فوتو: Freepik
دەپۋتات كەلتىرگەن دەرەككە سۇيەنسەك, 2019 جىلى قازاقستاندا 3360 ءسابي شەتىنەپ كەتكەن, 2020 جىلى 3286 ءسابي, 2021 جىلى 3732 بوپە باقيلىق بولعان. 2022 جىلى 3154 نارەستە, 2023 جىلى 2998 ءسابي شەتىنەپ كەتكەن. 2024 جىلى 2598 ءسابي اناسىنىڭ قۇشاعىنا ەنبەگەن.
ءسابي ءولىمى جيىلىگەن ايماقتار قاتارىندا اباي, اقتوبە, الماتى, جەتىسۋ, ۇلىتاۋ وبلىستارى بار.
بۇل تاقىرىپ ءسوز بولعاندا انا ءولىمى تاقىرىبىنا توقتالماي كەتۋگە بولماس. رەسمي دەرەك كەيىنگى 6 جىلدا ەلىمىزدە 563 انا بوسانۋ ۇستىندە كوز جۇمعانىن ايعاقتايدى. انا ءولىمى جەتىسۋ, قوستاناي, ۇلىتاۋ مەن اقتوبە وبلىستارىندا كوبەيگەن.
2024 جىلدىڭ قورىتىندىسى بويىنشا كوز جۇمعان انالاردىڭ 54 % قالادا, 46 % اۋىلدا تۇرعان. 4 نەمەسە ودان دا كوپ بالاسى بار ايەلدەر اراسىنداعى ءولىم-ءجىتىم دە كوبەيىپ, سالدارىنان 97 بالا جەتىم قالعان.
«سالادا پروبلەما جەتكىلىكتى, باسقاسىن بىلاي قويعاندا استانا قالاسىنداعى پەرزەنتحانالاردا 550 توسەك تاپشى. وعان قوسا مامان جەتكىلىكسىز. ەلىمىزدە 4 702 اكۋشەر-گينەكولوگ جۇمىس ىستەيدى, تاعى 389 مامان كەرەك. بوساندىرۋ ۇيىمدارىندا تەك 1 679 اكۋشەر – گينەكولوگ جۇمىس ىستەيدى, ونىڭ 560-ى عانا (35%) امپۋتاتسيا جاساي الادى. ال اكۋشەريادا وپەراتسيالىق تەحنيكانىڭ بارلىق تۇرلەرىن تەك 438 دارىگەر عانا (21%) ورىنداي الادى. بۇل ۇلكەن پروبلەما», ەكەنىن اتاپ وتكەن ن.سارسەنعاليەۆ ەلىمىزدەگى كەي پەرزەنتحانالاردىڭ حالىقارالىق تالاپتارعا ساي كەلمەيتىنىنە دە نازار اۋداردى.
«ينفراقۇرىلىمى ناشار, عيمارات ابدەن توزعان. ماسەلەن ورتالىقتاندىرىلعان وتتەگى جەتكىزگىشى, سىعىلعان اۋا جانە سورۋ ۆاكۋمى, قابىلداۋ بولىمدەرى جوق. 3-دەڭگەيدەگى بوساندىرۋ ۇيىمدارىندا ەكسپرەسس باك جوق. فلورا مەن انتيبيوتيكتەرگە سەزىمتالدىقتى ۋاقتىلى انىقتاۋعا ارنالعان زەرتحانالار جوق. بۇدان بولەك, مەديتسينالىق جابدىقتاردىڭ توزۋى مەن مەديتسينالىق مەكەمەلەردىڭ تومەن جاراقتاندىرىلۋى دا وزەكتى ماسەلە. مىسالى بىرنەشە ورتالىقتا ۋدز, كتگ اپپاراتتارى, انەستەزيا اپپاراتتارى, قست اناليزاتورلارى, سماد اپپاراتتارى جوق», دەدى دەپۋتات.
ول وسى ماسەلەلەردى شەشۋ ءۇشىن انا مەن بالا دەنساۋلىعىنا تىكەلەي جاۋاپتى پەريناتالدىق ورتالىقتار مەن پەرزەنتحانالارداعى دارىگەرلەردىڭ, سانيتارلاردىڭ, تەحنيكالىق مامانداردىڭ ايلىعىن كوتەرۋ سىندى بىرنەشە ۇسىنىسىن ورتاعا سالدى.
«وڭىرلەرگە مىقتى دارىگەرلەردى تارتۋ ء ۇشىن ءبىر رەتتىك كوتەرمەاقى مەن ارنايى تۇرعىن ءۇي باعدارلاماسىن ىسكە قوسۋ قاجەت. مىقتى مامانداردى دايارلاۋ ءۇشىن بالالار بەيىنى بويىنشا كافەدرالاردى قالپىنا كەلتىرۋ كەرەك. وبلىس ورتالىعىنان شالعايداعى اۋىلدىق جەرلەردە جانە اۋدانداردا جۇكتىلىگى اۋىر ءوتىپ جاتقان ايەلدەردى الدىن الا ەمدەۋگە ارنالعان پانسيوناتتاردى دەرەۋ سالۋ كەرەك. سەبەبى الىستاعى اۋىلدان تولعاق قىسقان انانى ورتالىققا اكەلگەنشە ءتۇرلى جاعداي ورىن الۋى مۇمكىن. «پاتروناجدىق مەدبيكە» لاۋازىمىن ەنگىزۋ قاجەت. پەريناتالدىق ورتالىقتار مەن پەرزەنتحانالاردىڭ, بالالار اۋرۋحانالارىنىڭ ماتەريالدىق-تەحنيكالىق بازاسىن جاڭارتۋ كەرەك», دەدى ن.سارسەنعاليەۆ.
