فوتو: اقوردا
كەزدەسۋدە قازاقستان مەن رەسەي اراسىنداعى ستراتەگيالىق سەرىكتەستىكتىڭ جانە وداقتاستىق قارىم-قاتىناستىڭ نىعايىپ كەلە جاتقانى اتاپ ءوتىلدى. سونداي-اق ءوزارا ءتيىمدى ديالوگ پەن جوعارى دەڭگەيدە قول جەتكىزىلگەن ۋاعدالاستىقتاردى ىسكە اسىرۋ قارقىن العانىنا نازار اۋدارىلدى.
مەملەكەت باسشىسىنىڭ ايتۋىنشا, ميحايل ءميشۋستيننىڭ شىمكەنت قالاسىندا وتەتىن ەۋرازيالىق ۇكىمەتارالىق كەڭەس وتىرىسىنا جانە تسيفرلىق فورۋمعا قاتىسۋى قازاقستان-رەسەي بايلانىستارىنىڭ ايرىقشا سيپاتىن جانە ونى ودان ءارى ورىستەتۋگە قوس تاراپتىڭ ۇمتىلىسىن تاعى دا راستايدى.
«ەكىجاقتى ەكونوميكالىق ىنتىماقتاستىقتىڭ قالاي دامىپ كەلە جاتقانى وزىڭىزگە ءمالىم. قازىردىڭ وزىندە قۇنى 25 ميلليارد دوللارعا جۋىق 122 ءىرى جوبا ىسكە اسىرىلدى. ساۋدا كولەمى 30 ميلليارد دوللارعا جاقىندادى. بۇل جاقسى ناتيجە دەۋگە بولادى. رەسەي ءبىزدىڭ نەگىزگى ساۋدا-ەكونوميكالىق, ينۆەستيتسيالىق سەرىكتەسىمىز سانالادى. بۇعان ارينە, قۋانىشتىمىز», دەدى قاسىم-جومارت توقاەۆ.
مەملەكەت باسشىسى پاراليمپيادا ويىندارىنىڭ چەمپيونى ەربول حاميتوۆتى ماراپاتتادى
اڭگىمەلەسۋ بارىسىندا رەسەي فەدەراتسياسىنىڭ پرەزيدەنتى ۆلاديمير ۆلاديميروۆيچ ءپۋتيننىڭ قازاقستانعا جاسايتىن مەملەكەتتىك ساپارىنا دايىندىق ماسەلەلەرىنە باسا ءمان بەرىلدى.
مەملەكەت باسشىسى استانا الداعى ساپاردى ەكى ەل اراسىنداعى ستراتەگيالىق سەرىكتەستىك پەن وداقتاستىق قاتىناستاردى ودان ءارى دامىتۋعا تىڭ سەرپىن بەرەتىن وتە ماڭىزدى شارا رەتىندە قاراستىراتىنىن جەتكىزدى. پرەزيدەنتتىڭ ايتۋىنشا, ازىرلىك جۇمىستارى اياسىندا سان قىرلى ىنتىماقتاستىق تاعى دا پىسىقتالدى.
رەسەي ۇكىمەتىنىڭ توراعاسى قازاق جەرىندە كورسەتىلگەن سىي-قۇرمەت ءۇشىن مەملەكەت باسشىسىنا ريزاشىلىعىن ءبىلدىردى.
سونداي-اق قاسىم-جومارت توقاەۆتى جالپىۇلتتىق رەفەرەندۋمنىڭ تابىستى وتۋىمەن جانە قازاقستان رەسپۋبليكاسىنىڭ جاڭا كونستيتۋتسياسى قابىلدانۋىمەن قۇتتىقتادى.
ميحايل ءميشۋستيننىڭ ايتۋىنشا, رەفەرەندۋم قازاقستان پرەزيدەنتىنىڭ مەملەكەت ىرگەسىن نىعايتۋدى, ەكونوميكانى دامىتىپ, ازاماتتاردىڭ ءال-اۋقاتىن ارتتىرۋدى كوزدەيتىن ساياساتىن بارشا حالىق قولدايتىنىن كورسەتتى.
«ورايلى ءساتتى پايدالانىپ, سىزگە ۆلاديمير ۆلاديميروۆيچ ءپۋتيننىڭ ىستىق ىقىلاسىن جەتكىزگىم كەلەدى. بىرەر كۇن بۇرىن پرەزيدەنتپەن ەكىجاقتى قارىم-قاتىناستىڭ كۇن ءتارتىبىن, سونداي-اق بيىل مامىر ايىنا جوسپارلانعان ساپارىنا ازىرلىك جۇمىستارىن ەگجەي-تەگجەيلى تالقىلادىق. ۇكىمەت بۇل ساپاردىڭ دا تابىستى وتۋىنە بارىنشا كۇش سالادى. ءسىزدىڭ بىلتىر قاراشا ايىندا رەسەي فەدەراتسياسىنا جاساعان ساپارىڭىز بارىسىندا مەملەكەتتەر باسشىلارى قويعان بارلىق مىندەتتى ەكى ەل ۇكىمەتتەرى ىسكە اسىرىپ جاتىر», دەدى ميحايل ميشۋستين.
سونداي-اق تاراپتار ەكىجاقتى كۇن تارتىبىندەگى وزەكتى ماسەلەلەر جونىندە پىكىر الماستى.
