فوتو: اشىق دەرەككوز
اۋقىمدى شاراعا الماتى, استانا, شىمكەنت قالالارى مەن باسقا دا وبلىستاردان مەملەكەتتىك مەكەمەلەردىڭ وكىلدەرى, ۇكىمەتتىك ەمەس ۇيىمدار, ساراپشىلار جانە بەلسەندى ازاماتتار جينالدى. فورۋمنىڭ باستى ماقساتى – مەملەكەتتىك قۇرىلىمدار مەن ازاماتتىق سەكتور اراسىنداعى ارىپتەستىكتىڭ زاماناۋي تاسىلدەرىن زەردەلەپ, وڭىرلىك دامۋعا قاتىستى وزەكتى ماسەلەلەردى بىرلەسە تالقىلاۋ.
فورۋمنىڭ اشىلۋ راسىمىندە جەتىسۋ وبلىسى اكىمىنىڭ ورىنباسارى دياس ەسداۋلەتوۆ قۇتتىقتاۋ ءسوز سويلەپ, وڭىردەگى ازاماتتىق باستامالاردى دامىتۋعا باعىتتالعان جۇمىستارعا توقتالدى. ءىس-شارانىڭ مودەراتورى, جەتىسۋ وبلىستىق ازاماتتىق اليانسىنىڭ ءتورايىمى دانيا قىدىرباەۆا فورۋمنىڭ باعدارلاماسىمەن تانىستىرىپ, قاتىسۋشىلار مەن دەلەگاتتاردى تانىستىردى.
فورۋم بارىسىندا ءۇش نەگىزگى باعىتتاعى سەسسيالار ءوتتى. العاشقى سەسسيا – «ازاماتتىق قوعامدى دامىتۋ جانە تسيفرلىق يننوۆاتسيالار» – «جەتىسۋ مەديا» مكك باسشىسى شىڭعىس بوزىمنىڭ جۇرگىزۋىمەن ۇيىمداستىرىلدى. وندا قازاقستان ازاماتتىق اليانسىنىڭ پرەزيدەنتى بانۋ نۇرعازيەۆا, «DANGEN» جك ديرەكتورى دانيار الدابەرگەنوۆ جانە «حالىقارالىق شارتتاردىڭ قوعامدىق مونيتورينگىنىڭ قازاقستاندىق ورتالىعىنىڭ» جەتەكشىسى گالينا مويسەەنكو تسيفرلىق تەحنولوگيالاردىڭ ۇەۇ قىزمەتىندەگى ءرولى, ChatGPT سىندى قۇرالداردىڭ الەۋمەت سالاسىنداعى مۇمكىندىكتەرى مەن جاڭا ازاماتتىق باستامالارعا قاتىستى ويلارىمەن ءبولىستى.
كەلەسى سەسسيا – «مەملەكەت, بيزنەس جانە ۇەۇ اراسىنداعى ءتيىمدى ارىپتەستىك» – جەتىسۋ وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامباەۆتىڭ مودەراتورلىعىمەن ءوتتى. بانۋ نۇرعازيەۆا مەن «شقو ازاماتتىق اليانسىنىڭ» ءتورايىمى, «شقو تالداۋ جانە بولجاۋ ينستيتۋتى» جشس ديرەكتورى اياۋجان اشيموۆا الەۋمەتتىك كاسىپكەرلىك, مەملەكەتتىك-جەكەشەلىك ارىپتەستىك پەن ۇەۇ جانە بۇقارالىق اقپارات قۇرالدارىنىڭ قوعامداعى ورنى تۋرالى پىكىرلەرىن ورتاعا سالدى.
ءۇشىنشى سەسسيا – «ازاماتتىق بەلسەندىلىك جانە جاستاردىڭ قاتىسۋى» – جەتىسۋ وبلىستىق ءدىن ىستەرى باسقارماسىنىڭ باسشىسى ساعىنىش جاڭابايدىڭ جەتەكشىلىگىمەن ءوتتى. سەسسيا سپيكەرلەرى – بانۋ نۇرعازيەۆا, قر اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتىنىڭ توراعاسى گۇلبارا سۇلتانوۆا, وبلىستىق ءماسليحات دەپۋتاتى ەركەبۇلان اقبولاتوۆ جانە «جەتىسۋ جاستارى» رەسۋرستىق ورتالىعىنىڭ ديرەكتورى شاميل ۆانكەەۆ جاستاردىڭ قوعامدىق ومىرگە ارالاسۋى, ۆولونتەرلىك قىزمەتتى ىلگەرىلەتۋ جانە الەۋمەتتىك جەلىلەردىڭ جاستار بەلسەندىلىگىنە اسەرى توڭىرەگىندە مازمۇندى تالقىلاۋلار جۇرگىزدى.
