ينستيتۋت-فيليالدا قىتاي ازاماتتارى حيميا جانە بيولوگيا باعىتتارى بويىنشا ءبىلىم الادى. وقۋ باعدارلاماسى تولىقتاي ەۇۋ ستاندارتتارىنا نەگىزدەلگەن. جوبانىڭ باستى ارتىقشىلىعى – تۇلەكتەرگە ەكى جوعارى وقۋ ورنىنىڭ ديپلومى بىردەي تابىستالادى. ينستيتۋت ءۇشىن ناننين پەداگوگيكالىق ۋنيۆەرسيتەتى بازاسىندا وقۋ ۇدەرىسىن جوعارى دەڭگەيدە ۇيىمداستىرۋدى قامتاماسىز ەتەتىن زاماناۋي تەحنيكالىق قۇرالدارمەن جابدىقتالعان جەكە عيمارات بولىنگەن.
ينستيتۋتتىڭ اشىلۋى حالىقارالىق اكادەميالىق ىنتىماقتاستىقتى دامىتۋعا, جوعارى بىلىكتى ماماندار دايارلاۋعا, سونداي-اق قازاقستان مەن قىتاي اراسىنداعى عىلىمي-ءبىلىم بەرۋ بايلانىستارىن كەڭەيتۋگە باعىتتالعان.
اشىلۋ سالتاناتىنا ل.ن. گۋميلەۆ اتىنداعى ەۇۋ باسقارما توراعاسى – رەكتورى ەرلان سىدىقوۆ, ناننين پەداگوگيكالىق ۋنيۆەرسيتەتىنىڭ پرەزيدەنتى لۋن گۋانتسين, اتالعان ۋنيۆەرسيتەتتىڭ پارتيا كوميتەتىنىڭ حاتشىسى چجان پەن, سونداي-اق ەكى جوعارى وقۋ ورنىنىڭ وكىلدەرى قاتىستى.
«قازاقستان پرەزيدەنتى قاسىم-جومارت توقاەۆ اتاپ وتكەندەي, قىتاي – قازاقستاننىڭ سەنىمدى كورشىسى, جاقىن دوسى جانە ماڭگى ستراتەگيالىق ارىپتەسى. ءبىز بۇل جوبانى تەك اكادەميالىق بايلانىستاردى كەڭەيتۋ قۇرالى رەتىندە عانا ەمەس, سونىمەن قاتار ۋنيۆەرسيتەتتىڭ باسەكەگە قابىلەتتىلىگىن ارتتىرۋدىڭ جانە قازاقستاندىق ءبىلىمدى حالىقارالىق دەڭگەيدە ىلگەرىلەتۋدىڭ ماڭىزدى تەتىگى رەتىندە قاراستىرامىز.
جوبانىڭ تاريحى 2022 جىلدان باستالادى. جۇرگىزىلگەن جۇمىستاردىڭ ناتيجەسىندە 2023-2024 جىلدارى تاراپتار اراسىندا ىنتىماقتاستىق تۋرالى قۇجاتتارعا قول قويىلىپ, بىرلەسكەن ينستيتۋت قۇرۋ تۋرالى كەلىسىمگە قول جەتكىزىلدى.بۇل جوبا تەك ءبىزدىڭ ۋنيۆەرسيتەت ءۇشىن عانا ەمەس, جالپى قازاقستان ءۇشىن دە جاڭا قادام بولىپ تابىلادى جانە ونى ەڭ پەرسپەكتيۆالى حالىقارالىق جوبالاردىڭ ءبىرى دەپ اتاۋعا بولادى. بۇل جاڭا كەزەڭ قازاقستان مەن قىتاي اراسىنداعى عىلىمي-ءبىلىم بەرۋ بايلانىستارىن نىعايتىپ, ماماندار دايارلاۋعا جاڭا مۇمكىندىكتەر اشادى دەپ سەنەمىن», دەدى ەۇۋ رەكتورى ەرلان سىدىقوۆ.
ەۇۋ رەكتورى الداعى ۋاقىتتا ءبىلىم بەرۋ باعدارلامالارىنىڭ تىزبەسىن كەڭەيتۋ جانە ستۋدەنتتەر سانىن ارتتىرۋ جوسپارلانىپ وتىرعانىن دا اتاپ ءوتتى.
س. سەيفۋللين اتىنداعى ۋنيۆەرسيتەت العاش رەت QS WUR by Subject 2026 رەيتينگىنە ەندى
ناننين پەداگوگيكالىق ۋنيۆەرسيتەتىنىڭ پارتيا كوميتەتىنىڭ حاتشىسى چجان پەننىڭ ايتۋىنشا, ەۋرازيالىق عىلىم جانە تەحنولوگيالار مەكتەبى – قىتاي حالىق رەسپۋبليكاسىنىڭ ءبىلىم مينيسترلىگى ماقۇلداعان ناننين پەداگوگيكالىق ۋنيۆەرسيتەتىنىڭ العاشقى بىرلەسكەن ءبىلىم بەرۋ مەكەمەسى جانە قىتاي مەن قازاقستان اراسىنداعى العاشقى بىرلەسكەن وقۋ ورنى.
«بىرلەسكەن ينستيتۋتتىڭ اشىلۋى ناننين پەداگوگيكالىق ۋنيۆەرسيتەتىنىڭ ينتەرناتسيونالدانۋىنىڭ جاڭا كەزەڭىن بىلدىرەدى. بۇل تەك تاجىريبەلىك قادام عانا ەمەس, سونىمەن قاتار قىتاي مەن قازاقستان اراسىنداعى ءبىلىم بەرۋ الماسۋلارىن تەرەڭدەتۋ, وركەنيەتتەردىڭ ءوزارا تۇسىنىستىگىن ارتتىرۋ جانە ء«بىر بەلدەۋ – ءبىر جول» باستاماسىن جۇزەگە اسىرۋعا باعىتتالعان ناقتى ءىس-شارا», دەدى سپيكەر.
