فوتو: مادەنيەت جانە اقپارات مينيسترلىگى
فورۋمنىڭ اشىلۋىندا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتى وقىلدى. قۇتتىقتاۋدا مادەنيەتتىڭ ۇلتتىق بىرەگەيلىكتى نىعايتۋداعى, كرەاتيۆتى يندۋستريانى دامىتۋداعى جانە سالا جۇمىسىنا يننوۆاتسيالىق تاسىلدەردى ەنگىزۋدىڭ ماڭىزى ەرەكشە ەكەنى اتاپ ءوتىلدى.
«مەملەكەت باسشىسى قاسىم-جومارت توقاەۆ اتاپ وتكەندەي, مادەنيەت – ۇلتتىڭ تولقۇجاتى. بۇگىندە مادەنيەت سالاسى تەك رۋحاني قۇندىلىقتاردى ساقتاۋشى عانا ەمەس, سونىمەن قاتار يننوۆاتسيالار مەن كرەاتيۆتى يندۋستريالاردىڭ قوزعاۋشى كۇشىنە اينالىپ وتىر. وسى رەتتە فورۋم باعدارلاماسىنىڭ تسيفرلىق تەحنولوگيالاردى, جاساندى ينتەللەكت قۇرالدارىن جانە زاماناۋي باسقارۋ تاسىلدەرىن مەڭگەرۋگە باعىتتالۋى – ۋاقىت تالابىنان تۋىنداعان ماڭىزدى قادام», دەلىنگەن قۇتتىقتاۋ حاتتا.
فورۋمنىڭ اشىلۋى بارىسىندا قىتاي, ءۇندىستان جانە گەرمانيادان كەلگەن حالىقارالىق ساراپشىلار دا ءسوز سويلەدى. ولاردىڭ قاتارىندا Jinbang (Henan) Cultural Tourism Development كومپانياسىنىڭ توراعاسى ميسس مين, Story Arts Foundation قورىنىڭ نەگىزىن قالاۋشى ديپا كيران, سونداي-اق live entertainment سالاسىنداعى حالىقارالىق پروديۋسەر ءارى كرەاتيۆتى جەتەكشى ارتەم باداليان بار.
سپيكەرلەر جوبالاردى جۇزەگە اسىرۋ, ستوريتەللينگتى دامىتۋ, كوپشىلىك الدىندا سويلەۋ جانە اۋقىمدى شوۋ باعدارلامالاردى ۇيىمداستىرۋدىڭ ماڭىزى تۋرالى ايتتى.
فورۋمنىڭ باستى ەرەكشەلىگى – ءداستۇرلى وقىتۋ ۇلگىسىنەن ناقتى جوبالار ازىرلەۋگە نەگىزدەلگەن تاجىريبەلىك فورماتقا كوشۋ.
مادەنيەت سالاسىنداعى مەملەكەتتىك ستيپەنديا سانى ەكى ەسە ارتادى
العاشقى كۇنى «مادەنيەت پەن بيزنەس: سەرىكتەستەر مەن برەندتەرگە قىزىقتى جوبالاردى قالاي جاساۋعا بولادى؟» تاقىرىبىندا پانەلدىك سەسسيا وتكىزىلدى. سونىمەن قاتار كىتاپحانا, ارحيۆ, مۋزەي ءىسى, مادەني-دەمالىس, تەاتر جانە كونتسەرت ۇيىمدارىنا ارنالعان جەكە سەكتسيالار ءوتىپ جاتىر. قاتىسۋشىلار ءۇشىن ءىس-شارالاردى تەحنيكالىق قامتاماسىز ەتۋ, ۆيزۋال تەحنولوگيالار, ستسەنوگرافيا جانە وزگە دە تاجىريبەلىك باعىتتار بويىنشا شەبەرلىك ساعاتتارى ۇيىمداستىرىلدى.
فورۋمنىڭ ەكىنشى كۇنى تاجىريبەلىك جۇمىسقا باسىمدىق بەرىلەدى. قاتىسۋشىلار زاماناۋي تسيفرلىق قۇرالدارمەن تانىسىپ, فاسيليتاتسيالىق سەسسيالار ارقىلى مادەني ۇيىمدارعا ارنالعان باستامالاردى ازىرلەيدى.
جيىننىڭ سوڭعى كۇنىندە كوماندالار ءوز جوبالارىن ساراپشىلارعا تانىستىرىپ, كەيىن وڭىرلەردە جۇزەگە اسىرىلاتىن ۇزدىك جوبالار انىقتالادى.
مەرەكەدە جۇمىس ىستەيتىن مادەنيەت قىزمەتكەرلەرىنە قوسىمشا اقى تولەۋ تالاپ ەتىلدى
