2008 جىلدان بەرى تۇراقتى تۇردە وتكىزىلىپ كەلە جاتقان بايقاۋدىڭ باستى ماقساتى حالىقارالىق شىعارماشىلىق ىنتىماقتاستىقتى دامىتۋ مەن نىعايتۋعا, حورەوگرافيالىق وقۋ ورىندارى اراسىنداعى تاجىريبە الماسۋعا, جاس دارىنداردى انىقتاۋعا, ورىنداۋشىلىق شەبەرلىكتى ارتتىرۋعا جانە كلاسسيكالىق, حالىقتىق ءارى زاماناۋي بي داستۇرلەرىن دامىتۋعا باعىتتالعان.
– «ورلەۋ» – جاي عانا سايىس ەمەس, تاجىريبە الماسۋ مەن كاسىبي دامۋدىڭ ماڭىزدى الاڭى. جىل سايىن بايقاۋعا قاتىسۋشىلار سانى ارتىپ, حالىقارالىق ساراپشىلاردىڭ نازارىنا ءىلىنىپ كەلەدى. بيىلعى بايقاۋ سەگىز ەلدىڭ وكىلدەرىن بىرىكتىردى. «ورلەۋدىڭ» حالىقارالىق بالەت بايقاۋلارى فەدەراتسياسىنا مۇشە بولۋى ونىڭ جوعارى مارتەبەسىن راستايدى. قاتىسۋشىلارعا بۇل ءوز شەبەرلىكتەرىن كورسەتۋگە, قۇندى پىكىرلەر الۋعا جانە كاسىبي مانساپتا ماڭىزدى قادام جاساۋعا مۇمكىندىك بەرەدى, – دەپ اتاپ ءوتتى ا.سەلەزنيوۆ اتىنداعى الماتى حورەوگرافيا ۋچيليششەسىنىڭ ديرەكتورى مىندەتىن اتقارۋشى مۇرات تۇكەەۆ.
بايقاۋعا قاتىسۋشىلار تەك تەحنيكالىق شەبەرلىگىن عانا ەمەس, بي ارقىلى تەرەڭ وي, جان قاتپارىنا جاسىرىنعان ءتۇرلى سيقىرلى سەزىم مەن ەلىكتىرەتىن تىڭ قوزعالىس ەلەمەنتتەرىن كورسەتتى. كورەرمەندەر ءار قويىلىمنان تابيعات كورىنىستەرى مەن ادام بولمىسىن بەينەلەيتىن نازىك وبرازداردى كورىپ, رۋحاني اسەر الدى.
بالەت ونەرىنىڭ بەدەلدى تۇلعالارىنان قۇرالعان قازىلار القاسى – قازاقستاننىڭ حالىق ءارتىسى, اباي اتىنداعى قازاق ۇلتتىق وپەرا جانە بالەت تەاترى بالەت ترۋپپاسىنىڭ كوركەمدىك جەتەكشىسى گۇلجان تۇتكىباەۆا (قازاقستان), حورەوگرافيا قايراتكەرلەرىنىڭ حالىقارالىق وداعىنىڭ ءبىرىنشى ۆيتسە-پرەزيدەنتى سەرگەي ۋسانوۆ (رەسەي), تۇركيا مەملەكەتتىك وپەرا جانە بالەت تەاترلارىنىڭ باس ديرەكتورى جانە كوركەمدىك جەتەكشىسى بەدري تان ساگتيۋرك (تۇركيا), رەسەي جانە قازاقستاننىڭ ەڭبەك سىڭىرگەن ءارتىسى, حالىقارالىق بايقاۋلاردىڭ لاۋرەاتى يۋري ۆاسيۋچەنكو (رەسەي), «Ballet & Model AI» كومپانياسىنىڭ جەتەكشىسى, كورەيا بالەت قاۋىمداستىعى قامقورشىلىق كەڭەسىنىڭ ۆيتسە-پرەزيدەنتى چوي چجۋنسوك (وڭتۇستىك كورەيا), رەسەيدىڭ ەڭبەك سىڭىرگەن ونەر قايراتكەرى, «بالەت» جۋرنالىنىڭ باس رەداكتورى ۆالەريا ۋرالسكايا (رەسەي), قازاقستاننىڭ ەڭبەك سىڭىرگەن قايراتكەرى, «Samruk» زاماناۋي بي تەاترىنىڭ نەگىزىن قالاۋشى جانە كوركەمدىك جەتەكشىسى گۇلنارا اداموۆا (قازاقستان), ونەرتانۋ عىلىمدارىنىڭ كانديداتى, «گۇلدەر» ءانسامبلىنىڭ باس بالەتمەيستەرى انۆارا سادىقوۆا (قازاقستان) بيىلعى بايقاۋ قاتىسۋشىلارىنىڭ ونەرىنە باعا بەردى. ناتيجەسىندە, «كلاسسيكالىق بي» بويىنشا وڭتۇستىك كورەيانىڭ قىزدارى, «زاماناۋي بيدەن» رەسەيلىك پوپوۆا مەن ت.ساۆۆينوۆ دۋەتى, ال «حالىق بيىنەن» وزبەكستاندىق شاحلو ۋماروۆا ءى ورىنعا لايىق دەپ تانىلدى.
2019 جىلى «ورلەۋ» بايقاۋى حالىقارالىق بالەتتىك بايقاۋلار فەدەراتسياسىنىڭ تولىققاندى مۇشەسى رەتىندە يۋنەسكو تىزىمىنە ەنگىزىلدى. بۇل بايقاۋدىڭ حالىقارالىق مادەني كەڭىستىكتەگى بەدەلىن ايقىندايتىن ماڭىزدى جەتىستىك.
بايقاۋ بارىسىندا قاتىسۋشىلارعا كاسىبي شەبەرلىك ساباقتارى وتكىزىلىپ, شىعارماشىلىق پىكىر الماسۋلار ۇيىمداستىرىلدى. بۇل جاس بيشىلەردىڭ تەك ساحنادا عانا ەمەس, ونەر ورتاسىندا ءوز ورنىن بەلگىلەۋى ءۇشىن تاپتىرماس مۇمكىندىك. جەڭىمپازدار ءۇش اتالىم بويىنشا انىقتالىپ, ديپلومدارمەن جانە اقشالاي سىيلىقتارمەن ماراپاتتالدى. «ورلەۋ» بايقاۋى بي ونەرىنە قانات ءبىتىرىپ قانا قويماي, حالىقارالىق دوستىق پەن مادەني بايلانىستىڭ التىن كوپىرىنە اينالىپ وتىر.
بايقاۋ مادەنيەت جانە اقپارات مينيسترلىگىنىڭ قولداۋىمەن جانە الماتى حورەوگرافيالىق ۋچيليششەسىنىڭ ۇيىمداستىرۋىمەن ءوتتى.
الماتى
