فوتو: پاۆلودار وبلىسىنىڭ پوليتسيا دەپارتامەنتى
جول-كولىك وقيعاسىنا قاتىستى قىلمىستىق ءىس قوزعالدى.
«8 قاڭتاردا ساعات 21:00-دە پاۆلودار-سەمەي تاس جولىندا اققۋلى اۋدانىنداعى تىلەكتەس اۋىلىنىڭ ماڭىندا Kia Sportage جۇرگىزۋشىسى قار تازالايتىن كولىكتى باسىپ وزۋ كەزىندە قارسى كەلە جاتقان قوزعالىس جولاعىنا شىعىپ كەتىپ, كاماز جۇك كولىگىمەن بەتپە-بەت سوقتىعىسقان. اپات سالدارىنان Kia كولىگىنىڭ جۇرگىزۋشىسى مەن ەكى جولاۋشىسى وقيعا ورنىندا كوز جۇمدى. Kia كولىگىنىڭ تاعى ءبىر جولاۋشىسى اۋىر جاراقاتپەن اۋرۋحاناعا جەتكىزىلدى», دەپ حابارلادى پاۆلودار وبلىستىق پوليتسيا دەپارتامەنتىنىڭ ءباسپاسوز قىزمەتى.
پوليتسيا دەپارتامەنتى مۇنداي كەلەڭسىز جاعدايلاردىڭ الدىن الۋ ءۇشىن جول قوزعالىسىنا قاتىسۋشىلاردىڭ, اسىرەسە كولىك كوپ جۇرەتىن جەرلەردە جىلدامدىقتى ساقتاۋدى, كولىكتىڭ تەحنيكالىق جاعدايىن قاداعالاۋ ماڭىزدى ەكەنىن ەسكە سالادى.
