قۇرىلىس جۇمىستارى 2024 جىلدىڭ جازىندا باستالىپ, تولىق اباتتاندىرۋمەن ءساتتى اياقتالدى. جاڭا توسەنىشتەر توسەلىپ, ورىندىقتار مەن قوقىس جاشىكتەرى ورناتىلدى, جارىقتاندىرۋ جۇيەسى تولىق جاڭارتىلدى. جاڭا الاڭدا بالالار مەن سپورتتىق الاڭدار, اشىق اسپان استىنداعى جاتتىعۋ قۇرىلعىلارى مەن دەمالىس ايماقتارى پايدا بولدى. جاعالاۋ ەندى سۋبۇرقاقتارمەن, جاعاجايعا تۇسۋگە ارنالعان باسپالداقتارمەن تولىققان. ناۋرىز ايىنىڭ سوڭىندا گۇلزارلار وتىرعىزۋ مەن قىلقانجاپىراقتى جانە جاپىراقتى اعاشتاردى ەگۋ جۇمىستارى دا اياقتالدى.
«بۇل تەك اباتتاندىرۋ ەمەس – بۇل تۇرعىندار مەن قوناقتار ءۇشىن جايلى ءارى تارتىمدى قوعامدىق كەڭىستىك قالىپتاستىرۋعا باعىتتالعان ماڭىزدى قادام. قوناەۆ قالاسى مەن قاپشاگاي جاعالاۋى – سۋ ءتۋريزمىنىڭ ءىرى ورتالىقتارىنىڭ ءبىرى. جاڭارعان جاعالاۋ ءوڭىردىڭ ينفراقۇرىلىمىن جەتىلدىرىپ قانا قويماي, ونىڭ ينۆەستيتسيالىق الەۋەتىن دە ارتتىرادى», دەدى الماتى وبلىسىنىڭ اكىمى مارات سۇلتانعازيەۆ.
ۇزىندىعى 1 شاقىرىم بولاتىن جاعالاۋ بۇگىندە دەمالىس, سەرۋەندەۋ, سپورتپەن شۇعىلدانۋ مەن وتباسىلىق ۋاقىت وتكىزۋ ءۇشىن بارلىق جاعداي جاسالعان كەڭ ءارى زاماناۋي كەڭىستىككە اينالدى. جوبانىڭ جۇزەگە اسۋىنا «كسج Freedom Life» كومپانياسى 4,53 ميلليارد تەڭگە كولەمىندە قارجىلىق قولداۋ كورسەتتى. بۇل – بيزنەستىڭ مەملەكەتپەن ءتيىمدى ارىپتەستىگىنىڭ جارقىن كورىنىسى.
«بۇل كەڭىستىكتى شىن مانىندە زاماناۋي ءارى تارتىمدى ەتۋ ءۇشىن ءبىز ايتارلىقتاي رەسۋرستار, ۋاقىت پەن كۇش جۇمسادىق. بۇل – جاي عانا ينفراقۇرىلىمدى جاقسارتۋ ەمەس, وبلىس ورتالىعى قوناەۆ قالاسىنىڭ بولاشاق دامۋىنا قوسقان ناقتى ۇلەسىمىز. ءبىز قالانىڭ زور الەۋەتىنە سەنەمىز. مۇنداي جوبالار ونىڭ ءومىر سۇرۋگە جايلىلىعىن ارتتىرا تۇسەدى», دەدى Freedom Holding Corp. باس اتقارۋشى ديرەكتورى تيمۋر تۋرلوۆ.
جاعالاۋدىڭ رەسمي اشىلۋىنان كەيىن نىسان كوممۋنالدىق مەنشىككە بەرىلدى. قوناقتار ءۇشىن ارنايى ەكسكۋرسيا ۇيىمداستىرىلىپ, وتاندىق ونەرپازدار مەن بي ۇجىمدارىنىڭ قاتىسۋىمەن مەرەكەلىك كونتسەرت ءوتتى.
ء«بىز ءىرى حولدينگ رەتىندە ESG قاعيداتتارىن ۇستانا وتىرىپ, قالالىق ورتانى جايلى ءارى شابىت سىيلايتىن ەتىپ قالىپتاستىرۋعا باعىتتالعان جوبالارعا باسىمدىق بەرەمىز. Freedom Life كومپانياسى سوڭعى التى جىلدان بەرى ءومىردى ساقتاندىرۋ سالاسىنداعى تسيفرلىق قىزمەت كورسەتۋ بويىنشا كوشباسشى بولۋمەن قاتار, الەۋمەتتىك ماڭىزى بار باستامالارعا دا ەرەكشە كوڭىل ءبولىپ كەلەدى. قوناەۆتاعى جاعالاۋدى اباتتاندىرۋ – بيزنەستىڭ قالالىق ينفراقۇرىلىمدى دامىتۋعا قوسقان ماڭىزدى ۇلەس. بۇل – ءبىزدىڭ سانالى ستراتەگيامىزدىڭ اجىراماس بولىگى, حالقىمىزدىڭ جارقىن بولاشاعىنا باعىتتالعان ناقتى قادام», دەدى كسج Freedom Life باسقارما توراعاسى ازامات ەردەسوۆ.
ءىس-شارا بارىسىندا الماتى وبلىسىنىڭ اكىمى قاپشاعاي سۋ قويماسىنىڭ ەكوجۇيەسىن ساقتاۋ جانە قوناەۆ قالاسىن ءوڭىردىڭ باستى تۋريستىك باعىتتارىنىڭ بىرىنە اينالدىرۋ جونىندەگى جوسپارلارىمەن ءبولىستى:
«الدا ءالى دە اۋقىمدى جۇمىستار كۇتىپ تۇر. تۋريستەرگە قولايلى جاعداي جاساۋ ءۇشىن زاماناۋي ينفراقۇرىلىم دامىتىلادى. سونىمەن قاتار « ۇلى دالا جورىعى» جانە ورىك فەستيۆالى سياقتى ءىرى ءىس-شارالار وتەدى. الداعى ۋاقىتتا حالىقارالىق دەڭگەيدەگى جاعاجاي مەن بەس جۇلدىزدى ەكى قوناقۇيدىڭ قۇرىلىسى دا قولعا الىنباق», دەدى مارات سۇلتانعازيەۆ.
الماتى وبلىسى.
