ناۋرىز جاڭاشا سيپات الدى
بىلتىردان باستاپ ناۋرىزعا جاڭاشا ءتۇر بەرۋ باستاماسى كوتەرىلدى. ونى بارلىق قاۋىم قولدادى. بىلتىر «سەنىمەن بولاشاق» رەسپۋبليكالىق اتا-انالار قوعامدىق بىرلەستىگى ۇلىستىڭ ۇلى مەيرامىن جاڭا مازمۇندا تويلاۋدى باستادى. بۇل پرەزيدەنتتىڭ مەرەكەنىڭ ماڭىزىن ارتتىرىپ, رۋحاني قۋاتىن زاماناۋي تۇردە جاڭعىرتۋ تۋرالى سۇحباتىنا ءدوپ ءتۇستى. مەملەكەت باسشىسىنىڭ ۇسىنىسىن ءىس جۇزىنە اسىرۋدىڭ جولى ناۋرىز مەيرامىن ازاماتتىق مەرەكەگە اينالدىرۋ ەكەنىن تۇسىنگەن بىرلەستىك تولىق جۇيەلەنگەن ماڭىزدى «SenBolناۋرىز» باعدارلاماسىن ازىرلەدى. مۇندا مەيرامعا بارلىق ادام قاتىسادى.
سونداي-اق ادامنىڭ ۇلتىنا, تىلىنە, سەنىم-نانىمىنا قاراماستان, ايتۋلى مەرەكەنىڭ تالىمدىك ءارى تاربيەلىك مازمۇنىن اشىپ كورسەتىپ بەرە الاتىن «جاڭارۋ» مەن «ادەپتى وركەنيەت» قۇندىلىقتارىنا لايىقتى مادەني ءىس-شارانىڭ رۋحاني نەگىزى مەن ۇيىمداستىرۋ جۇيەسى ناقتىلاندى. وسى ارقىلى ناۋرىز مەرەكەسى جالپىۇلتتىق بىرەگەيلىك پەن ازاماتتىق ۇستانىمعا نەگىزدەلدى.
مەملەكەت باسشىسى قاسىم-جومارت توقاەۆ بىلتىر اتىراۋ اتىرابىندا وتكەن «ادال ادام – ادال ەڭبەك – ادال تابىس» اتتى ۇلتتىق قۇرىلتايدا كوپتەگەن ەلدىك ماسەلەنى ءسوز ەتتى. «ەندىگى ماسەلە – ۇلتتىق بىرەگەيلىگىمىزدى نىعايتۋ. مەن «Egemen Qazaqstan» گازەتىنە بەرگەن سۇحباتىمدا ۇلىستىڭ ۇلى كۇنىن بۇكىل ەل بولىپ جاڭاشا اتاپ وتەتىنىمىزدى ايتتىم. جاقىندا وسىعان بايلانىستى ارنايى تۇجىرىمداما قابىلداندى. ارينە, بۇكىل الەم جۇرتشىلىعىمەن بىرگە قارسى الاتىن جاڭا جىل مەرەكەسىنەن باس تارتپايمىز. بىراق ءاز ناۋرىزدىڭ مارتەبەسىن كوتەرىپ, مازمۇنىن بايىتا تۇسەمىز. مىسالى, كورىسۋ كۇنىنەن باستالاتىن مەيرام كەزىندە ءار كۇننىڭ ءوز اتاۋى بولادى. سونىڭ ءبىرى ۇلتتىق كيىم كۇنى دەپ اتالادى. باسقا جۇرت قازاقتى كيىمىنەن تانيتىن بولۋى كەرەك», دەپ ايتقان ەدى. مادەنيەت جانە اقپارات مينيسترلىگى مەملەكەت باسشىسىنىڭ تاپسىرماسى اياسىندا «ناۋرىز مەيرامىن تويلاۋ تۇجىرىمداماسىن بەكىتۋ تۋرالى» ۇكىمەت قاۋلىسىن ازىرلەدى. ءسويتىپ, قازاق ەلى ۇلىق مەرەكەنى 10 كۇن تويلايتىن بولدى.
زاماناۋي سيپات
جاڭا جىلدا اياز اتا بالالارعا سىيلىق بەرەدى. بۇل وسى مەرەكەنىڭ ماڭىزىن ارتتىرا ءتۇستى. ادەمى داستۇرگە اينالدى. جاڭا جىلدى حالىققا بارىنشا جاقىنداتتى. ناۋرىز مەرەكەسىندە دە وسىنداي دۇنيەلەر بولسا, كانەكي! اسىرەسە بالالاردىڭ ەسىندە قالاتىن توسىنسىيلار جاساساق, قانداي عانيبەت! سوندىقتان ناۋرىزدى جاڭاشا تويلاۋ ارقىلى مەرەكەدە اتقارىلاتىن سالت-ءداستۇر, تانىم-ۇعىمداردى ۇلگى-ونەگە بەرەتىن ءتالىم-تاربيەلىك فورماتقا نەگىزدەي الۋ كەرەك. «سەنىمەن بولاشاق» ۇسىنعان تاعى ءبىر جول – ناۋرىزدىڭ كۇنتىزبەلىك جاڭا جىلمەن بايلانىستىرىلۋى.
