فوتو: اشىق دەرەككوز
ۇلتتىق ەكونوميكا ءمينيسترىنىڭ ايتۋىنشا, ءىجو-ءنىڭ حالىق تابىسىنا اسەرى بىردەن بايقالمايدى. ازىرەسە, شيكىزات ەسەبىنەن قالىپتاساتىن سالالاردا بۇل پروتسەسس ۇزاققا سوزىلادى.
«مۇنداعى باستى ماسەلە ەكونوميكانىڭ قۇرىلىمىنا بايلانىستى. ەگەر ەكونوميكالىق ءوسىم كاپيتالدى كوپ قاجەت ەتەتىن نەمەسە شيكىزات سالالارى ەسەبىنەن قالىپتاسسا, ونىڭ حالىق تابىسىنا ىقپالى ۋاقىت وتە كەلە (بەلگىلى ءبىر كەزەڭنەن كەيىن) عانا بايقالادى. ال قۇرىلىس, قىزمەت كورسەتۋ, اۋىل شارۋاشىلىعى سياقتى ەڭبەك رەسۋرستارىنا نەگىزدەلگەن سالالار دامىعان تۇستا, بۇل اسەر حالىققا الدەقايدا جىلدام سەزىلەدى», دەدى س.جۇمانعارين.
مينيستر تاعى ءبىر سەبەپ رەتىندە ەكونوميكاداعى تۇتىنۋ دەڭگەيى تاۋارلار مەن قىزمەتتەر ۇسىنىسىنا قاراعاندا جىلدامىراق ءوسىپ جاتقاندىعىن اتاپ ءوتتى. ياعني, ءوندىرىس كولەمى حالىق سۇرانىسىنا ۇنەمى ىلەسە بەرمەيدى.
«باسقاشا ايتقاندا, ءوندىرىس كولەمى سۇرانىستىڭ ارتۋ قارقىنىنا ءاردايىم ىلەسە بەرمەيدى, بۇل باعاعا قوسىمشا قىسىم تۋدىرادى. بەلگىلى ءبىر دەڭگەيدە بۇل – ءوسىپ كەلە جاتقان ەكونوميكا ءۇشىن تابيعي قۇبىلىس, ويتكەنى قىسقا مەرزىم ىشىندە ءوندىرىس كولەمىن كۇرت ارتتىرۋ مۇمكىن ەمەس», دەدى مينيستر.
سەرىك جۇمانعارين تاعى ءبىر مىسال رەتىندە «ورتا تابىس تۇزاعىن» اتادى. بۇل دەگەنىمىز ەل بەلگىلى ءبىر دەڭگەيگە دەيىن داميدى, بىراق ودان ءارى تەز سەكىرىپ وتە المايدى. سەبەبى بۇرىن كومەكتەسكەن مۇناي سەكىلدى سالالار السىرەي باستايدى, ال جاڭا باعىتتار ءالى تولىق دامىپ ۇلگەرمەيدى. سونىمەن قاتار مينيستر سىرتقى فاكتورلاردىڭ اسەرىن دە ەسكەرگەن ءجون ەكەندىگىن اتاپ ءوتتى.
ەسكە سالا كەتەيىك, بۇعان دەيىن سەرىك جۇمانعارين مۇناي ءوندىرىسى اقساماعاندا, ءىجو ءوسىمى 6%-دان اساتىندىعىن اتاپ وتكەن ەدى.
