فوتو: اقوردا
جۋىردا قابىلدانعان جاڭا كونستيتۋتسيا ەلىمىزدىڭ جاسامپاز الەۋەتىنىڭ ايقىن كورىنىسىنە اينالدى.
«جۇرتشىلىقپەن اقىلداسا وتىرىپ ازىرلەنگەن جاڭا حالىق كونستيتۋتسياسى ۇلتتىق رۋحىمىزدىڭ قۋاتى مەن اۋىزبىرشىلىگىمىزدى, تولەرانتتىلىعىمىزدى پاش ەتەدى. زاڭ مەن ءتارتىپ ۇستەمدىك ەتەتىن, ءبىلىم, عىلىم, مادەنيەت, تەحنولوگيا, تابيعاتتى ايالاۋ جانە سپورت قۇندىلىقتارى دارىپتەلەتىن قوعامدا ءومىر سۇرۋگە دەگەن ورتاق نيەتىمىزدى كورسەتەدى. تاۋەلسىزدىگىمىز, ەگەمەندىگىمىز بەن مەملەكەتىمىزدىڭ اۋماقتىق تۇتاستىعى, ازاماتتاردىڭ قۇقىقتارى مەن بوستاندىقتارى, ەڭبەكقورلىق, جاۋاپكەرشىلىك, پاتريوتيزم, سونداي-اق ادامي كاپيتالدى جان-جاقتى دامىتۋ سياقتى ماڭىزدى قاعيداتتار اتا زاڭىمىزعا ارقاۋ بولدى. سوندىقتان حالقىمىز كونستيتۋتسيالىق رەفورمانى ءبىرتۇتاس قوعام بولىپ جاپپاي قولدادى, ءار ازاماتىمىز ەلىمىزدىڭ جارقىن بولاشاعى ءۇشىن داۋىس بەردى. سەبەبى ءمان-مازمۇنى جاڭارعان كونستيتۋتسيا ءار ادامنىڭ دامۋىنا جاعداي جاسايدى», دەدى مەملەكەت باسشىسى.
مەملەكەت باسشىسى پاراليمپيادا ويىندارىنىڭ چەمپيونى ەربول حاميتوۆتى ماراپاتتادى
پرەزيدەنت كونستيتۋتسيامىزدىڭ باستى ماقساتىنا توقتالدى.
«اتا زاڭدا ادام كاپيتالىن, ياعني, ءبىلىم, عىلىم سالاسىن جانە يننوۆاتسيانى دامىتۋ ەلدىڭ ستراتەگيالىق باعىتى رەتىندە ايقىندالدى. ۇلت ساۋلىعىن ساقتاۋعا باسا ءمان بەرىلدى. كونستيتۋتسيامىزدىڭ باستى ماقساتى – ەلىمىزدىڭ تاۋەلسىزدىگىن, ەگەمەندىگىن جانە جەرىنىڭ تۇتاستىعىن قورعاۋ, ازاماتتاردىڭ قۇقىقتارى مەن بوستاندىقتارىن قامتاماسىز ەتۋ. ەندى الدىمىزدا تۇرعان وزەكتى ماسەلە – كونستيتۋتسيامىزدىڭ نەگىزگى قاعيداتتارىن ەلىمىزدە جانە شەتەلدە كەڭىنەن ءتۇسىندىرۋ جانە دارىپتەۋ. قازاقستان پاراسپورتشىلارى وزدەرىنىڭ تاماشا جەتىستىگىمەن, جارقىن جەڭىسىمەن مەملەكەتىمىزدىڭ مىزعىماس قۇندىلىقتارىن نىعايتۋعا مول ۇلەس قوسىپ ءجۇر دەپ ايتساق ارتىق بولماس», دەدى قاسىم-جومارت توقاەۆ.
سونىمەن قاتار قاسىم-جومارت توقاەۆ بۇگىندە مەملەكەت تاراپىنان پاراليمپيادا سالاسىنا جان-جاقتى قولداۋ كورسەتىلىپ جاتقانىن ايتتى.
«بىلتىر ەلىمىزدە 4 زاماناۋي ينكليۋزيۆتى سپورت كەشەنى جۇمىس ىستەي باستادى. الداعى ۋاقىتتا وسىنداي ورتالىقتار ءاربىر ايماقتا كوبىرەك اشىلۋى كەرەك. ءبىزدىڭ دەمەۋشىلەر وسى وتە ماڭىزدى جۇمىستان تىس قالماۋى قاجەت دەپ ويلايمىن. جالپى, مەملەكەت پاراليمپيادا قوزعالىسىن قولداۋعا ايرىقشا ءمان بەرەدى, بۇل باعىتتى قارجىلاندىرۋ كولەمى دە ۇلعايدى.
پاراسپورتشىلارىمىزدىڭ وجەت مىنەزى مەن مۇقالماس جىگەرى – كوپكە ۇلگى, وسكەلەڭ ۇرپاققا ونەگە. ۇلتتىق پاراليمپيادا قۇراماسىنىڭ ءار مۇشەسى قازاقستاننىڭ شەكسىز مۇمكىندىكتەر ەلى ەكەنىن الەمگە ايگىلەدى. وسىعان وراي, مەن سىزدەردى جوعارى مەملەكەتتىك ناگرادامەن ماراپاتتاۋ تۋرالى جارلىققا قول قويدىم. بارشاڭىزعا قۇتتى بولسىن! اماندىق, تابىس تىلەيمىن!», دەدى پرەزيدەنت.
