فوتولار: كولىك مينيسترلىگىنىڭ ءباسپاسوز قىزمەتى
ەسكە سالايىق, كوپىر – شىعىس قازاقستان وبلىسىنداعى بۇقتىرما سۋ قويماسى ارقىلى وتەدى, ونىڭ جالپى ۇزىندىعى – 1316 مەتردى, ال ەنى –12,2 مەتردى قۇرايدى. قاۋىپسىزدىكتى قامتاماسىز ەتۋ ءۇشىن جاڭا كوپىردە 102 بەينەباقىلاۋ كامەراسى ورناتىلعان. كۇرشىمدەگى كوپىر اتالعان وبلىستىڭ كۇرشىم, ۇلكەن نارىن, مارقاكول, كاتونقاراعاي, تارباعاتاي, زايسان اۋداندارىن وسكەمەن قالاسىمەن بايلانىستىرادى.
بۇعان دەيىن ايماق تۇرعىندارى 500 شاقىرىمعا دەيىن اينالما جول جۇرۋگە ماجبۇر بولعانىن ايتا كەتكەن ءجون. بۇل جانارمايدى عانا ەمەس, ۋاقىتتى دا ۇنەمدەۋگە زور مۇمكىندىك. بۇرىن تاۋارلار, جازدا – پاروم, قىستا – مۇز ۇستىمەن اكەلىنگەن, ال ماۋسىمنان تىس ۋاقىتتا ەشتەڭە اكەلىنبەسە, ەندى تاۋارلار ءۇزىلىسسىز جەتكىزىلىپ, دۇكەندەردە باعالار تۇراقتالعان. تۇيىندەي ايتقاندا, كوپىر – ادامداردىڭ ءومىر سۇرۋىنە قولايلى جاعداي جاسادى.
كولىك مينيسترلىگىنىڭ مالىمەتىنشە, كۇرشىمدەگى كوپىر – شىعىس قازاقستاننىڭ الەۋمەتتىك-ەكونوميكالىق دامۋىنا سەرپىن بەرىپ قانا قويماي, تۇتاستاي العاندا ەلدىڭ كولىك-لوگيستيكالىق سالاسىنىڭ دامۋىنا وڭ اسەرىن تيگىزىپ, لوگيستيكالىق باعىتتاردى جاقسارتىپ, شەكارا ماڭىنداعى ەلدەرمەن ۇزدىكسىز بايلانىستاردى قامتاماسىز ەتتى. سونداي-اق كوپىر ايماقتىڭ تۋريستىك الەۋەتىن دە ارتتىرادى.
