بۇل جۇمباق شۇڭقىر – قۋاتتى مەكەن. ارقاشان تۇمان باسىپ تۇراتىن بامبۋك شۇڭقىرىندا جوعالىپ كەتكەن ادامدار مەن ءۇي جانۋارلارى دا از ەمەس كورىنەدى. عالىمدار ءتۇرلى زەرتتەۋلەر جاساپ, ول جەردى كليماتى اۋىر جانە مەكەن ەتۋگە قاۋىپتى ايماق دەپ تاپقان.
«De salitto» قوناقۇيى
كولۋمبيا استاناسى بوگوتا قالاسىنان شامامەن 30 شاقىرىم جەردەگى تەكەنداما سارقىراماسى ادەمىلىگىنىڭ ارقاسىندا تۋريستەردىڭ سۇيىكتى مەكەنىنە اينالعان ەدى. الايدا قازىر ول ادام اياعى اتتاپ باسپايتىن جەر.
اڭعاردىڭ اسەمدىگىن تاماشالاۋعا كەلەتىن تۋريستەر كوبەيگەندىكتەن, 1928 جىلى وندا «De Salitto» قوناق ءۇيى سالىنعان. بىراق 90-جىلدارى قوناق ءۇي جۇمىسىن توقتاتتى. كوپشىلىكتىڭ ايتۋىنشا, بۇل ايماقتى «قارعىس اتقان». سول سەبەپتى قوناقۇي يەلەرى بۇل جەردەن اۋلاق بولۋ ءۇشىن كاسىبىنەن باس تارتادى. سودان بەرى تىلسىمعا تولى مەكەنگە اينالعان. حح عاسىردا سالىنعان عيماراتتى ءالى كۇنگە دەيىن ەلەستەر مەكەندەيدى دەگەن قاۋەسەت تە بار.
الىپتار كوپىرى
يرلاندياداعى الىپتار كوپىرىن كوپشىلىك بىلە بەرمەيدى. قىزىعى, ونى ادامدار سالماعان, تابيعاتتىڭ ەرەكشە قۇبىلىسىنان پايدا بولعان.
مىڭداعان جىل بۇرىن مۇندا ۇلكەن جانارتاۋ اتقىلايدى. سونىڭ اسەرىنەن وسى الىپ كوپىر تۇزىلگەن. التى بۇرىش پىشىنىندەگى ءىرى تاستار ۇلكەن ساتىعا ۇقسايدى. جەر پلانەتاسىنداعى بۇل عاجايىپ يۋنەسكو-نىڭ قورعاۋىندا. كەي دەرەكتەردە «الىپتار جولى» دەپ تە اتالاتىن مەكەندەگى تاستار 40 000 بازالتتىق كولوننادان تۇرادى. يرلانديانىڭ مۇنداي كەرەمەتىن تاماشالاۋعا جىل سايىن مىڭداعان تۋريست كەلەدى ەكەن.
دايىنداعان –
ديدار اسىلحان,
ق.ا.ياساۋي ۋنيۆەرسيتەتىنىڭ ستۋدەنتى
