قايعىلى وقيعا 2026 جىلعى 23 اقپاندا بولعان. مارقۇمنىڭ قىزىنىڭ ايتۋىنشا, اكەسى كۇرەكتىڭ ۇشىمەن مويىن تۇسىنان اۋىر سوققى العان. سالدارىنان مويىن ومىرتقاسى سىنىپ, كوپ قان جوعالتقان.
ء«سىڭلىم وقيعا ورنىنا جەتكەن كەزدە اكەم ءالى ءتىرى ەدى. بىراق كۇدىكتى مەن ونىڭ تۋىستارى جەدەل جاردەم مەن پوليتسيا شاقىرۋدىڭ ورنىنا جارتى ساعات بويى «كەلىسەيىك» دەپ ۋاقىت سوزعان. ولار اكەمدى سۋىق جەردە جاتقىزىپ قويعان», دەيدى مارقۇمنىڭ قىزى.
ونىڭ سوزىنشە, كەيىن ەر ادام ۇزىناعاش اۋرۋحاناسىنا جەتكىزىلگەن. الايدا وندا كومپيۋتەرلىك توموگرافيا اپپاراتى بولماعاندىقتان, دارىگەرلەر تەك العاشقى كومەك كورسەتىپ, ناۋقاستى قالقامان اۋرۋحاناسىنا جەتكىزۋدى ۇسىنعان.
تۋىستارىنىڭ ايتۋىنشا, اۋىر جاراقات العان ازامات جولدا كوز جۇمعان.
مارقۇمنىڭ جاقىندارى ءىستىڭ «ابايسىزدا ولىمگە اكەلگەن اۋىر دەنە جاراقاتىن سالۋ» بابى بويىنشا تەرگەلۋىنە كەلىسپەيدى. ولار قىلمىستى نەعۇرلىم اۋىر باپپەن قايتا سارالاۋدى تالاپ ەتىپ وتىر.
ال الماتى وبلىسىنىڭ پوليتسيا دەپارتامەنتى بۇل دەرەك بويىنشا سوتقا دەيىنگى تەرگەۋ باستالعانىن حابارلادى. ۆەدومستۆو مالىمەتىنشە, كۇدىكتى جەدەل ىزدەستىرۋ شارالارى بارىسىندا ۇستالىپ, سوت سانكتسياسىمەن قاماۋعا الىنعان.
«تەرگەۋ بارىسىندا بارلىق قاجەتتى تەرگەۋ ارەكەتتەرى جۇرگىزىلدى. قىلمىستىق ءىس ماتەريالدارى قاداعالاۋشى ورگانمەن كەلىسىلىپ, ءمانى بويىنشا قاراۋ ءۇشىن سوتقا جولداندى», دەپ مالىمدەدى پوليتسيا.
الماتى وبلىستىق سوتى دا ءىستىڭ وندىرىسكە قابىلدانعانىن راستادى. سوڭعى شەشىمدى سوت شىعارادى.
ايتا كەتەيىك, شىمكەنتتە 23 جاستاعى قىز ۋاقىتشا ۇستاۋ يزولياتورىندا كوز جۇمدى.
شقو-دا جانتۇرشىگەرلىك جول اپاتى بولىپ, ءۇش جاس ازامات وقيعا ورنىندا قازا تاپتى.
