فوتو: اشىق دەرەككوز
QS پاندىك رەيتينگتەرى – 100 ەل مەن اۋماقتان 1900 ۋنيۆەرسيتەت ۇسىنعان 21 000-نان استام ءبىلىم بەرۋ باعدارلاماسىنا جاسالعان تاۋەلسىز سالىستىرمالى تالداۋ. رەيتينگ 55 ءپاندى قامتىپ, ولار 5 ءىرى باعىتقا بىرىكتىرىلگەن, اتاپ ايتقاندا, «ونەر جانە گۋمانيتارلىق عىلىمدار», «ينجەنەرلىك جانە تەحنولوگيالار», ء«ومىر جانە مەديتسينا عىلىمدارى», «جاراتىلىستانۋ عىلىمدارى», «الەۋمەتتىك عىلىمدار جانە باسقارۋ».
ەلىمىزدەگى جوعارى وقۋ ورىندارى اراسىندا ءال-فارابي اتىنداعى قازاق ۇلتتىق ۋنيۆەرسيتەتى كوش باستاپ, 4 سالالىق جانە 23 پاندىك رەيتينگكە ەندى. ودان كەيىن ل. گۋميلەۆ اتىنداعى ەۋرازيا ۇلتتىق ۋنيۆەرسيتەتى 1 سالالىق جانە 15 پاندىك رەيتينگتە كورىندى.
سونىمەن قاتار قازاق ۇلتتىق اگرارلىق زەرتتەۋ ۋنيۆەرسيتەتى, قۇرمانعازى اتىنداعى قازاق ۇلتتىق كونسەرۆاتورياسى جانە اباي اتىنداعى قازاق ۇلتتىق پەداگوگيكالىق ۋنيۆەرسيتەتى وزدەرىنىڭ بەيىندىك باعىتتارى بويىنشا الدىڭعى قاتاردان ورىن الدى.
اباي ۋنيۆەرسيتەتىندە ايەلدەر كوشباسشىلىعى ماگيسترلىك باعدارلاماسى ىسكە قوسىلادى
QS ساراپشىلارىنىڭ باعالاۋىنشا, قازاقستان ۋنيۆەرسيتەتتەرى حالىقارالىق ارەناداعى پوزيتسياسىن جۇيەلى تۇردە كۇشەيتىپ, پاندىك رەيتينگتەردەگى قاتىسۋ اياسىن كەڭەيتىپ كەلەدى. ۇيىمنىڭ اعا ۆيتسە-پرەزيدەنتى بەن ساۋتەر بۇل ءۇردىستى جوعارى باعالادى.
ونىڭ ايتۋىنشا, 2026 جىلعى رەيتينگ ناتيجەلەرى قازاقستاننىڭ جوعارى ءبىلىم بەرۋ جۇيەسى باسەكەگە قابىلەتتىلىگىن ارتتىرىپ وتىرعانىن دالەلدەيدى. اسىرەسە, جاڭا پاندەر بويىنشا 14 ءبىلىم بەرۋ باعدارلاماسىنىڭ العاش رەت ەنۋى – حالىقارالىق تانىمالدىقتىڭ وسكەنىن ايعاقتايدى. بۇعان قوسا, ء«بىلىم بەرۋ» مەن «لينگۆيستيكا» باعىتتارى بويىنشا كورسەتكىشتەر جاقسارىپ, «ورىنداۋشىلىق ونەر» سالاسىندا العاش رەت توپ-100 قاتارىنا كىرۋى ماڭىزدى جەتىستىك بولدى.
QS-ءتىڭ وڭىرلىك ديرەكتورى سەرگەي حريستوليۋبوۆ قازاقستاننىڭ بۇل باعىتتاعى ىلگەرىلەۋىن اتاپ ءوتتى. ونىڭ سوزىنشە, قازاقستان ورتالىق ازيا ەلدەرى اراسىندا پاندىك رەيتينگتەردىڭ توپ-100 تىزىمىندە ۇسىنىلعان جالعىز مەملەكەت بولىپ وتىر.
سونداي-اق ول ء«بىلىم بەرۋ جانە وقىتۋ» باعىتى بويىنشا توپ-50-گە ەنۋ – ءوڭىر تاريحىنداعى ەڭ جوعارى ناتيجە ەكەنىن جەتكىزدى. بۇل جەتىستىك اباي اتىنداعى قازاق ۇلتتىق پەداگوگيكالىق ۋنيۆەرسيتەتىنە عانا ەمەس, جالپى ۇلتتىق جوعارى ءبىلىم بەرۋ جۇيەسىنە ورتاق تابىس سانالادى.
جالپى العاندا, QS World University Rankings by Subject 2026 ناتيجەلەرى قازاقستاننىڭ الەمدىك ءبىلىم كەڭىستىگىندەگى ورنىن ايقىنداي تۇسەدى. پاندىك رەيتينگتەردەگى قاتىسۋشى ۋنيۆەرسيتەتتەر سانىنىڭ ارتۋى, جاڭا باعىتتاردىڭ قوسىلۋى جانە جەكەلەگەن پاندەردەگى جەتىستىكتەر ەلدىڭ اكادەميالىق الەۋەتىنىڭ كۇشەيگەنىن جانە ورتالىق ازياداعى جەتەكشى ءبىلىم ورتالىعى رەتىندەگى ءرولىنىڭ نىعايعانىن كورسەتەدى.
