەتىندە قاراستىراتىنىن ەرەكشە اتاپ ءوتتى.
ومان قارجى ءمينيسترى ءوز كەزەگىندە ومان 1992 جىلى كاسپي قۇبىر كونسورتسيۋمىن (كقك) قۇرۋ جونىندەگى جوباعا قاتىسقان كەزدەن باستاپ تاۋەلسىز قازاقستان ەكونوميكاسىنداعى العاشقى ينۆەستوردىڭ ءبىرى بولعانىن ەسكە الدى. ول ءوز ەلىنىڭ ينۆەستيتسيالىق ىنتىماقتاستىقتى ودان ءارى دامىتۋعا مۇددەلى ەكەنىن ماقۇلداپ, سونداي-اق قازاقستاننان ينۆەستيتسيا قابىلداۋعا دايىن ەكەنىن ءبىلدىردى.
كەلىسسوزدە كولىك-لوگيستيكالىق ءوزارا ءىس-قيمىل ماسەلەسىنە ەرەكشە نازار اۋدارىلدى. وماننىڭ ستراتەگيالىق گەوگرافيالىق جاعدايىن, ونىڭ تاياۋ شىعىستاعى ءىرى لوگيستيكالىق حابقا اينالۋ جوسپارىن ەسكەرە وتىرىپ, قازاقستان تاراپى يران اۋماعى ارقىلى «قازاقستان – ومان» جاڭا حالىقارالىق كولىك ءدالىزىن قۇرۋ مۇمكىندىگىن قاراستىرۋدى ۇسىندى. باستامانى ەگجەي-تەگجەيلى پىسىقتاۋ ماقساتىندا قازاقستان, ومان جانە يران ساراپشىلارىنىڭ قاتىسۋىمەن ءۇش جاقتى جۇمىس توبى قۇرىلۋعا ءتيىس.
بۇدان باسقا, ترانزيتتىك تاسىمال كولەمىن ۇلعايتۋ جانە «سولتۇستىك – وڭتۇستىك» حالىقارالىق كولىك ءدالىزىنىڭ ينفراقۇرىلىمىن بىرلەسىپ دامىتۋ جۇمىسىنىڭ كەلەشەگى تالقىلاندى.
بۇگىندە وماننىڭ قازاقستان ەكونوميكاسىنا سالعان ينۆەستيتسياسىنىڭ جيىنتىق كولەمى – 253 ملن دوللار. بۇل رەتتە قوس تاراپ ەكىجاقتى ارىپتەستىكتىڭ بولاشاعى بۇل كورسەتكىشتەن ەداۋىر اسىپ تۇسەتىنىن اتاپ ءوتتى.
«ومان ينۆەستيتسيالىق بانكىنىڭ 500 ملن دوللار كولەمىندە قارجى سالاتىن بىرلەسكەن ينۆەستيتسيالىق قور قۇرۋ جونىندەگى باستاماسى ءبىزدىڭ زور قىزىعۋشىلىعىمىزدى تۋعىزدى. قازاقستان ۇكىمەتى سالىقتىق پرەفەرەنتسيالارعا, يندۋستريالىق ايماقتارعا قول جەتكىزۋمەن ينفراقۇرىلىمدىق قولداۋ كورسەتە وتىرىپ, جاڭا ينۆەستورلاردى تارتۋعا جاعداي جاساۋعا دايىن», دەپ اتاپ ءوتتى س.جۇمانعارين.
قازاقستان تاراپى دا ەنەرگەتيكا, تاۋ-كەن مەتاللۋرگيا ونەركاسىبى, اوك, فارماتسەۆتيكا مەن ساۋدا سياقتى كەلەشەگى زور سالالاردا ىنتىماقتاستىقتى ارتتىرۋعا مۇددەلى. ومان ءوز تاراپىنان لوگيستيكالىق ارىپتەستىككە دەگەن سەنىمى جوعارى ەكەنىن اتاپ كورسەتىپ, سۇلتاندىقتىڭ ينفراقۇرىلىمى ءىرى جۇك قابىلداۋعا جانە اۋىستىرىپ تيەۋگە تولىق دايىن ەكەنىن مالىمدەدى. قازاقستان استىعىن جەتكىزۋگە مۇقيات نازار اۋدارىلدى. ومان سۇلتاندىققا استىق جەتكىزۋگە قىزىعۋشىلىق ءبىلدىرىپ, تاياۋ شىعىستاعى استىق ەكسپورتىن تاراتۋ حابى بولۋعا دايىن ەكەنىن ءمالىم-دەدى.
كەزدەسۋ سوڭىندا تاراپتار باستامالاردى ساراپتامالىق دەڭگەيدە تالقىلاۋعا ۋاعدالاستى. تالقىلانعان سالالاردا شىن مانىندەگى ىنتىماقتاستىققا ءازىر ەكەنىن جەتكىزدى.
