فوتو: ۆلاديمير ترەتياكوۆ
«الماتىنىڭ كەز كەلگەن جەرىنەن تاۋلار كورىنىپ تۇرادى. بىراق سوعان قاراماستان, قالاداعى كوپتەگەن وتباسى ءۇشىن تاۋعا بارۋ ءالى دە قيىن. كوكتەم مەن كۇزدە جول باتپاققا اينالادى, قىستا ينفراقۇرىلىم بولماعاندىقتان قاراپايىم ادامدارعا تاۋعا شىعۋ قيىن. ناتيجەسىندە تۇرعىندار تاۋدىڭ تابيعاتىن تەك جازدىڭ بىرنەشە ايىندا عانا تاماشالاي الادى», دەيدى الماس چۋكين.
ونىڭ پىكىرىنشە, بالالاردىڭ تابيعاتتى ءسۇيۋى ءۇشىن تاۋعا ءجيى بارىپ, ونى ءوز كوزىمەن كورۋى ماڭىزدى. ەكونوميست جوبانىڭ وتباسى دەمالىسىنا باعىتتالعانىن اتاپ ءوتتى.
«جوباداعى تاسجولداردىڭ 70 پايىزى جاڭادان ۇيرەنۋشىلەر مەن بالالارعا ارنالعان. بۇل كاسىبي سپورتشىلارعا عانا ارنالعان ەليتالىق كۋرورت ەمەس. مۇندا اتا-انالار بالالارىن العاش رەت شاڭعى تەبۋگە نەمەسە تاۋ جولدارىمەن سەرۋەندەۋگە الىپ كەلە الادى», دەدى ول.
ەكونوميست قازىرگى تاڭدا شىمبۇلاق تاۋ كۋرورتىنىڭ باعاسى تىم قىمبات ەكەنىن ايتتى. ونىڭ سوزىنشە, جاڭا جوبا بۇل ماسەلەنى ازايتىپ, تاۋعا قولجەتىمدىلىكتى كەڭەيتەدى.
«جاڭا 3S اسپالى جولى ساعاتىنا 4500 ادامدى تاسىمالداي الادى. بۇل تاۋعا شىعاتىن قوعامدىق كولىك سەكىلدى بولادى. ادامدار مەدەۋگە اۆتوبۋسپەن, تاكسيمەن نەمەسە جەكە كولىكپەن وڭاي جەتە الادى. الماتى تۇرعىندارى ءۇشىن تاۋعا تۇراقتى تۇردە شىعۋعا مۇمكىندىك پايدا بولادى», دەدى الماس چۋكين.
ول سونداي-اق جوبا اياسىندا تاۋداعى ءتۋريزمنىڭ رەتتەلەتىنىن ايتىپ, ينفراقۇرىلىم تابيعاتتى ساقتاۋعا كومەكتەسەدى دەپ ەسەپتەيدى.
«قازىر ادامدار تاۋعا بەيبەرەكەت بارادى: قوقىس تاستايدى, رەتسىز سوقپاقتار پايدا بولادى. ال ينفراقۇرىلىم بولسا, تۋريستەر ارنايى باعىتتارمەن جۇرەدى, قوقىس جۇيەلى تۇردە شىعارىلادى, باقىلاۋ كۇشەيەدى. كانات جولدارى اۆتوكولىك سانىن ازايتىپ, ەكولوگياعا تۇسەتىن سالماقتى تومەندەتەدى», دەدى ەكونوميست.
الماس چۋكيننىڭ ايتۋىنشا, جوبا ىسكە اسسا, جىلىنا شامامەن ءبىر ميلليون تۋريست كەلۋى مۇمكىن. بۇل ەكونوميكاعا جىل سايىن 500 ميلليارد تەڭگەگە دەيىن تابىس اكەلەدى. سونىمەن قاتار 5 مىڭعا جۋىق جاڭا جۇمىس ورنى اشىلادى دەپ كۇتىلەدى.
«تاۋلار تەك الىستان قارايتىن كورىنىس ەمەس, ادامدار كۇندەلىكتى بارىپ دەمالاتىن ورىنعا اينالۋى كەرەك. بۇل جوبا بالالارعا, وتباسىلارعا جانە جالپى قالا تۇرعىندارىنا قاجەت», دەپ تۇيىندەدى ول.
