كونفەرەنتسيادا ءسوز العان عىلىم جانە جوعارى ءبىلىم ءمينيسترىنىڭ كەڭەسشىسى رۋسلان ەمەلباەۆ وتكەن ايدا ەكى اپتاداي ەلىمىزدە اشىلعان شەتەلدىك جوعارى وقۋ ورىندارىنىڭ (جوو) فيليالدارىنا ءتۇسۋ بويىنشا اقپاراتتىق-تۇسىندىرمە جۇمىسى جۇرگىزىلگەنىن اتاپ ءوتتى. ونىڭ ايتۋىنشا, بۇل پرەزيدەنت قاسىم-جومارت توقاەۆتىڭ قازاقستاندا ۇزدىك شەتەلدىك جوو فيليالدارىن اشۋ تۋرالى تاپسىرماسىن ورىنداۋ, تالانتتى جاستاردى قولداۋ, جوعارى ءبىلىمنىڭ قولجەتىمدىگىن قامتاماسىز ەتۋ ماقساتىندا ىسكە اسىرىلدى. «Study in Kazakhstan» اتتى شەتەلدىك جوو فيليالدارىنىڭ كورمەسى قاراعاندى, استانا, الماتى, تاراز, تۇركىستان, قىزىلوردا, شىمكەنت قالالارىنداعى ىرگەلى ۋنيۆەرسيتەتتەر مەن وقۋشىلار سارايلارىندا وتكىزىلدى. بۇعان 20-دان اسا شەتەلدىك جوو فيليالدارىنىڭ وكىلدەرى, اتاپ ايتقاندا, اريزونا ۋنيۆەرسيتەتى (اقش), سولتۇستىك-باتىس پوليتەحنيكالىق ۋنيۆەرسيتەتى (قحر), جاساندى ينتەللەكت مەكتەبى (Seoul Tech) (وڭتۇستىك كورەيا), لوتارينگيا ۋنيۆەرسيتەتى (فرانتسيا), ۇلتتىق زەرتتەۋ يادرولىق ۋنيۆەرسيتەتى ميفي (رف), ماركە پوليتەحنيكالىق ۋنيۆەرسيتەتى (يتاليا), انحالت ۋنيۆەرسيتەتى (گەرمانيا), كوۆەنتري ۋنيۆەرسيتەتى ( ۇلىبريتانيا), حەرريوت-ۋوتت ۋنيۆەرسيتەتى ( ۇلىبريتانيا), بىدگوشش ەكونوميكا ۋنيۆەرسيتەتى (پولشا), د.ي.مەندەلەەۆ اتىنداعى رەسەي حيميا-تەحنولوگيالىق ۋنيۆەرسيتەتى (رف), لۋ بان تيانتسزين كاسىپتىك ينستيتۋتىنىڭ شەبەرحاناسى (قحر), كۆينس ۋنيۆەرسيتەتى ( ۇلىبريتانيا), ي.گۋبكين اتىنداعى رەسەي مۇناي جانە گاز ۋنيۆەرسيتەتى (رف), بەرلين تەحنيكالىق ۋنيۆەرسيتەتى (گەرمانيا), م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى (رف), پەكين ءتىل جانە مادەنيەت ۋنيۆەرسيتەتى, تاشكەنت يرريگاتسيا جانە اۋىل شارۋاشىلىعىن مەحانيكالاندىرۋ ينجەنەرلەرى ۋنيۆەرسيتەتى (وزبەكستان), گونكونگ ۋنيۆەرسيتەتى (قحر), دە مونفورت ۋنيۆەرسيتەتى ( ۇلىبريتانيا) قاتىسىپ, 10-11 سىنىپ وقۋشىلارىنا وزدەرىنىڭ ءبىلىم باعدارلامالارى, اكادەميالىق مۇمكىندىكتەرى, قوس ديپلوم باعدارلامالارى, وقۋ شارتتارى تۋرالى اقپارات بەردى.
