ەلىمىزدە VIP-ءنومىر سانالاتىن مەملەكەتتىك تىركەۋ نومىرلىك بەلگىلەرىنە سۇرانىس ءالى دە جوعارى. ءىىم ۇسىنعان اقپاراتقا سۇيەنسەك, بىلتىر قازاقستاندىقتار ايدىك نومىرلەر الۋعا شامامەن 15,8 ملرد تەڭگە جۇمساعان. ءبىرىنشى ساناتتاعى نومىرلەر ەڭ جوعارى سۇرانىسقا يە بولىپ قالا بەرگەن.
ساندار مەن ارىپتەردىڭ بىرەگەي كومبيناتسياسىنان قۇرالعان تىركەۋ نومىرلەرى اۆتوكولىك يەلەرى اراسىندا اسا ءوتىمدى. رەسمي ستاتيستيكا بولماسا دا جۇرگىزۋشىلەردىڭ كوبى ءبىرىنشى ساناتتاعى نومىرلەردى تاڭدايتىنى بايقالعان. ولاردىڭ باعاسى 224 مىڭ تەڭگە مولشەرىندە. بۇل ساناتقا 010, 020, 030, 040, 050, 060, 070, 077, 080, 090, 707 كومبيناتسيالارى ەنگىزىلگەن.
VIP-ءنومىر ساتىپ الۋشىلار ەلىمىزدىڭ ءۇش مەگاپوليسىندە كوپ كەزدەسەدى. ماسەلەن, الماتىلىق جۇرگىزۋشىلەر 4,9 ملرد تەڭگەگە «كرۋتوي ءنومىر» ساتىپ السا, استانالىقتار 2,5 ملرد تەڭگەگە, شىمكەنتتىكتەر 2 ملرد تەڭگەگە ادەمى نومىرلەر العان.
