مەملەكەتتىك قىزمەتكە قاتىستى زاڭناما قايتا قارالادى

جيىندا اگەنتتىك توراعاسى دارحان جازىقباي مەملەكەت باسشىسى قاسىم-جومارت توقاەۆتىڭ مەملەكەتتىك قىزمەتتى جاڭعىرتۋدا العا قويعان مىندەتتەردىڭ سەر­ۆيستىك جانە ادامعا باعدارلانعان قاعي­داتتارى نەگىزىندە جۇزەگە اسىرىلىپ جاتقانىن جەتكىزدى.

– «مەملەكەتتىك قىزمەت تۋرالى» جاڭا زاڭ جوباسىن ازىرلەدىك. جاڭا زاڭ مەملەكەتتىك قىزمەتتەگى ەڭبەك قاتىناستارىمەن قاتار قوعام مەن مەملەكەتتىك اپپاراتتىڭ ءوزارا ءىس-قيمىلىنىڭ جاڭا پاراديگماسىن رەتتەيدى. سونداي-اق ىرىكتەۋ جۇيەسىن جاڭعىرتۋ, ەرتە كاسىبي باعدارلاۋ تەتىكتەرىن ەنگىزۋ, گوريزونتالدى ءوسۋ مۇمكىندىكتەرىن قاراستىرۋ, قىزمەتشىلەرگە الەۋمەتتىك كەپىلدىكتەردى جاقسارتۋ ماسەلەلەرىن قايتا قاراۋ كوزدەلگەن. زاڭ جوباسى اياسىندا 70-كە جۋىق زاڭعا تاۋەلدى نورماتيۆتىك-قۇقىقتىق اكتىلەر جاڭا رەداكتسيادا دايىندالادى, – دەدى ول.

بىلتىر كورسەتىلەتىن مەملەكەتتىك قىز­مەتتەردى باقىلاۋ ءىس-شارالارىنىڭ قو­رى­­تىندىسى ناتيجەسىندە 150 مىڭنان اسا بۇزۋشىلىق انىقتالعان. ونىڭ 37%-ى قا­شىقتان جۇرگىزىلگەن مونيتورينگ ارقىلى بەلگىلى بولدى.

– انىقتالعان بۇزۋشىلىقتاردىڭ 61,3%-ى نەمەسە 92 مىڭ فاكتى قىزمەت كورسەتۋ ءتارتىبىن بۇزۋمەن بايلانىستى بولىپ وتىر. بۇزۋشىلىقتار بويىنشا قىزمەت  بەرۋشى 1 600-دەن اسا ادام تارتىپتىك جاۋاپكەرشىلىككە, 458 لاۋازىمدى تۇلعا اكىمشىلىك جاۋاپكەرشىلىككە تارتىلدى. مەملەكەت كىرىسىنە ايىپپۇل تۇرىندە 40,7 ملن تەڭگە ءوندىرىلدى. باقىلاۋ شارالارى ناتيجەسىندە 1 918 قىزمەت الۋشىنىڭ بۇزىلعان قۇقىقتارى قالپىنا كەلتىرىلدى, ونىڭ 837 نەمەسە 44%-ى قاشىقتان مونيتورينگ ارقىلى قالپىنا كەلتىرىلدى. ماسەلەن, 325 ادامعا جەر ۋچاسكەلەرى بەرىلىپ, 143 ۋچاسكەنىڭ نىسانالى ماقساتى وزگەرتىلدى, 284 ساۋلەت-جوسپارلاۋ تاپسىرماسى تۇزەتىلدى, – دەدى د.جازىقباي.

جيىنعا پرەزيدەنت كەڭسەسىنىڭ باستىعى باقىتجان ساريەۆ, پرەزيدەنت اكىمشىلىگىنىڭ لاۋازىمدى تۇلعالارى, پارلامەنت دەپۋتاتتارى, مەملەكەتتىك قىزمەتتىڭ وڭىرلىك حابى, قوعامدىق ۇيىم وكىلدەرى, اگەنتتىك جانىنداعى القالى ورگانداردىڭ مۇشەلەرى قاتىستى.

– پرەزيدەنت قاسىم-جومارت توقاەۆ مەملەكەتتىك قىزمەتتىڭ تيىمدىلىگىنە ەرەكشە ءمان بەرىپ وتىر. سەبەبى مەملەكەتتىك قىزمەتتىڭ قوعامداعى ءرولى ايرىقشا. بۇل سالانى جەتىلدىرىپ, جاڭعىرتۋ – اگەنتتىكتىڭ باستى مىندەتى. پرەزيدەنتتىك جاستار كادر رەزەرۆىن جاساقتاۋ ءىسى جالعاسىن تاۋىپ كەلەدى. ويتكەنى ول تيىمدىلىگىن كورسەتىپ جاتىر. بۇگىندە رەزەرۆ مۇشەلەرى مەملەكەتتىك قىزمەت پەن ۇلتتىق كومپانيالاردىڭ جاۋاپتى لاۋازىمدارىندا قىزمەت ەتىپ وتىر. وسى جىلعا جوسپارلانعان كەزەكتى ىرىكتەۋدى جوعارى دەڭگەيدە وتكىزۋ قاجەت. وڭىرلىك كادر رەزەرۆىنىڭ مۇمكىندىكتەرىن كەڭىنەن قولدانعان ءجون. قازىرگى كەزدە رەزەرۆكە الىنعان 537 ادامنىڭ 110-ى ءار­تۇرلى لاۋازىمدارعا تاعايىندالعان. وسى­عان باي­لانىستى اگەنتتىكتىڭ اۋماقتىق دەپار­تا­مەنتتەرى اكىمدىكتەرمەن بىرلەسىپ, پار­مەندى شارالاردى قابىلداۋى قاجەت, – دەدى پرەزيدەنت كەڭسەسىنىڭ باستىعى باقىتجان ساريەۆ.

سونداي-اق مەملەكەتتىك قىزمەتشىلەردىڭ بىرىككەن اراب امىرلىكتەرىندە, ەۋروپادا, تۇركيادا, ازەربايجاندا جانە باسقا ەلدەردە بىلىكتىلىكتى ارتتىرۋ اياسىندا تاجىري­بە الماسۋىنا مۇمكىندىك جاسالعان. د.جازىقباي اگەنتتىك مەملەكەتتىك باسقارۋ جانە مەملە­كەت­تىك قىزمەت سالاسىنداعى وزىق الەمدىك تاجىريبەنى زەردەلەي وتىرىپ, شەتەلدىك ارىپتەستەرمەن ىنتىماقتاستىقتى كەڭەيتۋدى, عىلىمي زەرتتەۋلەر كومپونەنتىن كۇشەيتۋدى جالعاستىراتىنىن جەتكىزدى.