فوتو: اشىق دەرەككوز
رەسمي ستاتيستيكاعا سۇيەنسەك, 2024 جىلدىڭ 1 جەلتوقسانىندا ەل كولەمىندە ەلەكتر قۋاتىمەن جۇرەتىن جەڭىل اۆتوكولىكتەر سانى 1,6 ەسەگە ارتىپ, 7,3 مىڭنان 12 مىڭعا جەتكەن. كولىكتى ەلگە اكەلۋ كەزىندە وندىرۋشىلەر مەن يمپورتتاۋشىلار ۋتيليزاتسيالىق الىمداردى تولەۋدەن جانە باستاپقى تىركەۋ قۇنىنان بوساتىلادى, بۇل ءاۆتوموبيلدىڭ كەدەندىك قۇنىنان 15% ۇنەمدەۋگە مۇمكىندىك بەرەدى. دەگەنمەن دەپۋتاتتار ەلەكتروموبيل توڭىرەگىندە شەشىلمەگەن ماسەلە ءالى دە كوپ ەكەندىگىن ايتادى.
«اتاپ ايتساق, كولىك قۋاتتايتىن ورىندار ءورت قاۋىپسىزدىگى تالاپتارىنا سايكەس كەلمەيتىن جەرلەردە ورنالاسقان. بۇل وتە وزەكتى ماسەلە. سوسىن, وڭىرلەردە جانە رەسپۋبليكالىق ماڭىزى بار جولداردىڭ بويىندا كولىك قۋاتتاۋ ستانسالارى تاپشى. ءتىپتى جوق دەسە دە بولادى. حالىقارالىق تاجىريبەگە سايكەس, ەلەكتروموبيلدەر مەن قوعامدىق قۋاتتاۋ ستانسالارىنىڭ وڭتايلى اراقاتىناسى 10:1 بولۋى كەرەك. ال قازاقستاندا قازىرگى تاڭدا 43 ەلەكتروموبيلگە 1-عانا قۋاتتاۋ ستانساسى عانا تەڭ كەلەدى ەكەن», دەدى دەپۋتات ن. سايلاۋباي.
وسىعان وراي ن. سايلاۋباي باستاعان بىرقاتار دەپۋتات كولىك مينيسترلىگىنە, ونەركاسىپ جانە قۇرىلىس مينيسترلىگىنە جانە ەنەرگەتيكا مينيسترلىگىنە تومەندەگى ۇسىنىسىن جەتكىزدى:
«ەڭ الدىمەن زاڭعا ەلەكتر كولىكتەرى تۋرالى ارنايى تارماق ەنگىزىپ, جۇيەلى تۇردە رەتتەۋ قاجەت. وسىعان وراي, ەلەكتروموبيلدى 18 جاستان باستاپ جۇرگىزۋگە رۇقسات بەرۋ ماسەلەسىن قايتا قاراۋ قاجەت. جاعدايدى ەسكەرە وتىرىپ, ءبىز قازاقستاندا ەلەكتر كولىكتەرىن دامىتۋعا ارنالعان ۇلتتىق باعدارلاما ازىرلەۋدى ۇسىنامىز».
