ءىس-شاراعا ءماجىلىس دەپۋتاتتارى, ەرىكتىلەر, الەۋمەتتىك قىزمەتكەرلەر, قارتتار جانە الەۋمەتتىك وسال توپتاردىڭ وكىلدەرى قاتىستى. جيىندا تسيفرلىق گيگيەنا, ينتەرنەت الاياقتىقتان قورعانۋ, سمارتفونداردى قاۋىپسىز پايدالانۋ, ونلاين-بانكينگ جانە eGov پورتالىنىڭ قىزمەتتەرىن پايدالانۋ بويىنشا ادىستەمەلىك ماتەريالدار ۇسىنىلدى.
ءماجىلىس دەپۋتاتى ەكاتەرينا سمىشلياەۆا اتالعان جوبا اياسىندا ازىرلەنىپ جاتقان «قازاقستان رەسپۋبليكاسىنىڭ تسيفرلىق كودەكسى تۋرالى» جانە «جاساندى ينتەللەكت تۋرالى» زاڭ جوبالارى ەلدەگى تسيفرلىق دامۋ مەن ازاماتتاردىڭ قاۋىپسىزدىگى اراسىنداعى تەپە-تەڭدىكتى ساقتاۋعا باعىتتالاتىنىن اتاپ ءوتتى.
ء«ومىرىمىزدىڭ بارلىق سالاسى تسيفرلاندىرىلىپ جاتقان قازىرگى كەزدە بۇل جوبا ەرەكشە وزەكتى بولىپ وتىر. اسىرەسە, زەينەتكەرلەرگە كومەك كورسەتۋ اسا ماڭىزدى. وكىنىشكە قاراي, سوڭعى جىلدارى ينتەرنەت-الاياقتاردىڭ قۇربانىنا اينالىپ جاتقان قارتتار كوبەيىپ كەتتى. الاياقتاردىڭ ەڭ باستى قارۋى – ازاماتتاردىڭ تسيفرلىق ساۋاتسىزدى. سوندىقتان تۇرعىندارعا تسيفرلىق قاۋىپسىزدىكتىڭ نەگىزگى ەرەجەلەرىن ءتۇسىندىرىپ, جەكە باسقا قاتىستى دەرەكتەردى قالاي قورعاۋدى ۇيرەتۋ ماڭىزدى», – دەدى ەكاتەرينا سمىشلياەۆا.
تۇساۋكەسەر راسىمىنەن كەيىن جيىنعا قاتىسۋشىلارعا فيشينگتى انىقتاۋ, قۇرىلعىلاردى باپتاۋ جانە ينتەرنەتتەگى ىقتيمال قاۋىپتەرگە قارسى ارەكەت ەتۋ بويىنشا تاجىريبەلىك كومەك كورسەتىلدى. «جاستار رۋحى» جاستار قاناتى توراعاسىنىڭ ورىنباسارى ەرجان حاميتوۆتىڭ ايتۋىنشا, الداعى ۋاقىتتا وبلىستىڭ بارلىق وڭىرلەرىندە وسىنداي ءىس-شارالار وتەتىن بولادى.
جوبا اياسىندا اتا-انالار جينالىستارى, مەكتەپتەردە «كيبەرقاۋىپسىزدىك» ساباقتارى, زەينەتكەرلەرگە ارنالعان «كۇمىس ليگا» تسيفرلىق ورتالىقتارى, سونداي-اق تسيفرلىق ۆولونتەرلەردى وقىتۋ مەن ارنايى ينتەراكتيۆتى كۋرستار ۇيىمداستىرىلماق.
قوستاناي وبلىسى
