پاۆلودار وبلىسىنىڭ تاس جولدارىندا قايعىلى جاعدايمەن اياقتالعان كولىك اپاتتارى ازايماي تۇر.
«جىل باسىنان بەرى ەرتىس-بايان وڭىرىندە 234 جول-كولىك وقيعاسى تىركەلىپ, سالدارىنان 13 ادام اجال قۇشتى. تاعى 323 ادام جاراقات الدى. پوليتسيا بەلگىلەنگەن قوزعالىس جىلدامدىعىنان اسىپ كولىك جۇرگىزگەن 25 763 قۇقىق بۇزۋشىنىڭ جولىن كەستى», دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتىنەن.
ءتارتىپ ساقشىلارى جول ءجۇرۋ ەرەجەلەرى مەن جىلدامدىق رەجيمىن بۇزۋ جول قوزعالىسىنىڭ بارلىق قاتىسۋشىلارى ءۇشىن قايعىلى سالدارعا اكەلۋى مۇمكىن ەكەنىن ەسكەرتەدى.
«جۇرگىزۋشىلەر بەلگىلەنگەن جىلدامدىق شەگىنەن اسپاي, جاياۋ جۇرگىنشىلەرگە مۇقيات بولۋى كەرەك. جاياۋ جۇرگىنشىلەر وتكەلدەرى مەن ايالدامالاردىڭ جانىندا جىلدامدىقتى تومەندەتىڭىز. قىزىل شام جانىپ تۇرعان باعدارشامداردا توقتاپ, قوزعالىس رۇقساتىن كۇتىڭىز. كولىك جۇرگىزۋ كەزىندە تەلەفوندى پايدالانباي, وزگە كولىكتەر مەن جاياۋ جۇرگىنشىلەردى قۇرمەتتەڭىز, قاشىقتىقتى ساقتاڭىز. وسىنداي قاراپايىم ەرەجەلەر ءسىزدىڭ دە, وزگەنىڭ دە ءومىرىن ساقتاپ قالاتىنىن ۇمىتپايىق. جول ەرەجەلەرىن بىلمەۋ جاۋاپكەرشىلىكتەن بوساتپايدى», دەيدى وڭىرلىك پوليتسيا دەپارتامەنتىنىڭ ماماندارى.
