انا مەن بالا دەنساۋلىعىن قورعاۋ سالاسىنداعى مەديتسينالىق كومەكتى جەتىلدىرۋگە, مەديتسينا قىزمەتكەرلەرىنىڭ بىلىكتىلىگىن ارتتىرۋعا جانە ەمىزۋدى قولداۋدىڭ حالىقارالىق ستاندارتتارىن ەنگىزۋگە ەرەكشە كوڭىل بولىنەدى.
«انا سۇتىمەن قورەكتەندىرۋ — نارەستەنى تاماقتاندىرۋدىڭ تابيعي ءتاسىلى عانا ەمەس, سونىمەن قاتار ونىڭ دەنساۋلىعى مەن تولىققاندى دامۋىنىڭ ماڭىزدى نەگىزى. انا سۇتىمەن قورەكتەندىرۋ ينفەكتسيالىق اۋرۋلار قاۋپىن تومەندەتەدى, يممۋنيتەتتى كۇشەيتەدى جانە انا مەن بالانىڭ اراسىنداعى تىعىز بايلانىستى قالىپتاستىرادى. انا سۇتىمەن قورەكتەندىرۋدى قولداۋ — تەك مەديتسينا جۇيەسى دەڭگەىندە عانا ەمەس, بۇكىل دەنساۋلىق ساقتاۋ سالاسىنداعى مەملەكەتتىك ساياساتتىڭ دا باسىم باعىتى», — دەدى قر دەنساۋلىق ساقتاۋ ءمينيسترى اقمارال ءالنازاروۆا.
باعدارلاما جۇكتىلىك جانە ەرتە شاقتاعى بالالارعا كومەك كورسەتەتىن 400 مەديتسينا قىزمەتكەرى — دارىگەرلەر, اكۋشەرلەر مەن مەيىرگەرلەر ارنايى وقۋدان وتەدى. وقۋ استانا مەديتسينا ۋنيۆەرسيتەتىنىڭ نەوناتولوگيا كافەدراسىنىڭ بازاسىندا وتكىزىلىپ, ەلىمىزدىڭ تۇكپىر-تۇكپىرىنەن مامانداردى قامتيدى.
«انا مەن بالا دەنساۋلىعىن جاقسارتۋ — بۇل ادام قۇقىقتارىنا نەگىزدەلگەن جانە دەنساۋلىق ساقتاۋ قىزمەتتەرىمەن جالپى قامتۋدى العا جىلجىتۋعا تىعىز بايلانىستى ددۇ-نىڭ باستى باسىمدىقتارىنىڭ ءبىرى. ددۇ ايەلدەردىڭ قۇندىلىقتارى مەن تاڭداۋلارى كومەك كورسەتۋ ۇدەرىسىنىڭ نەگىزىندە تۇراتىن دەنساۋلىق ساقتاۋ جۇيەسىن جوسپارلاۋدى قولدايدى. ايەلدەردىڭ, وتباسىلاردىڭ, قوعامداستىقتار مەن مەديتسينا قىزمەتكەرلەرىنىڭ شىنايى قاتىسۋى مەن قۇقىقتارىن كەڭەيتۋ — مەديتسينالىق كومەكتىڭ ساپاسىن ارتتىرۋعا باعىتتالعان باستامالاردىڭ تابىستى بولۋىنىڭ ماڭىزدى شارتى», — دەدى ددۇ-نىڭ قازاقستانداعى ەلدىك ءوفيسىنىڭ باسشىسى سكەندەر سىلا.
سونىمەن قاتار, 50 مەديتسينالىق ۇيىم «بالاعا مەيىرىمدى اۋرۋحانا» حالىقارالىق مارتەبەسىنە سايكەستىگى تۇرعىسىنان تەكسەرۋدەن وتەدى.
