ءىس-شارا مەملەكەت باسشىسى جاريالاعان تسيفرلاندىرۋ جانە جاساندى ينتەللەكت جىلى اياسىندا ۇيىمداستىرىلدى. «بولاشاق قۇقىعى» تاقىرىبىنداعى بايقاۋ ەلىمىزدەن بولەك, ازەربايجان, گەرمانيا, گرۋزيا, كانادا, قىرعىزستان, قىتاي, مالايزيا, وزبەكستان, رەسەي, رۋمىنيا, ءۇندىستان جانە شري-لانكا جوعارى وقۋ ورىندارىنىڭ 23 كومانداسىن بىرىكتىردى. جارىس بارىسىندا ستۋدەنتتەر جاڭا تەحنولوگيالاردىڭ زاڭ جۇيەسىنە, قۇقىق قاعيداتتارىنا, ەتيكا مەن ادام قۇقىقتارىنا اسەرىن زەرتتەدى.
«ەكى كۇنگە سوزىلعان International Legathon MaxUP سايىسىندا قاتىسۋشىلار قۇقىقتىڭ بولاشاعى بۇگىننەن باستاپ قالىپتاساتىنىن كورسەتتى. بۇل ولاردىڭ يدەيالارى, ۇسىنعان شەشىمدەرى جانە جاڭاشا ويلاۋ قابىلەتىنە بايلانىستى. قازىر ءبىز قۇقىق پەن تەحنولوگيا قاتار دامىپ جاتقان كەزەڭدە ءومىر ءسۇرىپ وتىرمىز. سوندىقتان بۇگىنگى تاڭدا تەك زاڭدى ءبىلۋ از, ونى جاڭا تالاپتارعا ساي ءتۇسىنىپ, بەيىمدەلە ءبىلۋ ماڭىزدى», دەدى MNU باسقارما توراعاسى تالعات نارىكباەۆ.
«Lex Fantastica» دەبات فورماتىنداعى بايقاۋدىڭ ءبىرىنشى كەزەڭى «استانا» حالىقارالىق قارجى ورتالىعىنىڭ سوتىندا ۇيىمداستىرىلدى. پىكىرسايىس بارىسىندا ستۋدەنتتەر مەتاعالامشارلاردىڭ مەنشىك يەلەرىنىڭ جاۋاپكەرشىلىگى مەن ونى ناقتى ءبىر مەملەكەتتەردىڭ بالاماسى رەتىندە قاراستىرۋ, ۆيرتۋالدى اكتيۆتەردى رەتتەۋ جانە ۆيرتۋالدى بولمىستىڭ مەنشىگىن قورعاۋ, سونداي-اق جاساندى ينتەللەكت سۋديادان باس تارتۋ مەن ۆيرتۋالدى شىندىقتا بولۋ ۋاقىتىن شەكتەۋدىڭ زاڭدىلىعى تۋرالى دالەلدەر كەلتىردى. جارىستىڭ فينالدىق كەزەڭى مەن گراند-فينال MNU-دا ءوتتى.
فينالعا قاتىسۋشىلار اۆتونومدى كولىكتى پايدالانۋ, سينتەتيكالىق كونتەنت جانە ەكونوميكاداعى جاساندى ينتەللەكتىنى رەتتەيتىن نورمالاردى ازىرلەۋ بويىنشا ءوز يدەيالارىن ۇسىندى. تورەشىلىكتىڭ بەيتاراپتىعىن ساقتاۋ ءۇشىن قاتىسۋشىلار ءسوز سويلەۋ بارىسىندا ءوز ەلى مەن ۋنيۆەرسيتەتىن تانىتقان جوق. كوماندالاردىڭ ۇسىنىستارىن ادىلەت, عىلىم جانە جوعارى ءبىلىم ۆيتسە-مينيسترلەرى, جوعارعى سوت سۋدياسى, جەتەكشى زاڭ فيرمالارىنىڭ سەرىكتەستەرى, حالىقارالىق كومپانيالارى, دامۋ ينستيتۋتتارى, سونداي-اق ديپلوماتيا جانە ءبىلىم بەرۋ سالالارىنىڭ وكىلدەرى باعالادى.
