بۇل – «Disney»-ءدىڭ قازاق تىلىندە «سويلەتكەن» ءتورتىنشى ءفيلمى. فيلمدەردى ءتۇرلى ەلدەرگە بەيىمدەپ, دۋبلياجداۋ – «Disney» كومپانياسىندا بۇرىننان قالىپتاسقان ءۇردىس. «Disney» جىل سايىن ءار ءفيلمنىڭ ءتۇرلى تىلدەردەگى 40-قا جۋىق نۇسقاسىن دايىندايدى. «قازاق ءتىلى» قوعامىنىڭ ۇيىتقى بولۋىمەن بىلتىردان باستاپ ءىرى حالىقارالىق ستۋديالار الەمدىك پرەمەرالارىن ۇلتىمىزدىڭ تىلىندە ۇسىنا باستادى. وسى باستاما اياسىندا «Disney» ستۋدياسى 2024 جىلى «ويجۇمباق 2», «موانا 2», «مۋفاسا. ارىستان پاتشا» دەپ اتالاتىن ءۇش ءفيلمىن قازاق تىلىنە اۋدارىپ, دۋبلياج جۇمىسىن قارجىلاندىردى. ەندى كورەرمەنگە «اقشاقار» تۋىندىسى ۇسىنىلىپ وتىر. «Disney» ستۋدياسىنىڭ «اقشاقار» ءفيلمى – 1937 جىلعى انيماتسيالىق ءفيلمنىڭ بەيىمدەلۋى. سيقىر مەن مۋزىكاعا قۇرىلعان شىتىرمان وقيعادا 7 ەرگەجەيلى كەيىپكەر – اقىلدى, جۇبانشاق, كۇلەگەش, ۇيالشاق, تۇشكiرشەك, ۇيقىشىل, اڭقاۋ ەكرانعا قايتا ورالادى.
كورسەتىلىمگە دۋبلياج اكتەرلەرىنىڭ تولىق قۇرامى, تانىمال تۇلعالار تۇتاس قاتىستى. ولار: ميۋزيكل اكتريساسى جارقىناي حانايىم, ءانشى, اكتريسا ايگۇل يمانباەۆا, ءانشى جۇلدىز ءۋاليحان, ءانشى ەركەش حاسان, اكتەر قايرات ادىلگەرەي, كينورەجيسسەر اقان ساتاەۆ. قازاق تىلىندەگى دۋبلياج رەجيسسەرى – شاح-مۇرات ورداباەۆ, قازاق تىلىندەگى اندەردىڭ مۋزىكالىق جەتەكشىسى – انەل سىرگەباەۆا.
بۇعان دەيىن «موانا 2»-ءنىڭ قازاقشا نۇسقاسى بوكس-وفيستەردىڭ 12,36% ۇلەسىن قامتىعان ەدى. كاسسالىق تابىس ۇلەسى 12 كۇندە 151 000 000 تەڭگەدەن اسىپ, قازاقشاعا اۋدارىلعان انيماتسيالىق فيلمدەر اراسىندا ەڭ تابىستى تۋىندى رەتىندە رەكورد ورناتتى. «Disney» مەن «Pixar» ستۋدياسىنىڭ «ويجۇمباق 2» ءفيلمى العاشقى 4 كۇندە 40 000 000 تەڭگەدەن استام قاراجات جيناپ, بۇعان دەيىن كورسەتىلگەن تۋىندىلار اراسىندا رەكورد ورناتقان بولاتىن. «مۋفاسا. ارىستان پاتشا» كوركەم ءفيلمىن قازاق جانە ورىس تىلدەرىندە كورۋگە 1,1 ميلليون كورەرمەن كەلگەن.
كورسەتىلىمگە ەلىمىزگە تانىمال تۇلعالار, قوعام قايراتكەرلەرى, كاسىپكەرلەر مەن دەپۋتاتتار, دۋبلياج اكتەرلەرى مەن بلوگەرلەر, باق وكىلدەرى قاتىستى.
الماتى
