مۇنى كورىپ ايانو قاتتى قىنجىلادى. سودان باستاپ, جاپوندىق ايەل ادام بويلاس قۋىرشاقتاردى جاساي باستايدى. كەيبىرى بۇرىن سول جەردە تۇرعان كىسىلەرگە ۇقساس بولدى, كەي بەينەلەر سۋرەتشىنىڭ قيالىنان تۋدى. وسىلايشا, ايانو بالا كەزىندەگى كورىنىستى, اۋىلداعى قايناپ جاتقان تىرشىلىكتى قايتا جاڭعىرتقىسى كەلدى. ءبىر قىزىعى, قازىر ناگورودان 400-دەن استام قۋىرشاقتى كورۋگە بولادى. بۇل جەر كوڭىلگە قورقىنىش ۇيالاتاتىندىعىنا قاراماستان, تۋريستەر باراتىن كورنەكى ورىنعا اينالىپ, بەيرەسمي تۇردە «قۋىرشاقتار اۋىلى» دەگەن اتاۋعا يە بولدى.
ارالداعى جالعىز ءۇي
1950-جىلدارى قالانىڭ ۋ-شۋىنان جالىعىپ, جىراقتا دەمالۋدى قالاعان سايزەلاند اۋلەتى كىپ-كىشكەنتاي «Just Room Enogh Island» ارالىن ساتىپ العان. قازاقشالاساق, ء«بىر بولمەگە عانا جەتەدى».
كۇيبەڭ تىرشىلىكتەن قاشىپ كەلگەن اۋلەت اتالعان ارالعا قونىس اۋدارعاننان كەيىن تىپتەن جۇرتتىڭ نازارىنا ىلىكتى. اقش-تىڭ «The Washington Post» باسىلىمى: ء«بىر قاتە قادام جاساساڭىز, ءجۇزىپ كەتەسىز» دەگەن ماقالا دا جاريالادى. سودان سوڭ تۋريستەردىڭ وسى ءبىر مەكەنگە ەرەكشە ىنتىزارى اۋدى. وسىلايشا, «ارالدا الاڭسىز جاتىپ, تىنىشتىقتى تىڭدايمىز», دەگەن سايزەلاندتەر اۋلەتىنىڭ ءۇمىتى اقتالمادى...
قوناقجاي نوتر-دام
جوندەۋدەن كەيىن قايتا اشىلعان نوتر-دام دە پاري شىركەۋىنە ءبىر ايدا 800 مىڭنان اسا ادام بارعان. بۇل مينۋت سايىن عيماراتقا 32 ادامنان كەلىپ وتىردى دەگەن ءسوز.
الەمدىك مادەني مۇرانىڭ ايرىقشا نىسانى سانالاتىن ايگىلى عيماراتقا كەلۋشىلەر سانى وتە كوپ. كەزەك كەيدە 3 ساعاتقا سوزىلادى. 2019 جىلدىڭ كوكتەمىندە شىركەۋدە الاپات ءورت شىققان ەدى. بەس جىلعا جالعاسقان قالپىنا كەلتىرۋ جۇمىستارىنان كەيىن ءپاريجدىڭ كورنەكتى ورنى جەلتوقساننىڭ باسىندا قايتا اشىلدى. ورتكە دەيىن جىل سايىن مۇندا 14 ميلليون ادام كەلەتىن.