«MNU – جاساندى ينتەللەكتىنى زاڭداستىرۋدىڭ نورماتيۆتىك قۇقىقتىق شەڭبەرى تۋرالى ماسەلەنى كوتەرگەن العاشقى ۋنيۆەرسيتەت. ەڭ قىزىعى, بايقاۋعا ءتۇرلى ەلدەردەن وسى ماسەلەلەردى شەشەتىن كوماندالار كوپ جينالدى. ەلىمىزدە جاساندى ينتەللەكت تۋرالى زاڭ قابىلدانعانى بەلگىلى. وسىنداي ءىس-شارالار ەسەبىنەن ءبىز قازىرگى زاڭناماعا تاعى ءبىر رەت قاراپ, زاڭعا تاۋەلدى نورماتيۆتىك قۇقىقتىق اكتىلەردى پىسىقتاۋعا نەمەسە جەتىلدىرۋگە بولاتىن جاڭا نورمالاردى الا الامىز», دەدى عىلىم جانە جوعارى ءبىلىم ۆيتسە-ءمينيسترى دينارا ششەگلوۆا.
سايىس قورىتىندىسى بويىنشا ورىس ليگاسىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ (قازاقستان), Maqsut Narikbayev University (قازاقستان) جانە ۆ.ف. ياكوۆلەۆ اتىنداعى ورال مەملەكەتتىك زاڭ ۋنيۆەرسيتەتىنىڭ (رەسەي) كوماندالارى كوش باستادى, ال اعىلشىن ليگاسىندا ۇزدىك ناتيجەلەردى مالايا ۋنيۆەرسيتەتىنىڭ (مالايزيا), رۋمىن-امەريكان ۋنيۆەرسيتەتىنىڭ (رۋمىنيا) جانە ماكگيلل ۋنيۆەرسيتەتىنىڭ (كانادا) ستۋدەنتتەرى كورسەتتى. كونكۋرستىڭ جەڭىمپازى مالايزيانىڭ تۇڭعىش جانە ەڭ بەدەلدى جوعارى وقۋ ورنى – مالايا ۋنيۆەرسيتەتىنىڭ كومانداسى اتاندى.
«مۇنداي بايقاۋلار الەم جاستارىنا وتە ماڭىزدى. ۇسىنىلعان زاڭ سالاسىنداعى اقپاراتتار وتە قىزىق بولدى. باستاپقىدا بىزدە ونىڭ قانشالىقتى شىنايى ەكەنىنە سەنىم بولعان جوق, بىراق سپيكەرلەردىڭ سوزدەرىن تىڭداي وتىرىپ, قۇقىقتىق جۇيەگە جاساندى ينتەللەكت تەحنولوگيالارىن ەنگىزۋ كەزىندە بىزگە شىنىمەن دە جاڭا رەتتەۋ تەتىكتەرى قاجەت بولاتىنى تۋرالى ويلانا باستادىق. قازىر قۇقىقتىق جۇيەلەر كوپ جاعدايدا ارتتا قالىپ وتىر جانە جاس ۇرپاققا بولاشاق ءۇشىن يننوۆاتسيالىق شەشىمدەردى ۇسىنۋعا تۋرا كەلەدى», دەدى ماكگيلل ۋنيۆەرسيتەتىنىڭ (كانادا) ستۋدەنتى ەندريۋ تسزياسين چەن.
گارۆاردتى باعىندىرعان قاراكوز نەمەسە قازاقستان ءبىلىمىنىڭ جاڭا كەزەڭى
سايىستىڭ جالپى جۇلدە قورى بەس ميلليون تەڭگەدەن استى. بايقاۋ احقو سوتى, «Kazakhstan Bar Association» زاڭ كونسۋلتانتتار پالاتاسى جانە «Baker McKenzie» حالىقارالىق زاڭ فيرماسىنىڭ قولداۋىمەن ءوتتى. سونداي-اق كونكۋرسقا قازاقستاننىڭ دامۋ بانكى, «Unicase», «KP Disputes», «Turkenov Consulting» زاڭ فيرمالارى جانە ادۆوكات رەنا كەرىموۆا قولداۋ ءبىلدىردى.
