قازاقستاندا التى جىلدا اۋقىمدى گەولوگيالىق بارلاۋ جۇرگىزىلگەن

التى جىل ىشىندە 2,014 ملن شارشى مەتر اۋماقتى قامتيتىن گەولوگيالىق بارلاۋ جۇمىستارى جۇرگىزىلگەن. بۇل جوسپارلانعان اۋماقتىڭ 91,6% قۇراپ وتىر.

باعدارلاما 2026 جىلعا قاراي ەل اۋماعىن گەولوگيالىق تۇرعىدان تولىق قامتۋ, جەر قويناۋىنىڭ ينۆەستيتسيالىق تارتىمدىلىعىن ارتتىرۋ جانە مينەرالدىق-شيكىزات كەشەنىن تۇراقتى دامىتۋدىڭ عىلىمي بازاسىن قالىپتاستىرۋدى كوزدەيدى.

112 ۋچاسكەدە ءتورت نەگىزگى باعىت: گەولوگيالىق بارلاۋ, مينەرالوگيالىق كارتا جاساۋ, تەرەڭ كارتالاۋ جانە گيدروگەولوگيا بويىنشا جۇمىستار اياقتالعان. بولجامدى رەسۋرستارى بار 38 پەرسپەكتيۆالى باعىت انىقتالعان. ولار:

- سيرەك جەر مەتالدارى – 2,6 ملن توننا

- مىس پەن نيكەل – 3,7 ملن توننا

- قوڭىر كومىر – 1,1 ملرد توننا

- التىن – 19 توننا.

ودان بولەك مۇناي-گاز ونەركاسىبى ارال شوگىندى باسسەينىندە 266 ملن توننا كولەمىندە الىناتىن كومىرسۋتەك رەسۋرستارىن تاپتى.

مينيسترلىك مالىمەتىنشە, باعدارلامانى جۇزەگە اسىرۋ كەزەڭىندە گەولوگيالىق بارلاۋعا 306 ليتسەنزيا بەرىلگەن. سالاعا تارتىلعان جەكە ينۆەستيتسيا كولەمى 137 ملرد تەڭگەدەن اسقان.

وسى كەزەڭدە كادرلار سانى مەن گەولوگ ماماندىعىنىڭ تانىمالدىلىعى دا ارتا تۇسكەن. ماسەلەن, 2022-2024 جىلدار ارالىعىندا گەولوگيا ماماندىعىن بىتىرۋشىلەر سانى 2,5 ەسەگە وسكەن.  سونداي-اق, سالا ماماندارىنا ارنالعان تۇڭعىش مەملەكەتتىك  ماراپات – «ەڭبەك سىڭىرگەن گەولوگ» تاعايىندالعانىن اتاپ وتكەن ءجون.

«قازاقستان گەولوگيالىق بارلاۋ جۇمىستارىنىڭ ساپاسى مەن جەر قويناۋىن پايدالانۋدىڭ اشىقتىعى بويىنشا ورتالىق ازيادا كوشباسشى بولۋعا بەت الدى. قالعان 200 مىڭ شارشى مەتردى قامتيتىن باعدارلاما 2025-2026 جىلدارى جالعاسادى. نازار وڭتۇستىك جانە باتىس ايماقتارعا, ونىڭ ىشىندە سىرداريا باسسەينىنە جانە سيرەك مەتالدار بويىنشا پەرسپەكتيۆالى ايماقتارعا اۋدارىلادى», دەلىنگەن مينيسترلىك حابارلاماسىندا.