فوتو: ۇكىمەت
قۋاتى 3 ملن توننا بولات وندىرەتىن مەتاللۋرگيا جوباسىن قىتايلىق ينۆەستورلار $1,2 ملرد-قا باعالاپ وتىر, جوبا شەڭبەرىندە 2,5 مىڭ جۇمىس ورنى اشىلادى. قۇرىلىس 2025 جىلدىڭ ءساۋىر ايىندا باستالادى دەپ جوسپارلانعان.
ۇكىمەتتىڭ مالىمەتىنشە, ينۆەستوردىڭ جوسپارىنا سايكەس, 2027 جىلى باستالاتىن ءبىرىنشى كەزەڭدە ءوندىرىس قۋاتى 1 ملن توننا بولاتتى قۇراسا, ال ينۆەستيتسيا كولەمى 160,2 ملرد تەڭگەگە جەتەدى. 2029 جىلعا قاراي ءونىم شىعارۋ 3 ملن تونناعا دەيىن ارتىپ, قوسىمشا ينۆەستيتسيا كولەمى 312,8 ملرد تەڭگە بولماق. وندىرىسكە قازاقستاندىق شيكىزات: قاراعاندى, قوستاناي جانە ۇلىتاۋ وبلىستارىندا وندىرىلەتىن تابيعي گاز جانە تەمىر رۋدالارى, سونداي-اق اكتاس پايدالانىلادى. ناتيجەسىندە, كاسىپورىندا كاتانكا, ارماتۋرا, قۇبىر وندىرىسىنە ارنالعان جولاقتى بولات, سونداي-اق بۇرىشتى جانە ءپروفيلدى بولات سياقتى ونىمدەردىڭ كەڭ اۋقىمىن شىعارۋ جوسپارلانىپ وتىر. جوبانى ىسكە اسىرۋدىڭ ەكىنشى كەزەڭى اياسىندا مەتاللۋرگيا زاۋىتىنىڭ قاجەتتىلىكتەرىن قامتاماسىز ەتۋ ءۇشىن قۋاتى 350 مۆت گاز تۋربينالى ەلەكتر ستانساسىن سالۋ جوسپارلانعان, وعان ينۆەستور 201,3 ملرد تەڭگە قارجى بولەدى.
Fujian Hengwang Investment Co Ltd كومپانياسىنىڭ باسقارما توراعاسى تسزەن چجاوتسيان كاسىپورىندا تەمىردى تىكەلەي قالپىنا كەلتىرۋ تەحنولوگياسى (DRI) ەنگىزىلەتىنىن, بۇل ونىڭ ونىمدەگى جوعارى قۇرامىن – 90%-دان استامدى قامتاماسىز ەتەتىنىن جانە قازاقستاندىق مەتاللۋرگيانىڭ باسەكەگە قابىلەتتىلىگىن ارتتىراتىنىن باسا ايتتى.
پرەمەر-مينيستر ولجاس بەكتەنوۆ اتالعان جوبا وتاندىق مەتاللۋرگيانى دامىتۋعا, ءوندىرىس قۋاتىن ارتتىرۋعا جانە ەلىمىزدىڭ ەكسپورتتىق الەۋەتىن كەڭەيتۋگە ماڭىزدى قادام بولاتىنىن اتاپ ءوتتى.
«جوبانىڭ ءبىز ءۇشىن ماڭىزى زور. بۇل – ەلىمىزدىڭ ەكسپورتتىق مۇمكىندىكتەرىن كەڭەيتۋگە جول اشاتىن ماڭىزدى باعىت. ينۆەستيتسيالىق جوبالاردى جەدەل ىسكە اسىرۋ ءۇشىن قازاقستان ۇكىمەتى جانىنان ينۆەستيتسيالىق شتاب جۇمىس ىستەيدى. ۇكىمەت ءسىزدىڭ جوسپارلارىڭىزدى تولىعىمەن قولدايدى جانە ولاردى جۇزەگە اسىرۋ ءۇشىن ءتيىستى قولداۋ كورسەتەدى», دەدى ولجاس بەكتەنوۆ.