ء«ىس-شارا اياسىندا شەتەلدىك جوو فيليالدارىنىڭ ەرەكشەلىكتەرىن ەسكەرە وتىرىپ, ماماندىق تاڭداۋدا دۇرىس باعىت-باعدار بەرەتىن شەبەرلىك ساباقتارى وتكىزىلدى, ءتۇرلى ۆيكتورينالىق ويىندار ويناتىلدى. IDP IELTS Kazakhstan رەسمي ەمتيحان ورتالىعىنىڭ وكىلى IELTS تاپسىرۋدىڭ مۇمكىندىكتەرى تۋرالى ءتۇسىندىردى. ال بەلگىلى پەداگوگ-پروفوريەنتولوگ ماماندار ءتۇرلى فاكتىلەردى كەلتىرىپ, تالاپكەرلەردىڭ تالابىن ارتتىردى. ءىس-شاراعا وڭىرلەر مەن قالالاردان 32 500-گە جۋىق وقۋشىنىڭ اتا-انالارىمەن بىرگە كەلگەنىنەن كورمەنىڭ كوپشىلىككە قىزىق بولعانىن بىلۋگە بولاتىنداي. 3-12 ءساۋىر ارالىعىندا اقتوبە, اتىراۋ, اقتاۋ, جاڭاوزەن قالالارىندا ماڭعىستاۋ جانە اتىراۋ وبلىستارىنا بولىنگەن نىسانالى ءبىلىم گرانتتارى, كاسىپتىك باعىت-باعدار بەرۋ بويىنشا اقپاراتتىق تۇسىندىرمە جۇمىستارى جۇرگىزىلەدى», دەدى ر.ەمەلباەۆ.
ال «ماماندىعىم-بولاشاعىم» كەڭسەسىنىڭ باسشىسى ولجاس ساكەنوۆ وڭىرلىك ەڭبەك نارىعىنىڭ وزەكتى سۇرانىستارىن ەسكەرە وتىرىپ, كادرلار دايارلاۋ جۇيەسىن قايتا فورماتتاۋدى كوزدەيتىن «ماماندىعىم – بولاشاعىم» جوباسىنىڭ ىسكە اسىرىلۋ بارىسىنا توقتالدى. سپيكەردىڭ سوزىنە قاراعاندا, مەملەكەت باسشىسىنىڭ 2019 جىلعى جولداۋىنداعى تاپسىرماسىنا سايكەس قولعا الىنعان جوبا بويىنشا كوماندا ەكى دەڭگەيدە – رەسپۋبليكالىق جانە وڭىرلىك دەڭگەيدە جاساقتالادى. سەبەبى بۇل جۇمىستىڭ مىندەتى اۋقىمدى بولىپ تۇر, ياعني ەكونوميكالىق دامۋداعى وڭىرلىك تەڭگەرىمسىزدىكتى تەڭەستىرۋ, ستەيكحولدەرلەردىڭ (مەملەكەت, كاسىپورىندار, ءبىلىم بەرۋ ۇيىمدارى, جاستار, اتا-انالار) كەڭ اۋقىمى ءۇشىن ەڭبەك نارىعى جانە ءبىلىم تۋرالى اقپاراتقا قول جەتكىزۋدى تەڭەستىرۋ, سونداي-اق وڭىرلىك بولىنىستە ەڭبەك ونىمدىلىگى مەن حالىقتىڭ تابىسىن ارتتىرۋ جۇكتەلگەن. وسىعان وراي عىلىم جانە جوعارى ءبىلىم مينيسترلىگىنە قاراستى جوعارى ءبىلىم بەرۋدى دامىتۋ ۇلتتىق ورتالىعىنىڭ بازاسىندا «ماماندىعىم-بولاشاعىم» رەسپۋبليكالىق جوبالىق كەڭسەسى قۇرىلدى. كەڭسە جوبانى جالپى ۇيلەستىرەدى, سونداي-اق وڭىرلىك جوبالاۋ كەڭسەلەرىنە ادىسنامالىق كومەك كورسەتەدى.
