فوتو: اشىق دەرەككوز
ونىڭ ايتۋىنشا, قىلمىستىق كودەكستە پوليتسيا قىزمەتكەرلەرىنە قارسى جاسالعان ارەكەتتەر ءۇشىن جاۋاپكەرشىلىك قاراستىرىلعان. اتاپ ايتقاندا, 380-باپ «بيلىك وكىلىنە قاتىستى قورقىتۋ نەمەسە كۇش قولدانۋ ارەكەتتەرى».
«قوستانايدا 380-باپتىڭ 6-بولىگى بويىنشا ءۇش كۇدىكتى قاماۋعا الىندى. سونداي-اق اتىراۋ مەن وسكەمەن قالالارىندا دا كۇدىكتىلەر ۇستالدى. قوستانايداعى جاعدايعا كەلسەك, قىزمەتتەن تىس جۇرگەن پوليتسيا قىزمەتكەرى ەسكەرتۋ جاساعان كەزدە وعان شابۋىل جاسالعان. قىلمىسكەر ۇستالىپ, قازىرگى ۋاقىتتا تەرگەۋ جۇرگىزىلۋدە», دەدى سانجار ءادىلوۆ.
ونىڭ ايتۋىنشا, سوت سانكتسياسىمەن پوليتسيا قىزمەتكەرلەرىنە كۇش قولدانعان بارلىق تۇلعالار قىلمىستىق جاۋاپكەرشىلىككە تارتىلىپ, قاماۋعا الىنعان.
سەمەيدە ەر ادام پوليتسيانىڭ قىزمەتتىك كولىكتەرىن ورتەپ جىبەردى
سونداي-اق ول قۇقىق قورعاۋ ورگاندارىنا قارسى اگرەسسيانىڭ سەبەپتەرى تۋرالى سۇراققا جاۋاپ بەردى.
«قوعام پوليتسيا جۇمىسىنا وڭ كوزقاراس تانىتىپ وتىر, «زاڭ جانە ءتارتىپ» قاعيداتى تولىق قولداۋ تاپتى. بۇل باعىتتا قۇقىقبۇزۋشىلىقتاردىڭ الدىن الۋ جانە ولاردى اشۋ جۇمىستارى جۇرگىزىلىپ جاتىر. جالپى, ەلىمىزدە قۇقىقتىق مادەنيەت جوعارى دەڭگەيدە. الايدا جەكەلەگەن كۇش قولدانۋ جاعدايلارى ورىن الدى. بارلىق كۇدىكتىلەر جاۋاپكەرشىلىككە تارتىلىپ, تۇپكىلىكتى شەشىمدى سوت قابىلدايدى», دەدى ول.
ەسكە سالا كەتەيىك, 3 ساۋىردە اتىراۋ وبلىسىندا قىزمەتتىك مىندەتىن اتقارىپ جۇرگەن پوليتسيا قىزمەتكەرلەرىنە شابۋىل جاسالىپ, سالدارىنان ەكى قۇقىق قورعاۋشى زارداپ شەكتى.
بۇعان دەيىن قوستانايدا قوعامدىق ءتارتىپتى بۇزعانى ءۇشىن ەسكەرتۋ جاساعان پوليتسيا قىزمەتكەرىنە ماس كۇيدەگى بىرنەشە تۇرعىن شابۋىل جاساعانى حابارلانعان بولاتىن.
سونداي-اق وسكەمەندە پوليتسيا قىزمەتكەرى وزىنە تيەسىلى قارۋدان جاراقات الدى. پوليتسيا دەرەكتەرىنە سايكەس, ماس كۇيدەگى ەكى ەر ادام قۇقىق قورعاۋ قىزمەتكەرىنە قارسىلىق كورسەتكەن.
