كورمەنىڭ اشىلۋىنا قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا, كورمە كوميسسارى ولگا ريگو, ريم قالاسىنداعى لەوناردو دا ۆينچي مۋزەيىنىڭ ديرەكتورى اۆگۋستو بيادجو, سونداي-اق ديپلوماتيالىق كورپۋس وكىلدەرى قاتىستى.
ايدا بالاەۆا ەكسپوزيتسيانىڭ حالىقارالىق مۋزەيلەر كۇنىندە وتكىزىلۋىنىڭ ايرىقشا ءمانى بار ەكەنىن اتاپ ءوتتى. بۇل كۇن الەمدىك مادەني مۇرانى ساقتاۋ, عىلىم مەن ونەردى دامىتۋ جانە مادەنيەتارالىق ديالوگتى نىعايتۋ يدەيالارى توڭىرەگىندە جۇرتشىلىقتى بىرىكتىرەدى. ۇكىمەت باسشىسىنىڭ ورىنباسارىنىڭ ايتۋىنشا, بۇگىندە قازاقستاندا 286 مۋزەي جۇمىس ىستەپ تۇر. ولاردىڭ قورىندا 4,5 ميلليوننان استام جادىگەر ساقتالعان. مۋزەيلەرگە جىل سايىن 6,5 ميلليوننان استام ادام كەلەدى.
سونىمەن قاتار ايدا بالاەۆا مۇنداي حالىقارالىق دەڭگەيدەگى كورمەلەر قازاقستانداعى مادەني ءتۋريزمنىڭ دامۋىنا تىڭ سەرپىن بەرەتىنىن اتاپ ءوتتى. وسىنداي جوبالار ازاماتتاردىڭ الەمدىك ونەر مەن عىلىم تاريحىنداعى ۇلى مۇرالارمەن ءوز ەلىمىزدە تانىسۋعا جول اشادى. سونىمەن قاتار ەلىمىزدىڭ حالىقارالىق مادەني كەڭىستىكتەگى بەدەلىن ارتتىرىپ, جاڭا ارىپتەستىك جوبالارعا نەگىز قالايدى.
«مەملەكەت باسشىسى قاسىم-جومارت كەمەل ۇلى توقاەۆ اتاپ وتكەندەي, تسيفرلىق تەحنولوگيالاردى ۋاقىت تالابىنا ساي يگەرگەن ەلدەر عانا وركەنيەت كوشىنەن قالمايدى. سوندىقتان قازاقستاندا يننوۆاتسيانى, كرەاتيۆتى يندۋستريانى, زاماناۋي مادەني جوبالاردى جانە جاڭا فورماتتاعى ونەر كەڭىستىكتەرىن دامىتۋعا ەرەكشە كوڭىل ءبولىنىپ كەلەدى. وسى تۇرعىدان العاندا, لەوناردو دا ۆينچي مۇراسى بۇگىنگى كۇنمەن دە تەرەڭ ۇندەسەدى. ول ءوز داۋىرىندە ونەردى, عىلىمدى, ينجەنەريانى, ساۋلەت پەن شىعارماشىلىق ويدى ءبىر ارناعا توعىستىرا بىلگەن ەرەكشە تۇلعا. ونىڭ ىزدەنىستەرى ادامزاتقا وي ەركىندىگىنىڭ, قيال قۋاتىنىڭ جانە جاڭاشىلدىققا ۇمتىلىستىڭ قانداي بيىك ناتيجەگە جەتكىزەتىنىن كورسەتتى», – دەدى پرەمەر-ءمينيستردىڭ ورىنباسارى.
بۇدان بولەك, ايدا بالاەۆا مادەني ىنتىماقتاستىقتى نىعايتۋعا جانە قازاقستان ونەرىن الەمدىك دەڭگەيدە ىلگەرىلەتۋگە باعىتتالعان ءىرى حالىقارالىق كورمە جوبالارىن ىسكە اسىرۋ بويىنشا اتقارىلىپ جاتقان جۇمىستارعا توقتالدى. اتاپ ايتقاندا, 2024 جىلى قازاقستاندا لەوناردو دا ءۆينچيدىڭ قۇپياعا تولى بىرەگەي تۋىندىلارىنىڭ ءبىرى – «ادەمى حانشايىم» /La Bella Principessa/ كارتيناسى كوپشىلىك نازارىنا ۇسىنىلدى. سونىمەن قاتار پاريجدەگى گيمە ازيا ونەر مۋزەيىندە «قازاقستان: ۇلى دالا جاۋھارلارى» كورمەسى, قىتايدىڭ تيانتسزين قالاسىندا «التىن ادام جانە ۇلى دالا» حالىقارالىق كورمەسى ۇيىمداستىرىلدى. ماسكەۋدەگى ترەتياكوۆ گالەرەياسىندا وتكەن «قازاقستان ونەرىنىڭ جاۋھارلارى» كورمەسى دە كورەرمەندەر تاراپىنان جوعارى باعالاندى. سونداي-اق, قازاقستان 61-ءشى ۆەنەتسيا بيەننالەسىندە ۇلتتىق پاۆيلونىن تانىستىردى. ال بيىل كۇزدە الماتىدا «حح عاسىرداعى ورىس ونەرىنىڭ 30 جاۋھارى» كورمەسىن اشۋ جوسپارلانىپ وتىر.
