مينيسترلىكتىڭ مالىمدەۋىنشە, جيىندا بالالاردىڭ قۇقىقتارىن قورعاۋدىڭ جاڭا تاسىلدەرى, وتباسىلىق قۇندىلىقتاردى دامىتۋ, الەۋمەتتىك جەتىمدىكتىڭ الدىن الۋ جانە بالانى ورنالاستىرۋدىڭ بالامالى تۇرلەرىن كەڭەيتۋ ماسەلەلەرى تالقىلاندى. جىل قورىتىندىسى بويىنشا ەنگىزىلگەن ماڭىزدى جاڭالىقتاردىڭ ءبىرى بالانى تاربيەلەۋدىڭ جاڭا ءتۇرى رەتىندە كاسىبي قابىلداۋشى وتباسىلار ينستيتۋتىنىڭ ىسكە قوسىلۋى بولدى. بۇل ءادىس بالالاردىڭ قولايلى ءارى قاۋىپسىز ورتادا وسۋىنە مۇمكىندىك بەرىپ, ولاردىڭ ەڭ وسال كەزەڭىندە تۇراقتىلىق پەن قامقورلىقتى قامتاماسىز ەتۋگە باعىتتالعان.
كەزدەسۋدە ءسوز العان مينيستر ع.بەيسەمباەۆ: «كاسىبي قابىلداۋشى وتباسى – بۇل ەرتە كەزەڭدە قولداۋ كورسەتۋدىڭ ماڭىزدى تەتىگى. مۇنداي وتباسى قيىن جاعدايدا قالعان بالانىڭ العاشقى كۇندەردەن-اق وتباسى جىلۋىن سەزىنىپ, تۇراقتى قولداۋ الۋىنا مۇمكىندىك بەرەدى. وڭىرلەر بۇل باعىتتا بەلسەندىلىك تانىتىپ, كاسىبي جاۋاپكەرشىلىكپەن جۇمىس ىستەۋى قاجەت. ويتكەنى بالانىڭ ءوزىن قاۋىپسىز سەزىنۋى جەرگىلىكتى جەرلەردەگى قولداۋشى ورتاعا بايلانىستى. ءبىز ءار باسشىنىڭ, ءار ماماننىڭ باستاماشىلدىعى مەن جاۋاپكەرشىلىگىنە سەنىم ارتامىز», دەدى.
زاڭ شەڭبەرىندە العاش رەت قامقورشىلىق ورگاندارى قىزمەتكەرلەرىنىڭ سانىنا قاتىستى ناقتى نورماتيۆ بەكىتىلدى – ءاربىر 5 مىڭ بالاعا ءبىر ماماننان. قازىردىڭ وزىندە وڭىرلەردە 900 قوسىمشا شتات بىرلىگى قۇرىلعان. بۇل وتباسىلاردى قولداۋ مەن الدىن الۋ جۇمىستارىن ءتيىمدى جۇرگىزۋگە جول اشادى. سونىمەن قاتار, تالىمگەرلىك ينستيتۋتى دا بەلسەندى دامىپ كەلەدى. بۇگىندە 330-دان استام تالىمگەر اتا-اناسىنىڭ قامقورلىعىنسىز قالعان بالالارمەن جۇمىس جۇرگىزىپ, ولاردىڭ الەۋمەتتىك بەيىمدەلۋىنە كومەكتەسىپ جاتىر.
بۇگىندە ەلىمىزدە 110-نان اسا بالالاردى قولداۋ ورتالىعى, بالالار اۋىلدارى, مەديتسينالىق-الەۋمەتتىك جانە ارنايى مەكەمەلەر جۇمىس ىستەيدى.