31 جەلتوقساندا تۇنگى ساعات 24:00-دە كۇنتىزبە بويىنشا كەلەر جىل باستالسا, ناۋرىزدىڭ 22-سىندە جاڭا كۇندى قارسى الۋ ءداستۇرىن قايتا تۇلەتسەك دەيمىز. اتقان تاڭ مەن كەلەر كۇنگە ۇمىتپەن قاراعان ادامزات بار تىرشىلىك جاڭاراتىن ناۋرىزدى جاقسىلىققا نيەت ەتىپ باستاسا, ۇلكەن دە, كىشى دە ريزا بولارى حاق. جاڭا جىل – ناۋرىزدى قارسى الۋ وسى قاسيەتىمەن دە باسىم بولىپ تۇر.
وتشاشۋدىڭ ورنىن شاشۋ تولىقتاي الماستىرا الادى. قۋانىشتىڭ ايعاعى رەتىندە جاسالاتىن سالتاناتتى ءداستۇردىڭ ەرەكشەلىگى – ءار ءتاتتى دە (شاشۋدا) «سەنىمەن بولاشاق» ۇجىمىنىڭ اق تىلەكتەرى جازىلادى.
سونداي-اق تاڭعى استىڭ ىقشامدالعان ۇلگىسىن ازىرلەۋ – باعدارلاماداعى نەگىزگى باسىمدىقتىڭ ءبىرى. تاڭعى اس كۇنى بويى كۇش-قۋات پەن جىگەر بەرىپ قانا قويماي, قۇنارلىلىعىمەن ۇزاق ۋاقىت اشتىقتى سەزىندىرمەيدى. جەنت, تالقان, بالقايماق, كىلەگەي, سۇزبە, ۋىز, ىرىمشىك سەكىلدى قۇنارلى تاعامدار قويىلعان تاڭعى اس بەلسەندى قيمىل-قوزعالىستىڭ كەپىلى عانا ەمەس, اعزانىڭ كۇنى بويى الاتىن كالوريالىق قۋاتىن ءتيىمدى پايدالانۋعا جول اشادى.
ەڭبەك شەبەرحاناسى – ادام ءومىرىنىڭ نەگىزى. ەڭبەك – ادامدى ماتەريالدىق ءارى مورالدىق تا دامىتۋ قۇرالى. قازىرگى الفا ۇرپاققا ەڭبەك قۇندىلىعىن دارىپتەۋدە ناۋرىز مەيرامى تاپتىرماس قۇرال. مەملەكەت باسشىسى قاسىم-جومارت توقاەۆ 2025 جىلدى «جۇمىسشى ماماندىقتارى جىلى» دەپ جاريالاۋى بەكەر ەمەس. جوعارى باعالانۋعا ءتيىس ەڭبەك ادامىنىڭ قادىر-قاسيەتىن ارتتىرۋ ارقىلى جاستاردى تاربيەلەۋ ۇستانىمى جاتىر.
«Koje time» – ۇلىستىڭ ۇلى كۇنى دايىندالاتىن اس. ناۋرىز كوجەنىڭ ادام اعزاسىنا بەرەر قۋاتى مەن ءنارى بولەك. قۇرامىنا جەتى ءتۇرلى ءدام قوسىلىپ دايارلاناتىن كوجەنى قازان تولىپ, اق مول بولسىن دەگەن نيەتپەن بىرلەستىك قىزمەتكەرلەرى بىرلەسە دايارلايدى.
«Tree of life» – كوكتەممەن بىرگە كەلىپ, كوڭىلدى كورىكتەندىرەتىن مەيرامدى جاڭاشا مەرەكەلەۋدىڭ جوباسىنا بىرلەسىپ اعاش وتىرعىزۋ دا ەنگىزىلدى. بۇل – ساباقتاستىقتىڭ, جاڭا ءومىردىڭ, تابيعاتپەن ەتەنە جاقىندىقتىڭ جانە جاھاندىق ەكولوگيالىق قوزعالىسقا قوسقان ۇلەستىڭ ۇلگىسى. بۇدان بولەك, جاڭا جىلدا شىرشالاردى كەسىپ, تابيعاتقا زالال كەلتىرسە, ناۋرىزدا كەرىسىنشە, ء«بىر تال كەسسەڭ, ون تال ەك» قاعيداسىن بەرىك ۇستانىپ, ەلىمىزدى كوگالداندىرۋعا ۇلەس قوسادى.
سونداي-اق اناعا تاعزىم – ءبىزدىڭ بىرلەستىك ميسسياسىنىڭ ءبىرى. بۇل اتا-انا مادەنيەتىن قالىپتاستىرۋ بولعاندىقتان, ۇلكەنگە – قۇرمەت, كىشىگە – ىزەت كورسەتكەن دالا فيلوسوفياسى. وسى يدەيا «SenBolناۋرىز» تۇجىرىمداماسىندا بەرىك ورىن العان.
بىرلەستىكتىڭ ازاماتتىق ۇستانىمى رەتىندە باستالعان بۇل ءۇردىس قوعامدا قولداۋ تاۋىپ, بەلەڭ السا, قوعامنىڭ ۇتارى مول.
نۇركەن اسانوۆ,
«سەنىمەن بولاشاق» رەسپۋبليكالىق اتا-انالار قوعامدىق بىرلەستىگىنىڭ قۇرىلتايشىسى
