فوتو: قارجى مينيسترلىگى
مينيسترلىك وكىلدەرىنىڭ ايتۋىنشا, زاڭنىڭ ءبىرىنشى جاڭاشىلدىقتار بلوگى ساتىپ الۋ راسىمدەرىن وڭايلاتۋ مەن قىسقارتۋعا ارنالعان. بۇل ساتىپ الۋدى جەدەل جۇرگىزۋگە, تاپسىرىس بەرۋشىلەردىڭ وكىلەتتىگىن كەڭەيتۋگە جانە راسىمدەردى ۇزارتۋعا جول بەرمەۋگە باعىتتالعان.
جاڭا زاڭعا سايكەس, جەتكىزۋشى تۋرالى اقپارات مەملەكەتتىك ورگانداردىڭ اقپاراتتىق جۇيەلەرى ارقىلى قالىپتاستىرىلادى. شاعىمداردى ساتىپ الۋدى ۇيىمداستىرۋشى تىكەلەي قارايدى. ال ساتىپ الۋ قورىتىندىسىن داۋلاۋ تەك ۆەب-پورتال ارقىلى جانە كونكۋرس كوميسسياسى جەڭىمپازدى انىقتاعان ساتىپ الۋلار بويىنشا عانا مۇمكىن بولادى.
سونىمەن قاتار, زاڭدا سىبايلاس جەمقورلىق قۇقىقبۇزۋشىلىقتارى ءۇشىن جاۋاپتى بولعان كومپانيالار, ولاردىڭ باسشىلارى نەمەسە قۇرىلتايشىلارى مەملەكەتتىك ساتىپ الۋعا قاتىسۋ قۇقىعىنان ايىرىلادى. بۇل نورما سىبايلاس جەمقورلىق تاۋەكەلدەرىن بارىنشا ازايتۋعا باعىتتالعان.
سونداي-اق زاڭ بويىنشا مەملەكەتتىك ساتىپ الۋلار مەن كۆازيمەملەكەتتىك سەكتور سۋبەكتىلەرىنىڭ ساتىپ الۋلارىنا بىرىڭعاي قولجەتىمدىلىكتى قامتاماسىز ەتەتىن, «ەلەكتروندىق قارجى ورتالىعى» اق بازاسىندا قۇرىلعان بىرىڭعاي ەلەكتروندىق پلاتفورما ەنگىزىلدى.
قارجى مينيسترلىگى جاڭا زاڭنىڭ مەملەكەتتىك ساتىپ الۋلاردىڭ اشىقتىعى مەن تيىمدىلىگىن ارتتىرىپ قانا قويماي, ساتىپ الىناتىن تاۋارلار مەن قىزمەتتەردىڭ ساپاسىن كوتەرۋگە, قاتىسۋشىلاردىڭ جاۋاپكەرشىلىگىن كۇشەيتۋگە جانە وتاندىق وندىرۋشىلەردى قولداۋعا مۇمكىندىك بەرەتىنىن اتاپ ءوتتى.