«جوبا اياسىندا وبلىس, رەسپۋبليكالىق ماڭىزى بار قالا مەكتەپتەرىنىڭ 7-11 سىنىپ وقۋشىلارىنا كاسىپتىك دياگنوستيكا جۇرگىزۋ كوزدەلگەن. بۇل رەتتە «Edunavigator» پلاتفورماسى – وقۋشىلارعا, مەكتەپتەردىڭ كاسىپتىك باعدار بەرۋشىلەرىنە جانە وبلىستارداعى ءبىلىم باسقارماسىنىڭ وكىلدەرىنە ارنالعان كاسىپتىك دياگنوستيكا قۇرالى. كاسىبي دياگنوستيكا وقۋشىنىڭ ءوزى تۋرالى تۇسىنىكتەرىن قالىپتاستىرۋ, كاسىبي ءوزىن-ءوزى انىقتاۋعا, كاسىبي مانساپتى بولجاۋعا جاردەمدەسۋ, ءبىلىم الۋشىلاردىڭ جەكە قاسيەتتەرىن, قابىلەتتەرىن, بەيىمدىلىگى مەن قىزىعۋشىعىنا قاراي ماماندىق تاڭداۋ, وسى ماماندىقتى (كاسىپتەردى) وقىتۋ ءۇشىن ۇسىنىلاتىن كاسىپتەر مەن وقۋ ورىندارىن قامتاماسىز ەتەدى. جوبا شەڭبەرىندە «Edunavigator.kz» پلاتفورماسىنان (ماڭعىستاۋ, قاراعاندى, پاۆلودار, اقتوبە, جەتىسۋ, اقمولا, جامبىل وبلىسى مەن الماتى قالاسىندا) 100 مىڭعا جۋىق وقۋشى تەستىلەۋدەن ءوتتى. تەستىلەۋدىڭ ناتيجەلەرى ءار قاتىسۋشىنىڭ بىرەگەي كاسىبي قىزىعۋشىلىقتارى مەن قالاۋىنا ساي ماماندىق تاڭداۋ, وقىتۋ باعدارلامالارى بويىنشا ۇسىنىستاردى جەكەلەندىرۋگە, ولاردىڭ بولاشاق مانساپتىق دامۋىنا قولداۋ كورسەتۋگە مۇمكىندىك بەردى», دەدى و.ساكەنوۆ.
كەڭسە باسشىسىنىڭ بايانداۋىنشا, قازىرگى ۋاقىتتا 91 وتاندىق جوو-دا جاڭا كاسىپتەردىڭ سالالىق اتلاستارى مەن وڭىرلىك كارتالار نەگىزىندە 902 ءبىلىم باعدارلاماسى ازىرلەندى. كوللەدجدەردە 45 ءبىلىم باعدارلاماسى اپروباتسيادان وتەدى. 9 وڭىردە كادرلارعا قاجەتتىلىكتىڭ وڭىرلىك كارتالارى جاسالادى. وڭىرلىك كارتالار كومەگىمەن 473 جاڭا ماماندىق انىقتالدى. وسى ءۇشىن 17 وڭىرلىك جوبالىق كەڭسەنىڭ كوماندالارى وقۋدان ءوتتى. 91 جوو 902 جاڭا ءبىلىم بەرۋ باعدارلاماسىن ەنگىزدى. پاۆلودار جانە ماڭعىستاۋ وبلىستارىندا كوللەدجدەردە 45 ءبىلىم باعدارلاماسى ەنگىزىلدى, بۇل بويىنشا 4 081 وقۋشى وقيدى. الداعى ۋاقىتتا 6 وڭىردە (شقو, بقو, سقو, اباي, قىزىلوردا وبلىستارى, شىمكەنت قالاسى) كادرلارعا قاجەتتىلىكتىڭ وڭىرلىك كارتالارىن ازىرلەۋ جەرگىلىكتى بيۋدجەتتەن كوزدەلگەن.
