وبلىستىق فيلارمونيا ارتىستەرى كونتسەرتتى باكىر تاجىباەۆتىڭ سوزىنە جازىلعان تۇرىم الاكوزوۆتىڭ ء«اليا» رەكۆيەمىمەن اشتى. ودان كەيىن احمەت جۇبانوۆتىڭ حورعا لايىقتالعان «قارلىعاش», «اق شولپان», عازيزا جۇبانوۆانىڭ ءابۋ سارسەنباەۆتىڭ سوزىنە جازىلعان «جالعىز ەمەن», «داۋىل», «جەڭەشە» اندەرىمەن جالعاستى.
كەشتە احمەت قۋان ۇلى مەن عازيزا احمەتقىزىنىڭ شىعارمالارىنان وزگە قازاقستاندىق كومپوزيتورلاردىڭ تۋىندىلارى دا ورىندالدى. كوپشىلىك اقتوبە وبلىسى ونەر سالاسىنىڭ ۇزدىگى سەرىك جۇباتقاننىڭ ورىنداۋىنداعى اقان سەرىنىڭ «ماڭماڭگەرىن», جامبىل اتىنداعى قازاق مەملەكەتتىك اكادەميالىق فيلارمونياسى باقىتجان بايقاداموۆ اتىنداعى مەملەكەتتىك حور كاپەللاسىنى ءسوليستى نازەركە ابرالى شىرقاعان ءشامشى قالداياقوۆتىڭ اندەرىن جىلى قابىلدادى.
«بۇگىنگى كونتسەرت – ءبىزدىڭ فيلارمونيا مەن وڭىرلىك مادەنيەت مەكەمەلەرى اراسىنداعى ارىپتەستىكتىڭ ايقىن كورىنىسى. مۇنداي جوبالار بىرلەسكەن شىعارماشىلىق باستامالاردى جۇزەگە اسىرۋعا عانا ەمەس, كاسىبي تۇرعىدا تاجىريبە الماسۋ ءۇشىن دە كەرەك», دەيدى جامبىل اتىنداعى قازاق مەملەكەتتىك اكادەميالىق فيلارمونياسىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى نۇرعيسا داۋەشوۆ.
عازيزا جۇبانوۆا اتىنداعى اقتوبە وبلىستىق فيلارمونياسى قازاق كامەرالىق حورىنىڭ كوركەمدىك جەتەكشىسى, ديريجەر مەربول قۇسپانوۆتىڭ ايتۋىنشا, جوبا كلاسسيكالىق مۇرانى ساقتاۋعا عانا ەمەس, حور ونەرىن وسكەلەڭ ۇرپاق پەن جاستاردىڭ اكادەميالىق مۋزىكا مەن ۇلتتىق مادەني مۇراعا قىزىعۋشىلىقتارىن ارتتىرا تۇسۋگە باعىتتالعان.
«الماتى قالاسىنىڭ كورەرمەندەرىنە قازاق حور ونەرىنىڭ ۇزدىك ۇلگىلەرىن ۇسىنىپ, احمەت جۇبانوۆتىڭ قازاقتىڭ كاسىبي مۋزىكالىق مادەنيەتىنە قوسقان جاۋھارلارىن تاعى ءبىر مارتە كورسەتۋ ءبىز ءۇشىن ۇلكەن مارتەبە», دەدى اقتوبە وبلىستىق فيلارمونياسىنىڭ ديرەكتورى دينا نيازوۆا.
كونتسەرت جوعارى ورىنداۋشىلىق شەبەرلىگىمەن, كوركەمدىك مانەرلىلىگىمەن جانە ايقىن ۇلتتىق ناقىشىمەن ەرەكشەلەندى.
الماتى
