عىلىم جانە جوعارى ءبىلىم مينيسترلىگىنىڭ دەرەگىنە سۇيەنسەك, تەستكە قاتىسۋشىلاردىڭ 76,8%-ى قازاق تىلىندە, 23,1%-ى ورىس تىلىندە, 46 ادام اعىلشىن تىلىندە تەستىلەۋدەن ءوتتى. شەكتى بالدى 70%-عا جۋىق تالاپكەر جينادى. تەستىلەۋ ناتيجەسى بويىنشا ورتاشا بالل 65 بالدى قۇرادى. ەڭ جوعارى بالل – 137, مۇنى ەكى وقۋشى جينادى. تالاپكەرلەردىڭ باسىم بولىگى, ياعني 16,9%-ى «ماتەماتيكا-فيزيكا» جانە «بيولوگيا-حيميا» پاندەر كومبيناتسياسىن تاپسىردى. 10,3%-ى «شىعارماشىلىق ەمتيحاندى» قولاي كورگەن. ەڭ از تاڭدالعان كومبيناتسيا – «حيميا-فيزيكا», بۇل باعىتتى 105 ادام تاڭداعان.
قازىرگى تاڭدا 111 ادامنىڭ ناتيجەسى جويىلدى. ونىڭ ىشىندە 70 تالاپكەر سمارتفون جانە شپارگالكا سياقتى تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى, ال تەستىلەۋ كەزىندە ەرەجەلەردى بۇزعانى ءۇشىن اۋديتوريادان 41 ادام شىعارىلدى. وزگە تۇلعالار انىقتالعان جوق. بيىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلاتىنىن الدا تەست تاپسىراتىنداردىڭ ەسىنە سالا كەتكەن ءجون. بۇعان دەيىن حابارلاعانىمىزداي, قاڭتار ۇبت-سى 13 قاڭتار مەن 10 اقپان ارالىعىندا وتەدى. تەستىلەۋگە قاتىسۋعا 167 مىڭعا جۋىق تالاپكەر نيەت بىلدىرگەن.
