فوتو: baq.kz
دەپۋتاتتىڭ پىكىرىنشە, سوڭعى 10 جىلدا مۇگەدەكتىگى بار بالالار سانى 40%-عا ءوستى, ال مەملەكەتتىڭ بۇل بالالارعا ارنالعان جاردەماقى شىعىندارى 50 ەسەدەن استام ۇلعايعان. الايدا, بۇل رەتتە مامانداندىرىلعان مەكەمەلەردى قامتاماسىز ەتۋ, بىلىكتى كادرلاردىڭ تاپشىلىعى جانە ۋاقتىلى دياگنوستيكا جاساۋ كەزىندە ەسكەرەتىن ەلەۋلى ماسەلەلەر بار.
«ستاتيستيكالىق كورسەتكىشتەر الشاقتىعى – بۇل باعىتتاعى جۇيەلى جۇمىستى دۇرىس جوسپارلاۋعا كەدەرگى كەلتىرەدى. ينكليۋزيۆتى ءبىلىم بەرۋ ماماندارىنىڭ جەتىسپەۋشىلىگى – لوگوپەد, سۋردو, وليگو, تيفلوپەداگوگتار وڭىرلەر تۇرماق, استانا مەن الماتى دا وتكىر سەزىلەدى. بالاسىنا شيپا ىزدەگەن اتا-انالار بۇكىل رەسپۋبليكادان وسى ەكى شاھارعا اعىلادى. بۇل قالالاردا دا مامانداردى 3 ايعا دەيىن كۇتەدى, ال كەيبىر جاعدايلاردا كۇتۋ ۋاقىتى ءبىر جىلعا دەيىن جەتۋى مۇمكىن. جالپى رەسپۋبليكا بويىنشا مۇگەدەكتىگى بار بالالاردىڭ شامامەن 15%-ى مەكتەپكە دەيىنگى جانە مەكتەپتەگى ءبىلىم بەرۋ سالاسىنداعى مەملەكەتتىك قىزمەتتەرمەن قامتاماسىز ەتىلمەگەن», دەدى بيبىگۇل جەكسەنباي.
بيبىگۇل جەكسەنباي وسى ماسەلەلەردى شەشۋ ءۇشىن مۇگەدەكتىگى بار ادامدار بويىنشا دەرەكتەردى ەسەپكە الۋدى اۆتوماتتاندىرۋدى, ەرتە دياگنوستيكا جاساۋدى ەنگىزۋدى, مامان دايارلاۋدى ۇلعايتۋدى جانە وتباسىلاردى الەۋمەتتىك قولداۋدىڭ قوسىمشا شارالارىن ازىرلەۋدى ۇسىندى.