ايتا كەتەيىك, استاناعا ريم مەن فلورەنتسيا مۋزەيلەرىنەن لەوناردو دا ءۆينچيدىڭ ايگىلى «ۆينچي كودەكستەرىندەگى» سىزبالارى مەن جازبالارى نەگىزىندە قالپىنا كەلتىرىلگەن 40-تان استام تولىق ولشەمدى مەحانيزم مودەلى جەتكىزىلدى. ەكسپوناتتار قاتارىندا ۇشۋ اپپاراتتارى, ينجەنەرلىك قۇرىلىمدار, اسكەري ماشينالار مەن ءوز داۋىرىنەن الدەقايدا وزىق يدەيالارعا نەگىزدەلگەن قۇرىلعىلار بار. كەيىن بۇل يدەيالاردىڭ بىرقاتارى زاماناۋي تەحنولوگيالاردىڭ باستاۋىنا اينالدى.
«بۇگىندە استانا ءىرى مادەني جانە مۋلتيمەديالىق جوبالار وتەتىن ماڭىزدى حالىقارالىق الاڭعا اينالىپ كەلەدى. بۇل – دامۋ, تەحنولوگيا جانە العا ۇمتىلىسپەن اسسوتسياتسيالاناتىن زاماناۋي قالا. سوندىقتان ءدال وسى جەردە ءوز زامانىنان بىرنەشە عاسىر وزىق تۇرعان لەوناردو دا ۆينچي تۋرالى ايتۋ ەرەكشە سيمۆولدىق مانگە يە. كورمە استانا تۇرعىندارى مەن قوناقتارى ءۇشىن ماڭىزدى مادەني وقيعا بولاتىنىنا سەنىمدىمىن», – دەدى ولگا ريگو.
ەكسپوزيتسيا شامامەن 3 مىڭ شارشى مەتر اۋماققا ورنالاستىرىلعان. كورمە كەڭىستىگى اۋا, سۋ, جەر جانە وت تاقىرىپتارىنا ارنالعان بىرنەشە ايماققا بولىنگەن. مۇنداي قۇرىلىم لەوناردو دا ءۆينچيدىڭ تابيعات كۇشتەرىن, قوزعالىستى, ادام دەنەسىنىڭ قۇرىلىمىن جانە مەحانيكا قاعيداتتارىن قالاي زەرتتەگەنىن, ءوز باقىلاۋلارىن ينجەنەرلىك شەشىمدەر مەن ونەرتابىستارعا قالاي اينالدىرعانىن تەرەڭىرەك تۇسىنۋگە مۇمكىندىك بەرەدى.
ءا.قاستەەۆ مۋزەيىنە ءبىر تۇندە 15 مىڭنان استام ادام باردى
كورمەنىڭ جەكە ءبولىمى سۋرەتشىنىڭ ەڭ تانىمال تۋىندىلارىنىڭ رەپرودۋكتسيالارىنا ارنالعان. ەكسپوزيتسيا مۋلتيمەديالىق فورماتتا بەزەندىرىلگەن. LED-تۋننەلدەر, تسيفرلىق پروەكتسيالار مەن گولوگرافيالىق ينستاللياتسيالار لەوناردو دا ءۆينچيدىڭ يدەيالارىن كورنەكى تۇردە تانىستىرىپ, ونىڭ ونەرتابىستارى قالاي جۇمىس ىستەۋى مۇمكىن ەكەنىن اسەرلى فورماتتا كورسەتەدى.
كورمە قازاقستان رەسپۋبليكاسى مادەنيەت جانە اقپارات مينيسترلىگى مەن استانا قالاسى اكىمدىگىنىڭ قولداۋىمەن وتەدى. ۇيىمداستىرۋشى – «استانا كونتسەرت» كومپانياسى.
ەكسپوزيتسيا كەلۋشىلەر ءۇشىن 2026 جىلعى 19 مامىردان 30 قىركۇيەككە دەيىن كۇن سايىن, دەمالىسسىز, ساعات 10:00-دەن 20:00-گە دەيىن اشىق بولادى.
مەكەنجايى: استانا قالاسى, تاۋەلسىزدىك داڭعىلى, 57.
