«2025 جىلعى 6 قاڭتاردا ۇلىتاۋ وبلىسى بويىنشا سىبايلاس جەمقورلىققا قارسى قىزمەت وبلىستىق ەكولوگيا دەپارتامەنتىنىڭ باسشىسىن ۇستادى. شەنەۋنىك ەكولوگيا سالاسىنداعى رۇقسات قۇجاتتارىن بەرگەنى ءۇشىن كاسىپكەردەن 2,5 ميلليون تەڭگە كولەمىندە پارا الدى دەگەن كۇدىككە ءىلىندى», دەلىنگەن حابارلامادا.
8 قاڭتاردا ول سوتتىڭ سانكتسياسىمەن قاماۋعا الىندى. تەرگەۋ جالعاسىپ جاتىر, باسقا ادامداردىڭ قاتىسى بار-جوعى تەكسەرىلىپ جاتىر.
2024 جىلعى 26 تامىزدا كۇدىكتى بيزنەستى قورعاۋ جوباسى اياسىندا كاسىپكەرلىك قىزمەتكە ارالاسقانى ءۇشىن اكىمشىلىك جاۋاپكەرشىلىككە تارتىلعان. ول كاسىپكەرگە قورشاعان ورتانى قورعاۋ جونىندەگى ءىس-شارالار جوسپارىنىڭ ورىندالۋى تۋرالى توقسان سايىنعى ەسەپ بەرۋ تۋرالى زاڭسىز تالاپتار قويعان.
قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتىلمەيدى. كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.
